Անի Հարոյեան Եւ Ստեփան Էլմասեան Պիտի Ստանան Վահան Քարտաշեան Մրցանակը՝ Հայ Դատի Արեւելեան Ա․Մ․Ն․-ի Յանձնախումբի Արեւելեան Շրջանի Տարեկան Հանդիսութեան Ընթացքին

Հայ Դատի Արեւելեան Ա․Մ․Ն․-ի յանձնախումբը, յատուկ հաղորդագրութեամբ մը կը տեղեկացնէ, թէ այս տարուայ 20-րդ հանդիսութեան ընթացքին, որ տեղի պիտի ունենայ Ուրբաթ, 5 Դեկտեմբերին, Ռոտ Այլընտի Ուորուիք քաղաքին մէջ, Հայ Դատին համար ծառայած գործիչներ՝ Անի Հարոյեան եւ Ստեփան Էլմասեան պիտի մեծարուին եւ ստանան Վահան Քարտաշեան մրցանակը։ Վահան Քարտաշեան մրցանակը, որ Հայ Դատի Ամերիկայի յանձնախումբի Արեւելեան շրջանի բարձրագոյն պարգեւն է, կը կրէ 20-րդ դարու սկիզբը հայանպաստ գործունէութիւն ծաւալած այն գործիչին անունը, որ հիմը դրաւ քաղաքական բնագաւառին մէջ հայորդիին պահանջատիրութեան շարժումին։ Մրցանակը կը շնորհուի այն անձերուն, որոնք իրենց ծառայութեամբ եւ նուիրումով նպաստած են Հայ Դատի յառաջխաղացքին եւ իրենց համայնքին մէջ ձգած են սերունդներու վրայ տարածուող մնայուն հետք մը։ Անի Հարոյեան Հայոց Ցեղասպանութենէն վերապրածներու թոռնուհին է։ Անոր ծնողները Եոզկաթի Կիւրտէն գիւղէն էին։ Ան իր ազգային եւ կազմակերպական գործունէութիւնը սկսած է Հայ Երիտասարդաց Դաշնակցութեան պատանեկան եւ երիտասարդական կազմակերպութիւններէն՝ նախ Լոուըլի «Արարատ» մասնաճիւղին, ապա Փրաւիտենսի «Վարանդեան» մասնաճիւղին մէջ, ուր ստանձնած է ղեկավարական բազմաթիւ պաշտօններ, ներառեալ մասնաճիւղի ատենապետուհիի պաշտօնը։ Հայ Դատին եւ ընդհանրապէս Հայկական Դատին հանդէպ իր նուիրումը արմատաւորուած է Հ․Ե․Դ․-ի մէջ իր անդամակցութեան տարիներուն։ Հարոյեան շուրջ հինգ տասնամեակէ ի վեր անդամ է Փրաւիտենսի Հ․Յ․Դ․ «Քրիստափոր» կոմիտէութեան։ Նախկին ատենապետուհի, ան կազմակերպութեան մէջ առաջնահերթ դեր ունեցած է՝ ճեղքելով արգելքներ եւ դառնալով Հ․Յ․Դ․ Արեւելեան Ամերիկայի Կեդրոնական կոմիտէի առաջին կին անդամը։ Իր այս քայլով ան ներշնչման աղբիւր դարձած է բազմաթիւ ընկերուհիներու համար, որոնք յետագային հետեւած են իր օրինակին։ Որպէս Ռոտ Այլընտի Հայ Դատի յանձնախումբի նախագահ՝ Հարոյեան նահանգի քաղաքական ղեկավարութեան հետ հաստատած իր կապերուն շնորհիւ, Ռոտ Այլընտի Հայ Դատի յանձնախումբը վերածած է երկրի ամէնէն գործօն եւ ազդեցիկ մասնաճիւղերէն մէկուն։ Ան գլխաւորած է այն աշխատանքները, որոնց շնորհիւ 17 Մայիս 2012-ին Ռոտ Այլընտի Ներկայացուցիչներու տան կողմէ ընդունուած է բանաձեւ մը, որ Միացեալ Նահանգներու նախագահէն եւ Քոնկրէսէն կը պահանջէր ճանչնալ Արցախի Հանրապետութեան անկախութիւնը։ Ասիկա աշխարհի տարածքին պետական մարմինի մը կողմէ ընդունուած նմանօրինակ առաջին բանաձեւն էր, որ կը քաջալերէր Արցախի շարունակական զարգացումը՝ իբրեւ ազատ ու անկախ պետութիւն, եւ կը գնահատէր միջազգային ընտանիքին հետ անոր կառուցողական գործակցութիւնը՝ տարածաշրջանին մէջ մնայուն կարգաւորում մը հաստատելու նպատակով։ Հայ համայնքէն դուրս եւս, Հարոյեան պատասխանատու պաշտօններ վարած է Ռոտ Այլընտի ընդհանուր դատախազ Շելտըն Ուայթհաուզի (ներկայիս Միացեալ Նահանգներու ծերակուտական), ինչպէս նաեւ ընդհանուր դատախազ Փաթրիք Լինչի աշխատակազմերուն մէջ։ Փրաւիտենս քաղաքի գործադիր գրասենեակին մէջ ան եղած է համայնքային յարաբերութիւններու տնօրէն՝ քաղաքապետ Տէյվիտ Սիսիլինիի օրով, որ յետագային անդամ դարձած է Միացեալ Նահանգներու Ներկայացուցիչներու Տան։ Ան նոյն պաշտօնը վարած է նաեւ քաղաքապետ Էնճըլ Թաւերասի օրով, ապա նշանակուած է անոր աշխատակազմի փոխղեկավար։ Աւելի ուշ, քաղաքապետ Ճորճ Էլորցայի օրով, ստանձնած է թաղային կապերու պատասխանատուի պաշտօնը՝ յանցագործութիւններու կանխարգիլման եւ հսկողութեան ծրագիրին ծիրէն ներս։ Իր վերջին պաշտօնը եղած է համայնքային գործակցութեան տնօրէնի պաշտօնը՝ ընդհանուր դատախազ Փիթըր Ներոնհայի գրասենեակին մէջ։ Այսօր Ռոտ Այլընտի Հայ Դատի յանձնախումբը կը շարունակէ գործել այն ամուր հիմքերուն վրայ, զորս կառուցած է Անի Հարոյեան։ Նոյնքան մնայուն է նաեւ իր թողած օրինակը, Հ․Ե․Դ․-ի իր պատանեկան տարիներէն մինչեւ Հ․Յ․Դ․-ի մէջ շուրջ հինգ տասնամեակի անդամակցութիւնը։ Ան ցոյց տուած է, թէ Հայ Դատին նուիրումը եւ աւելի լայն համայնքին ծառայելը նոյն առաքելութեան երկու անբաժանելի երեսներն են։ Անոր ժառանգութիւնը կ՚ապրի Ռոտ Այլընտի իւրաքանչիւր հայուն մէջ, որ կը նախընտրէ յանձնառութիւն ստանձնել եւ առաջնորդողի դեր կատարել։ «Երախտաբարտ ենք Վահան Քարտաշեան մրցանակը յանձնելու Ռոտ Այլընտի հայ-ամերիկեան իրաւունքներու պաշտպանութեան ամէնէն հետեւողական ձայներէն մէկուն։ Հարոյեան երկար տարիներու նուիրեալ ջատագովն է Միացեալ Նահանգներու մէջ Հայ Դատի աշխատանքներուն, եւ հպարտ ենք Արեւելեան շրջանի բարձրագոյն պարգեւով գնահատելու անոր տասնամեակներու ծառայութիւնը », յայտարարեց Հայ Դատի Ա․Մ․Ն․ Արեւելեան շրջանի նախագահ տոքթ․ Արա Չալեան։ Միւս կողմէն, Հայ Դատի Ռոտ Այլընտի յանձնախումբի սիւներէն է Ստեփան Էլմասեան, որ երկարամեայ ծառայութիւն կատարած է։ Ան յիշատակելի նպաստ բերած է նահանգին մէջ հայ-ամերիկեան շահերու պաշտպանութեան եւ քաղաքացիական գործունէութեան ամրապնդման։ Երկար տարիներ վարելով յանձնախումբի ատենապետի պաշտօնը՝ ներկայիս ան կը ծառայէ իբրեւ փոխատենապետ։ Հայ Դատի աշխատանքներուն մէջ անոր մասնակցութիւնը կը ներառէ նաեւ Փրաւիտենսի Հ․Յ․Դ․ «Քրիստափոր» կոմիտէութեան մէջ իր գործունէութիւնը, ուր նախապէս վարած է փոխատենապետի եւ գանձապահի պաշտօնները։ Իր ամբողջ գործունէութեան ընթացքին Էլմասեան յանձնառու մնացած է յարգելու եւ շարունակելու իրմէ առաջ գործողներուն՝ յատկապէս Անի Հարոյեանի եւ հանգուցեալ Սթիւ Վարատեանի աշխատանքը՝ միաժամանակ Սթիւ Մեսրոպեանի հետ միասնաբար գործելով։ Ռոտ Այլընտի Հայ Դատի յանձնախումբին մէջ իր ղեկավարութեան օրով, Միացեալ Նահանգներու առաջին հայկական դրօշի բարձրացման արարողութիւնները տեղի ունեցած են Ռոտ Այլընտի մէջ։ Այս արարողութիւնները յետագային վերածուած են մնայուն աւանդութեան մը՝ ի պատիւ Քրանսթընի, Արեւելեան եւ, Հիւսիսային Փրաւիտենսի եւ Ուորուիքի հայ-ամերիկեան համայնքներու անդամներուն։ Ռոտ Այլընտի Հայ Դատի յանձնախումբին հայկական դրօշի հովանաւորութեան նախաձեռնութիւնն ալ նահանգին տարածքին ընդարձակած է այս ներկայութիւնը։ Աւելի քան երկու տասնամեակ առաջ հաստատուած այս ծրագիրին միջոցաւ Հայոց Ցեղասպանութեան յիշատակին հայկական դրօշը կը բարձրացուի Ռոտ Այլընտի քաղաքապետարաններուն մէջ։ Տեղական հարիւրաւոր հովանաւորներ մասնակցած են նախաձեռնութեան՝ իրենց սիրելիներուն յիշատակին կամ ի պատիւ անոնց, եւ վերջին քսան տարիներուն ընթացքին հաւաքուած գումարը հասած է շուրջ քառորդ միլիոն տոլարի։ Այս նախաձեռնութիւնը ներշնչած է նաեւ նմանօրինակ ծրագիրներու իրականացումը Ֆրեզնոյի (Քալիֆորնիա), Իլինոյսի եւ Մերիմեք Վելիի մէջ։ Էլմասեանի համար հայ-ամերիկեան իրաւունքներու պաշտպանութեան շարունակականութիւնը կը նշանակէ նաեւ ներդրում կատարել այն երիտասարդ սերունդին մէջ, որ պիտի ստանձնէ այդ աշխատանքին շարունակութիւնը։ Անկախ անկէ՝ Ուաշինկթընի մէջ դէպի Քոնկրէսի անդամներուն առաջնորդուող պատուիրակութիւններու գլխաւորելէն կամ երիտասարդ գործիչները իրենց համայնքներուն մէջ աշխոյժ դեր ստանձնելու քաջալերելէն, անոր ղեկավարութեան սկզբունքը միշտ եղած է յաջորդ սերունդը պատրաստել ջահը յանձն առնելու։ Փրաւիտենսի Հ․Ե․Դ․-Հ․Յ․Դ․ Երիտասարդական Միութեան շրջանաւարտ անդամ ըլլալով՝ ան 27 տարի ծառայած է իբրեւ պատանիներու եւ երէցներու խորհրդատու Փրաւիտենսի Հ․Ե․Դ․-ի «Վարանդեան» մասնաճիւղին։ Ան նաեւ 1981-էն ի վեր մարզած է «Վարանդեան»-ներու փափաքի եւ աթլեթիզմի խումբերը։ Մասնաճիւղին հանդէպ իր երկարամեայ նուիրումին իբրեւ գնահատանք՝ 2015-ին ան ընտրուած է Հ․Ե․Դ․-ի Ողիմպիական խաղերու թագաւոր։ Էլմասեան անդամակցած է նաեւ Փրաւիտենսի Հ․Օ․Մ․-ի «Անի» մասնաճիւղին եւ տեղւոյն Հ․Մ․Ը․Մ․-ի մասնաճիւղին։ Ան երկարամեայ գործունէութիւն ունեցած է նաեւ քաղաքի Սրբոց Վարդանանց եկեղեցւոյ կեանքին մէջ։ Ներկայիս ան կը ծառայէ եկեղեցւոյ իբրեւ գանձապահ, իսկ անցեալին անդամ եղած է հոգաբարձութեան։ Տասնամեակներ շարունակ իր մասնակցութիւնը բերած է նաեւ եկեղեցւոյ տարեկան խրախճանքներու եւ ճաշի փառատօններու յանձնախումբերուն աշխատանքներուն։ Համայնքին հանդէպ իր նուիրումը գնահատուած է նաեւ Սուրբ Սահակ եւ Մեսրոպ Հայց. Առաքելական եկեղեցւոյ տարեկան մարզական հանդիսութեան ընթացքին, երբ ան արժանացած է կեանքի վաստակի մրցանակի։ «Պատիւ ունինք 2026-ի Վահան Քարտաշեան մրցանակով մեծարելու Սթիվըն Էլմասեանը։ Սթիվը Ռոտ Այլընտի հայ-ամերիկեան համայնքին հիմնասիւններէն մէկը եղած է եւ Հայ դատի անսակարկելի պաշտպան մը։ Իր տասնամեակներու ղեկավար գործունէութենէն անդին, ան նաեւ եղած է դաստիարակ եւ օրինակելի անձնաւորութիւն հայ-ամերիկացի երիտասարդներու քանի մը սերունդներուն համար՝ օգնելով անոնց գտնելու համայնքային գործունէութեան եւ իրաւունքներու պաշտպանութեան իրենց սեփական ուղիները։ Այս Դեկտեմբերին անհամբերութեամբ կը սպասենք մեծարելու անոր ծառայութեան եւ նուիրումին ամբողջ կեանքի վաստակը», », յայտարարեց Հայ Դատի Արեւելեան Ա․Մ․Ն․-ի նախագահ Տոքթ. Արա Չալեան։ «։ Այս հանդիսութիւնը Հայ Դատի Ամերիկայի յանձնախումբի Արեւելեան շրջանի հիմնադրամին տարեկան դրամահաւաքի գլխաւոր ձեռնարկն է։ Հիմնադրամը 501(c)(3) կարգավիճակ ունեցող բարեսիրական եւ կրթական կազմակերպութիւն մըն է, որուն նպատակն է Արեւելեան Միացեալ Նահանգներու տարածքին զարգացնել իրաւունքներու պաշտպանութիւնը, կրթութիւնն ու քաղաքացիական մասնակցութիւնը։ Հանդիսութենէն գոյացած հասոյթը պիտի յատկացուի հանրային կապերու եւ իրազեկման նախաձեռնութիւններուն, կրթական ծրագիրներուն, ղեկավարներու պատրաստութեան եւ Հայ Դատի պաշտպանութեան աշխատանքներուն, որոնք կը կատարուին շրջանի տեղական Հայ Դատի յանձնախումբերու եւ գործունէութիւն ծաւալող անձերու ցանցին հետ համագործակցաբար։ Այս աշխատանքներուն նպատակն է զօրացնել հայ-ամերիկացիներու մասնակցութիւնը քաղաքացիական կեանքին եւ նպաստել այնպիսի քաղաքականութեան մը մշակման, որ կը խթանէ արդարութիւնը, հաշուետուութիւնը եւ հայ ժողովուրդին ապահով ապագան։ Տոմսերու, հովանաւորութեան եւ պանդոկի վերաբերեալ տեղեկութիւններու համար այցելել՝ givergy.us/ancaergala

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

Անի Հարոյեան Եւ Ստեփան Էլմասեան Պիտի Ստանան Վահան Քարտաշեան Մրցանակը՝ Հայ Դատի Արեւելեան Ա․Մ․Ն․-ի Յանձնախումբի Արեւելեան Շրջանի Տարեկան Հանդիսութեան Ընթացքին

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

ԱՅՑԵԼՈՒԹԻՒՆ՝ ԻԼԻՆՈՅԻ ԱՄԵՆԱՅՆ ՍՐԲՈՑ ԵԿԵՂԵՑԻ

Ընդդիմադիր Ուժերը Յայտարարեցին Համազգային Համախմբման Ձեւաւորումը

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է