0
0
ԵՐԵՒԱՆ, ՍԱՆ ՓԱՈՒԼՕ.- Երկար ժամանակէ ի վեր, թուրք եւ ազերի քաղաքագէտներ գործի լծուած էին եւ լոեպիինկի ճամբով, սկսած էին հակահայ խմբաւորումներ հիմնել ու գործի լծել: Նոյնիսկ Ատրպէյճանի Արտաքին Գործոց նախարար Էլմար Մամետիարով, ժամանելով, տեսակցութիւններ ունեցաւ Պրազիլիոյ պատուիրակութեան հետ, որոնք կը գլխաւորէին երեսփոխաններ Նելսըն Փելեկրինոն եւ Քլաուտիօ Քաժան:
Հետաքրքրականը այն է թէ, վերոյիշեալ անձնաւորութիւնները, կը պատկանին տարբեր կուսակցութիւններու: Փելեկրինոն իշխող կուսակցութեան անդամ է, իսկ Քաժա` ընդդիմադիր դեմոկրատական:
Պրազիլի հայ համայնքի “Էսթաքաօ Արմենիա“ կայքէջի յօդուածագիր փրոֆ. Ճէյմս Օննիկ Թամճեան յայտնեց, թէ Փելլեկրինօ եւ Քլաուտիօ Քաժա թրքական լոպիիստներ են: “Տարօրինակ է, որ երկու հակառակորդ կուսակցութիւններուն մէջ այս հարցով միասնաբար կը գործեն“, յայտնեց Թամճեան: Արդարեւ, այս երկու երեսփոխանները խոստացած են երկրի խորհրդարանի արտաքին յարաբերութիւններու եւ ազգային պաշտպանութեան յանձնախումբին ներկայացնել դիմում մը, որուն միջոցով կ՛առաջարկեն Պրազիլի աջակցութիւնը` Ատրպէյճանին եւ կը պահանջեն հայկական զօրքերու նահանջը Արցախի տարբեր շրջաններէն` վկայակոչելով Մ.Ա.Կ.-ի որոշ բանաձեւեր:
Պրազիլահայ համայնքը, դիմելով հետեւողական արշաւի, կրցաւ կասեցնել այս բանաձեւերը եւ մթնոլորտ ստեղծեց Պաքուի տրամադրած նիւթական օժանդակութիւններով տարուած, այս երկու քաղաքական գործիչներուն եւ անոնց քայլերուն դէմ:
