Ուխտավայրը

0 0
Read Time:1 Minute, 12 Second

Ազգային առումով եւ ապագայի հեռանկարով գօտեպնդիչ է որոշումը։ Հայաստանի անկախ պետութեան հիմնադիր Արամ Մանուկեանի յուշարձանը պիտի կառուցուի եւ տեղադրուի Երեւանի կեդրոնը՝ Հանրապետութիւն հրապարակի մուտքին։

Շատ քիչ են այն ժողովուրդները, որոնք իրենց պատմութեան մէջ հաւաքական լինելութեան ամենէն ճակատագրական պահուն իրենց ծոցէն ծնին հարազատ զաւակ, որ փրկէ թէ ազգը եւ թէ հայրենիքը։ Մեր ժողովուրդը երիցս բախտաւոր է, նաեւ հպարտ եւ երախտաւոր, որ իր չարչարանքներով լի ծոցէն ծնաւ Արամ Մանուկեանը։

Արամը մեր ժողովուրդին հարազատ ծնունդ էր՝ միսը միսէն ու ոսկրը ոսկրէն։ Արամը մեր ազգային ազատագրական պայքարի մարմնացումն էր։ Արամը մեր յեղափոխական խոյանքներու դիմադրականութիւնն էր։ Արամը Երկիր Հայաստանի շրջաններու ինքնապաշտպանութեան ոգին էր։ Արամը հայութեան մնացորդացը ոչնչացնելու նպատակով գերազանց ուժերով արշաւող թրքական բանակը հարուածող բազուկն էր։ Վեց դարերու պետականազուրկ գոյութենէ ետք, մեր ազգային ու անկախ պետութիւնը վերահաստատող կերտիչն էր Արամը։

Այս բոլորի հետ, Արամը Երեւանի պահապանն էր եւ Արարատեան դաշտի փրկարարը։

Արամի յուշարձանը պիտի բարձրանայ Երեւանի կեդրոնը, որպէսզի ի լուր եւ ի տես բոլորին մեր ժողովուրդը, անսալով Արամին կոչին, յայտարարէ.- «Երեւանը չենք դատարկի մինչեւ մեր վերջին կաթիլ արիւնը։» Այդ վճռակամութեամբ, իր լուր եւ ի տես բոլորին, հետեւելով Արամին մեր ժողովուրդը պիտի յայտարարէ նաեւ.- «Հայրենի ազատագրուած հողերը չենք դատարկի մինչեւ մեր վերջին կաթիլ արիւնը։»

Երբ Արամի յուշարձանը խոյանայ շուտով վեր, Արամի ոգին եւ հայեացքը պիտի սեւերին նաեւ դէպի արեւմուտք՝ դէպի Երկիր, յուշելով բոլորին թէ հայրենի բռնագրաւուած հողերը պիտի ազատագրուին։ Որովհետեւ, Արամը նաեւ յոյսի եւ կամքի աղբիւրն է ամբողջական Հայաստանի։

Այս գաղափարներուն եւ իղձերուն, մեր անկատար տենչերուն ուխտավայրը պիտի ըլլայ Արամի կոթողը։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

2 thoughts on “Ուխտավայրը

  1. Ազգերու, ժողովուրդներու պատմութեան մէջ երբեմն կը պատահի որ մէկ անձ կարենայ ճակատագրական դեր խաղալ այդ նույն ժողովուրդի պատմութեանը մէջ։ Առանց Արամ Մանուկեանի բացառիկ դերակատարութեանը այսօր թերեւս Հայաստանը գոյութիւն չ՝ունենար։

  2. Բարեւ հասկցողին, ցաւ ի սիրտ շատեր չեն հասկցած եւ չեն ուզէր հասկնալ, այե ժամանակ Օլիկարխային դրութիւն գոյութիւն չունէր ինչպէս որ առ այժմ գոյութիւն ունի։
    Որքան ատեն որ այս աւազակապետական դրութիւնը կը շարունակուի կարելի չէ առողջ Հայրինիք կերտել եւ հիմնել։

Leave a Reply

Your email address will not be published. Required fields are marked *

Social profiles