0
0
ԵՐԵՒԱՆ.- Անցեալ շաբաթավերջին կայացաւ Հայաստանի Հանրապետութեան սփիւռքի նախարարութեան նախաձեռնութեամբ կազմակերպուած “Հայոց Ցեղասպանութեան 100-րդ տարելիցին ընդառաջ“ խորագրով հայկական հիմնախնդիրներու իրազեկման կառոյցներու ներկայացուցիչներու համահայկական խորհրդաժողովը: Համաժողովին ընթացքին քննարկուեցան Հայոց Ցեղասպանութեան 100-րդ տարելիցին ընդառաջ սփիւռքի մէջ ձեւաւորուած շրջանային յանձնախումբերու, հայկական հիմնախնդիրներու կառոյցներու ներկայացուցիչներու գործունէութիւնը եւ Հայաստանի արտաքին քաղաքականութեան արդի հարցեր:
Սփիւռքի նախարար Հրանուշ Յակոբեանի ղեկավարութեամբ` “Ժողովրդական դիւանագիտութեան հիմնախնդիրները“ նիւթով քննարկում տեղի ունեցաւ Հայաստանի Ազգային ժողովի արտաքին յարաբերութիւններու յանձնախումբի անդամներուն եւ միջազգային կազմակերպութիւններուն մէջ խորհրդարանական պատուիրակութիւններու ղեկավարներուն հետ:
Այնուհետեւ քննարկումները շարունակուեցան Հայաստանի պաշտպանութեան նախարարութեան մէջ, ուր նախարար Սէյրան Օհանեանի եւ նախարարութեան բարձրաստիճան հրամանատարական կազմին հետ քննարկուեցան Հայաստանի պաշտպանութեան վերաբերող հարցեր:
Համաժողովը իր աշխատանքային առաջին օրը աւարտեց Հայաստանի Հանրապետութեան սփիւռքի նախարարութեան մէջ Հայաստան-սփիւռք գործակցութեան զարգացման հարցերուն քննարկումով:
Համաժողովին Ազգային Ժողովի նախագահ Յովիկ Աբրահամեանի ողջոյնի խօսքը ներկայացուց Ա.Ժ. նախագահի տեղակալ Հերմինէ Նաղտալեանը: Համաժողովին ընթացքին քննարկուեցան Հայոց Ցեղասպանութեան հարիւրերորդ տարելիցին ընդառաջ Սփիւռքի մէջ ձեւաւորուած տարածաշրջանային յանձնախումբերու, հայկական հիմնախնդիրներու իրազեկման կառոյցներու ներկայացուցիչներու գործունէութիւնը, Հ.Հ. արտաքին քաղաքականութեան արդի խնդիրները:
Սեպտեմբեր 20-ին հայկական հիմնախնդիրներու իրազեկման կառոյցներու ներկայացուցիչներու համահայկական համաժողովի մասնակիցները հանդիպեցան Հ.Հ. Ազգային անվտանգութեան խորհուրդի քարտուղար, իրաւաբանական գիտութիւններու մասնագէտ Արթուր Պաղտասարեանի հետ:
Տեղի ունեցաւ “Հայաստանի անվտանգութեան հիմնախնդիրները“ նիւթով քննարկում:
Ողջունելով համաժողովի մասնակիցները Պաղտասարեան կարեւոր նկատեց հայապահպանութեան, ազգային անվտանգութեան, պետութեան առջեւ ծառացած մարտահրաւէները դիմակայելու խնդիրներուն վերաբերող նման համահայկական քննարկումները եւ վստահութիւն յայտնեց, որ համատեղ ուժերով հայ ժողովուրդը կարող է յաղթահարել անոնք եւ Սփիւռքը մեծ դերակատարութիւն ունի այդ գործով: “Ես կարծում եմ, որ քննարկումը շատ տպաւորիչ է եւ ներկայացուցչական ու կ՛օգնի գործունէութեան, ազգային մարտավարութեան նոր մեխանիզմներ մշակել, գործնական արդիւնքներ ստանալ“. նշեց Հ.Հ. ազգային անվտանգութեան խորհուրդի քարտուղարը:
Կարեւորելով Հ.Հ. ազգային անվտանգութեան խորհուրդի դերը համազգային հիմնախնդիրներու լուծման գործով, Հ.Հ. սփիւռքի նախարար Հրանուշ Յակոբեան ամփոփեց քննարկումը եւ շնորհակալութիւն յայտնեց կառուցողական եւ արդիւնաւէտ աշխատանքի համար:
Ժողովին մասնակցեցան հայկական հիմնախնդիրներու իրազեկման կառոյցներու շուրջ յիսուն ներկայացուցիչներ սփիւռքէն, Հայաստանէն եւ Արցախէն:
Նշենք թէ Սեպտեմբեր 21-ին, Հայաստանի արտաքին գործոց նախարար Եդուարդ Նալպանտեան եւ սփիւռքի նախարար Հրանուշ Յակոբեան ընդունեցին Հայկական հիմնախնդիրներու իրազեկման կառոյցներու ներկայացուցիչներու համաժողովի մասնակիցները:
Շնորհաւորելով ներկաները Հայաստանի վերանկախացման 22-ամեակին առիթով` Եդուարդ Նալպանտեան նշեց, որ խորհրդանշական է, որ այս հանդիպումը տեղի կ՛ունենայ Ազգային տօնի օրը, քանի որ մեր ընդհանուր նպատակն է համադրել ջանքերը` ի նպաստ համահայկական խնդիրներու լուծման, Հայաստանի պետականութեան ամրապնդման:
Նալպանտեան ներկայացուց Հայաստանի արտաքին քաղաքականութեան առաջնահերթութիւնները, համահայկական հիմնախնդիրներու վերաբերեալ Հայաստանի կողմէ իրականացուող քայլերը, ղարաբաղեան հիմնախնդիրի խաղաղ լուծման համար ջանքերը, ինչպէս նաեւ սուրիահայութեան անվտանգութեան առնչուող հարցերը:
