էջմիածին․-Միասնական Աղօթք Եւ Ամենայն Հայոց Կաթողիկոսի Հայրապետական Պատգամը
Օգոստոս 7-ին, Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի, ինչպէս նաեւ Գերագոյն Հոգեւոր Խորհուրդի անդամ վեց եպիսկոպոսներու դէմ յարուցուած քրէական գործով առաջին դատական նիստէն ետք, Մայր Աթոռ Սուրբ Էջմիածինի միաբանութիւնը եւ ներկայ հաւատացեալ ժողովուրդը էջմիածինի Մայր Տաճարին մէջ մասնակցեցան Երեկոյեան ժամերգութեան, որու աւարտին Վեհափառ Հայրապետը իր օրհնութիւնն ու պատգամը փոխանցեց հաւատացեալներուն․-
Սիրելի հաւատաւոր զաւակներ Մեր,
Հայրապետական Մեր սէրը, օրհնութիւնն ու գնահատանքն ենք բերում ձեզ, որ դատարանի շրջափակում Հայ Եկեղեցու դէմ մերժելի գործընթացների առնչութեամբ ձեր ընդվզումն արտայայտելուց յետոյ այժմ, համախմբուած Մայր Տաճարում, միասնական աղօթք բարձրացրեցինք առ Աստուած մեր Սուրբ Եկեղեցու եւ ժողովրդի համար:
Հայոց Եկեղեցին իւրաքանչիւր հայի հոգեւոր օրրանն ու սրբութիւնն է: Մեր Սուրբ Եկեղեցին մեր ժողովրդի հաւատքի անսասան ամրոցն է, առաջնորդողը դէպի Աստուած ու փրկութիւն եւ աննահանջ պահապանը հայոց ինքնութեան ու ազգային-հոգեւոր ժառանգութեան:
Մեր օրերում իշխանութիւնների եւ իշխանական կառոյցների կողմից քայլեր են ձեռնարկւումէկեղեցու հեղինակութիւնը վնասելու, ինքնավարութիւնը սահմանափակելու եւ Եկեղեցին իրենցկամքին հպատակեցնելու, ինչպէս եւ քաղաքական ժամանակաւոր նպատակայարմարութիւնների առջեւ ազգային ինքնութեան ընկալումը, նուիրական ու սրբազան խորհրդանիշներն ու յիշատակները ձեւափոխելու: Արդարեւ, Եկեղեցու ինքնավարութիւնը ազգի բարօրութեան, պետութեան հզօրացման կարեւոր գրաւականներից մէկն է եղել բոլոր ժամանակներում:
Ցաւով ենք անդրադառնում, որ մեր Սուրբ Եկեղեցին ու հոգեւորականները իշխանութիւնների կողմից ենթարկւում են հետապնդումների: Ապօրինի եւ շինծու քրէական գործերով կալանք ու ազատութեան սահմանափակումներ են կիրառուել մի շարք եկեղեցականների, ազգային բարերարի եւ ազգանուէր ու եկեղեցասէր այլ անձանց նկատմամբ: Քիչ առաջ վերադարձանք անհիմն եւ հանիրաւի մեղադրանքներով նաեւ Մեր եւ Գերագոյն հոգեւոր խորհրդի անդամ երկու արքեպիսկոպոսի ու չորս եպիսկոպոսի դէմ յարուցուած դատավարութեան առաջին նիստից, որը չկայացաւ դատաւորի կողմից ինքաբացարկ յայտնելու պատճառով:
Մենք լի ենք հաւատով եւ վճռականութեամբ, սիրելիներ, պաշտպանելու Մեր արդար իրաւունքները`երաշխաւորուած ինչպէս մեր պետութեան սահմանադրութեամբ, այնպէս եւ միջազգային իրաւունքի հիմնարար սկզբունքներով:
Այս գիտակցութեամբ եւ պատասխանատուութեամբ, առ ազգն ու հայրենին սիրով Մենք շարունակելու ենք Մեր տէրունապատուէր առաքելութիւնը` հակառակ բոլոր դժուարութիւնների եւ արգելքների, քանզի, ինչպէս սաղմոսերգուն է ասում, «աստուած ապաւէնն ու զօրութիւնն է մեր, եւ մեր օգնականը մեզ հասած խիստ նեղութիւնների մէջէ (Սաղմ. 45.2): Անտարակոյս, Մեր ապաւինութիւնն Աստուած է, եւ Մեր ծառայութիւնը բարեպաշտ աշխարհասփիւռ մեր ժողովրդի եւ հարազատ երկրի համար է:
Սիրելի հաւատաւոր հայորդիներ, աղօթական համախմբումի այս պահին Հայրական սիրով Մեր գնահատանքն ենք բերում ձեզ եւ եկեղեցասէր Մեր բոլոր զաւակներին ի Հայաստան եւ ի սփիւռս, ազգային ու հասարակական կազմակերպութիւններին, փաստաբաններին,գիտական, կրթական, մշակութային, քաղաքական գործիչներին, որոնք առկայ բարդ պայմաններում հաստատակամութեամբ ու նախանձախնդրութեամբ զօրակցում են Մայր Եկեղեցուն եւ նրա ազգօգուտ առաքելութեանը: Աննկուն պիտի լինենք եւ միասնաբար յամառ ու տեւական ջանքեր ներդնենք, որ դադարեն անիրաւութիւնները մեր երկրում, խտրականութիւնն ու անհանդուրժողականութիւնը, տարածում չգտնեն չարակամութեան ու ատելութեան խօսոյթները: Մենք պիտի յամառ ու տեւական ջանքեր ներդնենք, որպէսզի հայրենական ու ազգային մեր անդաստանը նորոգուի եղբայրասիրութեամբ ու համերաշխութեամբ, եւ մեր կեանքում գերակայէն ճշմարտութիւնը, օրինականութիւնն ու արդարութիւնը, յարգուեն Եկեղեցու դարաւոր կարգերն ու աւանդոյթները, որ չվիրաւորուեն հաւատացեալների բարեպաշտական զգացումները:
Հայրապետիս յորդորն է ամէնքիդ` լինել սթափ եւ խոհեմ, չտրուել սադրանքների, նենգամիտ խարդաւանքների, ամուր մնալ հաւատով ու յոյսով, քանզի Աստուած բոլոր չարամիտ իրողութիւններից ու փորձութիւններից բարիքներ է վեր հանում իր Սուրբ Եկեղեցու եւ հաւատացեալ ժողովրդի համար: Նեղութիւնների մէջ է նաեւ զօրանում մեր հաւատքը, դրսեւորւում հաստատուն նուիրումը Աստծուն, հայրենիքին եւ Եկեղեցուն, անխախտ հաւատարմութիւնը` ազգային-հոգեւոր մեր սրբազան արժէքներին: Արտաքին եւ ներքին սպառնալիքների յանդիման ամրապնդենք մեր ազգային միաբանութիւնը, արդիւնաւորենք մեր ընթացքը հայրենանուէր ու ազգաշահ գործերով եւ ըստ առաքեալի պատգամի` զօրանանք Տիրոջով եւ Նրա զօրութեան կարողութեամբ (Եփ. 6.10):
Հաւատում ենք, որ մեր Սուրբ Եկեղեցին Աստծոյ ողորմութեամբ եւ մեր ժողովրդի անսակարկ նուիրումով ու սիրով պիտի յաղթահարի այս նեղութիւնները նոյնպէս եւ նոր յաջողութիւններ ամրագրի իր առաքելութեան ճանապարհին` ի բարօրութիւն եւ ի պայծառութիւն համայն հայոց կեանքի:
Մեր հայեացքն ուղղուած է Աստծուն եւ Մեր ջանքերը` հայրենիքի շինութեանն ու մեր ժողովրդի սպասաւորութեանը: Թող Աստուած օրհնի հայոց պետութիւնը, անվրդով ու խաղաղ պահի մեր ժողովրդին ի հայրենիս եւ ի սփիւռս այսօր եւ միշտ եւ յաւիտեան:
Շնորհք, սէր եւ խաղաղութիւն Տէառն մերոյ Յիսուսի Քրիստոսի եղիցին ընդ ձեզ եւ ընդ ամենեսէան. ամէն:
