0
0
Կազմակերպութեամբ Նիւ Եորքի Սուրբ Գրիգոր Լուսաւորիչ Մայր Եկեղեցւոյ Մշակութային Յանձնախումբին, Կիրակի, 15 Սեպտեմբեր, 2013-ին, տեղի ունեցաւ վերջերս հրատարակուած “Մէկ Ազգ Մէկ Եկեղեցի“ պատկերագրքի ներկայացումը:
Պատկերագիրքը ներկայացուց գանատաբնակ ծանօթ լուսանկարիչ եւ հեղինակ` Հրայր Բազէ Խաչերեան:
Բացման խօսքը կատարեց Եկեղեցւոյ Հոգեւոր Հովիւ` Արժ. Տ. Մեսրոպ Քհնյ. Լագիսեան, որ մանրամասնօրէն ներկայացուց օրուան բանախօսը: Տէր Մեսրոպ ըսաւ. “Հրայր Բազէ անցնող 20 տարիներուն բազմիցս այցելած է Հայաստան, Արցախ, Պատմական Հայաստան, ինչպէս նաեւ Սփիւռքի աւելի քան 40 երկիրներ եւ քաղաքներ նկարահանելով տեղւոյն հայկական եկեղեցիները, մեծապէս կը գնահատենք Հրայրի այս կոթողական գործը եւ իրեն կը մաղթենք նորանոր յաջողութիւններ“:
Հրայր Բազէ ցուցադրեց իր լուսանկարչական ոսպնեակէն առնուած գեղեցիկ պատկերներ, եւ լայն բացատրութիւններ տուաւ իր հետաքրքրական եւ արկածախնդրական ճամբորդութեանց մասին, որոնք ամբողջութեամբ կը ներկայացնեն մեր անցեալի եւ ներկայի հոգեւոր հարստութիւնները:
“Այն ուղեւորութիւնները որոնք հասան այս գիրքին իրագործումն են ուխտի մը որ կատարեցի, երբ կը պայքարէի քաղցկեղի դէմ: Երկրորդ կեանքի մը պարգեւը ստանալով, յաջորդող երկու տասնամեակներուն 1993-էն 2013, ճամբորդեցի համայն աշխարհի տարածքին եւ նկարեցի Հայոց եկեղեցիները, Հիւսիսային եւ Հարաւային Ամերիկաներուն մէջ, Միջին Արեւելքի եւ Ծայրագոյն Արեւելքի մէջ, Եւրոպայի ու Ափրիկէի ցամաքամասերու վրայ: Ահա արդիւնքը այդ բոլորին“:
Վերջաւորութեան ներկաներէն շատեր մակագրուած գիրքերէն օրինակներ իրենց հետ առնելով, գոհունակ սրտով մեկնեցան սրահէն:
