Փրաւիտընս․- «Մուրատ» Ազգային Վարժարանը Նշեց Ամանորի Եւ Սուրբ Ծննդեան Տօները

1 0
Read Time:2 Minute, 23 Second
Լուսանկարներ՝ Edward Nasr եւ Լալա Աթթարեան

 

Փրաւիտընս (Ռոտ Այլընտ) – Շաբաթ, Յունուար 7-ին, Սրբոց Վարդանանց Եկեղեցւոյ «Մուրատ» Ազգային Շաբաթօրեայ Վարժարանը, աննախընթաց կերպով նշեց Ամանորի եւ Սուրբ Ծննդեան տօները։

Առաւօտեան, աշակերտութիւնը, ուսուցչական կազմն ու հիւրերը մասնակցեցան յատուկ Սուրբ Արարողութեան եւ ստացան Սուրբ Հաղորդութիւն։ Եկեղեցիէն անմիջապէս ետք, վարժարանիս աշակերտներն ու աւելի քան 120 հիւրեր բարձրացան «Արամեան» սրահ, ուր տեղի ունեցաւ ճաշի ճոխ հիւրասիրութիւն եւ Կաղանդի հանդէսի ներկայացում։ Ներկայ էին Եկեղեցւոյ Հոգաբարձութեան անդամներ, երեսփոխաններ, քոյր միութիւններու ներկայացուցիչներ, ծնողներ, ընտանեկան պարագաներ եւ հիւրեր։

Օրուան հանդիսավարներն էին «Սիամանթօ» լսարան աշակերտներէն՝ Կարօ Դարբինեան եւ Պետիկ Զէյթունեան։ Բարի գալուստի խօսքերէն ետք, Տէր Գաբրիէլ Քահանայ Նազարեան իր ողջոյնի խօսքը փոխանցեց եւ բացման աղօթքը կատարեց։

Խօսք առաւ նաեւ «Մուրատ» Ազգային Վարժարանի Խնամակալ Մարմնի ատենապետ՝ Յակոբ Խաչատուրեան։ Ան նշեց, թէ այս տարի կը տօնախմբուի Սուրբ Ներսէս Շնորհալիի 850-ամեակը՝ «Յիսուս Քրիստոսի Սուրբ Ծննդեան եւ Շնորհալիի ողորմութեամբ ծածկուած, կ՛աղօթենք փարձեալն զԱստուած, որ մեր ժողովուրդի ճակատագրական այս դժուար պայմաններուն ընդմէջէն, պահպանէ Հայ Ազգը՝ երեւելի եւ աներեւոյթ թշնամիներէն․․․պահպանէ մեր մայրենի հողերը, Հայաստան եւ նա մանաւանդ Արցախը․․․»։ Խաչատուրեան շնորհակալութիւն յայտնեց բոլոր ներկաներուն եւ բարձր գնահատեց Վարժարանի տնօրէնութիւնն ու ուսուցչական կազմը, աշակերտներն ու ի մասնաւորի՝ ծնողական միութիւնը։

Տնօրէնութեան կողմէ խօսք առաւ համա-տնօրէնուհի՝ Տիկին Լալա Աթթարեան։ Շնորհաւորելով բոլորին Նոր Տարին եւ Սուրբ Ծնունդը, մաղթեց որ 2023 թուականը բարեբեր օրեր եւ խաղաղութիւն պարգեւէ հայութեան, ի մասնաւորի Արցախին։ «Արցախի մանուկներուն կողքին ենք, որոնց Ամանորի մաղթանքներն ու երազանքները ցաւօք չիրականացան այս տարի», նշեց ան։

Աթթարեան յատկապէս գնահատեց ծնողներուն եւ ուսուցիչներուն դերը՝ հայապահպանման աշխատանքին ծիրէն ներս․ «Բոլորիս պարտականութիւնն է վերականգնել մեր Սփիւռքը, վառ պահելու համար մեր դպրոցը, լեզուն, կրօնքն ու մշակոյթը՝ մանաւանդ երբ արտաքին ազդակները օր ըստ օրէ կը խոչընդոտեն հայապահպանման հսկայ աշխատանքին»։ Ան  իր երախտագիտութեան խօսքը ուղղեց բոլոր անոնց որոնք ամէն կերպով օգտակար եղան, որպէսզի Սուրբ Ծննդեան այս հանդիսութիւնը յաջողութեամբ իրականանայ։

Հայ Օգնութեան Միութեան Արեւելեան Ա․Մ․Ն․-ի Շրջանային Վարչութեան կողմէ յատուկ նուէրներ ղրկուած էին ուսուցչական կազմին եւ աշակերտութեան համար։ Փրուիտընսի «Արաքս» մասնաճիւղի ատենապետուհի՝ Մանուշակ Գրիգորեան, Հ․Օ․Մ․-ի կողմէ նուէրները յանձնեց ուսուցիչներուն։

Ընթացքին, Պետիկ Զէյթունեան եւ Կարօ Դարբինեան արտասանեցին «Հայրենի Լեզու» բանաստեղծութիւնը, որմէ ետք բարձր դասարանի աշակերտները շատ գեղեցիկ ձեւով ներկայացուցին «Մատուռ» ծրագիրը։ Սոյն ծրագիրը պատրաստուած էր Հայ Մշակոյթի ամսուան առթիւ։

Ռաֆֆի Ռաշտունիի գլխաւորութեամբ, բոլոր աշակերտները ներկայացուցին երգերու շարան մը։ Դաշնամուրի, սաքսոֆոնի եւ թմբուկի ընկերակցութեամբ իրենց մասնակցութիւնը բերին Նայիրի Քորիվօ,  Մարտիրոս Գարազեան, Նատիա Քէշիճեան եւ Կարէն Զէյթունեան։

Աշակերտութիւնն ու ներկաները մեծ ոգեւորութեամբ դիմաւորեցին Կաղան Պապան «Զանգակներ» եւ «Կաղանդ Պապա» երգերով։

Նուէրներու բաշխումէն ետք Ծնողական Միութեան ատենապետուհի՝ Տիկին Անի Տէտէեան յայտարարեց վիճակախաղերու եւ աճուրդի արդիւնքները։

Համատնօրէնուհի՝ Տիկին Ճուն Մանկասարեան փակման խօսքին մէջ իր գնահատանքը յայտնեց բոլոր ծնողներուն եւ մեծ հայրեր-մայրերուն եւ ընտանիքներուն, որոնք իրենց պարտաւորութեան տէր՝ ոչ մէկ ճիգ կը խնայեն, որպէսզի իրենց զաւակները Հայկական վարժարան յաճախեն։ Մանկասարեան շնորհակալական յատուկ խօսքեր փոխանցեց աշակերտութեան եւ ծնողական միութեան անդամներուն՝ Տիկին Անի Տէտէեանին, Ալէնուշ Յակոբեանին, Մէկըն Խաչատուրեանին, եւ Մէլինէ Զէյթունեանին, որոնց աշխատանքի արդիւնք էր կատարուած ձեռնարկը։

Կապ՝ mouradschool1934@gmail.com

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles