ՎԻԵՆՆԱՅԻ ՀԱՆԴԻՊՈՒՄԸ ԲԱՆԱԿՑՈՒԹԻՒՆՆԵՐՈՒ ՎԵՐՍԿՍՄԱՆ ԱԶԴԱՆՇԱՆ ՉԷ

0 0
Read Time:2 Minute, 38 Second

Ա․Ա․

Ուրբաթ, Մարտ 29-ին Աւստրիոյ մայրաքաղաք Վիեննայի մէջ պիտի կայանայ Հայաստանի վարչապետ Նիկոլ Փաշինեանի եւ Ատրպէյճանի նախագահ Իլհամ Ալիեւի միջեւ պաշտօնական առաջին հանդիպումը՝ նկատի ունենալով որ նախկին հանդիպումները պաշտօնական բնոյթ չունէին։
Փաշինեան եւ Ալիեւ Վիեննա կ՛ուղղուին՝ Երեւանի, Ստեփանակերտի եւ Պաքուի մէջ կատարուած յայտարարութիւններու մէջ շեշտուած կեցուածքներու ենթահողի մը վրայ, ուր սպասելիօրէն ու հասկնալի պատճառներով իրարու հակադրուող դիրքորոշումները տիրական են։
Փաշինեան՝ թէ՛ Երեւանի եւ թէ՛ Ստեփանակերտի մէջ յայտարարեց, որ Արցախի բանակցութիւններուն Ստեփանակերտի իշխանութիւններուն ներկայացուցիչներուն մասնակցութիւնը անհրաժեշտ է, որպէսզի բանակցութիւններուն արդիւնաւէտութիւնը ապահովուի։ Յղում կատարելով 1994-ին ամրագրուած որոշման՝ Արցախը իբրեւ տագնապի օրինական կողմ ճանչնալու, Փաշինեան Ստեփանակերտի ներկայացուցիչներուն բանակցութիւններուն սեղան վերադարձը կարեւորեց ու նաեւ շեշտեց, որ Վիեննա կ՛ուղղուի՝ այս հարցին շուրջ լսելու Ալիեւի տեսակէտը։ Ան յստակացուց, որ այս պահանջէն ետդարձ չկայ, թէեւ արտաքին գործոց նախարար Զոհրապ Մնացականեան առաւել դիւանագիտական մօտեցմամբ մը յայտարարեց, որ ասիկա նախապայման մը չէ, այլ սկզբունքային խնդիր մը։
Ալիեւ՝ թէ՛ Պաքուի մէջ Նովրուզի տօնին առիթով ատրպէյճանցիներուն ուղղած իր խօսքին մէջ եւ թէ դիւանագէտներու հետ իր հանդիպումներուն ընթացքին շեշտեց, որ Ղարաբաղի հայերուն ներկայացուցիչներուն բանակցութիւններուն մասնակցութիւնը անընդունելի է՝ վկայակոչելով նաեւ ԵԱՀԿ Մինսքի խումբի համանախագահներուն վերջին յայտարարութիւնը, որուն մէջ միջնորդները կը շեշտէին, որ բանակցութիւններուն մասնակիցներուն տարողութեան որեւէ փոփոխութիւն պէտք է կատարուի տագնապին առնչակից բոլոր կողմերուն հաւանութեամբ։ Այսինքն՝ երբ Ատրպէյճան ո՛չ կ՛ըսէ, ուրեմն կարելի չէ Ղարաբաղի հայերուն ներկայացուցիչները բանակցութիւններուն մասնակից դարձնել։
Աւելի՛ն, Հայաստանի վարչապետը Ազգային Ժողովին մէջ պատգամաւորներուն հարցումներուն պատասխանելով՝ ընդգծեց, որ Արցախի տագնապին բանակցութիւններուն նկատմամբ իր դիրքորոշումը անփոփոխ է, եւ ինք Վիեննա պիտի մեկնի՝ Ստեփանակերտի ներկայացուցիչներուն բանակցութիւններու սեղանին շուրջ աթոռի ապահովման օրակարգով։ «Ինչ որ յայտարարեցի Ստեփանակերտի մէջ՝ Հայաստանի եւ Արցախի Ազգային Ապահովութեան Խորհուրդներուն միացեալ նիստին ընթացքին, այն օրակարգն է, զոր մեզի հետ պիտի տանինք Վիեննա եւ ըստ էութեան այդ է ենթահողը, որուն վրայ պիտի հիմնուինք բանակցութիւններուն յետագայ հոլովոյթին ընթացքին», յայտարարեց Փաշինեան։
Այս տուեալներուն լոյսին տակ՝ Վիեննայի հանդիպումը ըստ երեւոյթին պարզապէս տեսակէտներու եւ կեցուածքներու յստակեցման առիթ մը պիտի ըլլայ, որովհետեւ արդէն իսկ հակոտնեայ դիրքորոշումներու մթնոլորտը տիրական է եւ ահա բանակցութիւններուն Ստեփանակերտի մասնակցութեան Երեւանի իշխանութիւններուն պահանջը կու գայ առաւել շեշտադրելու բեւեռացումը։
Անկախ այս իրավիճակէն, բարձրագոյն մակարդակի վրայ նման հանդիպումէ մը ակնկալութիւններուն շարքին է նաեւ կողմերուն պատասխանատուութիւններուն եւ պարտաւորութիւններուն ծիրերուն եւ տարողութիւններուն յստակացումը, որովհետեւ տարիներէ ի վեր միայն դիւանագիտական հանդիպումներու հունաւորում ստացած տեսակցութիւնները եւ հանդիպումները ալ անիմաստ դարձած էին, մանաւանդ որ հիմնական ոչ մէկ փոփոխութիւն կամ յառաջընթաց արձանագրուած է։ Պաքու կը մնայ անզիջող՝ Ատրպէյճանի հողային ամբողջականութեան սկզբունքէն, իսկ նախապէս Երեւան յաճախ կը բաւարարուէր յայտարարելով, որ յանձնառու է Լեռնային Ղարաբաղի տագնապը խաղաղ միջոցներով լուծելու ԵԱՀԿ Մինսքի խումբի մօտեցման։ Իսկ Մինսքի խումբի համանախագահներն ալ վախվխելով կը փորձէին յիշեցնել, թէ ստեղծուած սթաթիւս քոն այսպէս չի կրնար շարունակուիլ։
Հիմա Վիեննայի հանդիպումը ինչ պիտի փոխէ տեղքայլի մէջ գտնուող բանակցութիւններուն ընթացքին մէջ։ Փաշինեանի պահանջը մերժուած է Ալիեւի կողմէ, իսկ Փաշինեան կը պնդէ, որ իր պահանջէն ետդարձ չկայ։
Ուրեմն՝ ակնարկները սեւեռած Վիեննայի, պէտք է հարց տալ, որ Արցախահայութիւնը իր հայրենիքին ու իր ապագային առնչուած բանակցութիւններէն հեռու պահելու նախկին տարիներու սխալին սրբագրումը այսօր իրարմէ առաւել պիտի հեռացնէ՞ հայկական եւ ատրպէյճանական արդէն իսկ հակադիր կեցուածքները։ Ենթադրելով, որ Ալիեւ ոչ իսկ պիտի ուզէ այս խնդրին մասին տեսակէտներու փոխանակում կատարել, ամբողջ հայութեան համար կենսականը եւ էականը պէտք է շեշտել։ Արցախի տագնապին լուծման վերաբերեալ հայկական դիրքորոշումը համահայկական մէկ ու միացեալ կեցուածք ու քաղաքականութեան ուղեգիծ պէտք է ըլլայ։ Այսպէ՛ս կարելի է դէմ դնել բոլոր տեսակի դաւերուն եւ որոգայթներուն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles