ՄԵՐ ՔԱՂՑՐԻԿ ԱՒԱՆ՝ ՔԵՍԱՊ ԱՆՆՄԱՆ

0 0
Read Time:2 Minute, 56 Second

 

Kassab20th

 

 

Գարեգին Քահանայ Պետուրեան

Օրէնճ Քաունթի, Ա.Մ. Ն․

Ողջո~յն մեր պատուաւոր հարազատներուն,

Ողջո~յն մեր քաջ ժողովուրդին,

Քսանմէկերորդ դարուն, երբ աշխարհ կ՚ապրի իր արդիականացման ամենակարեւոր շրջանը, միւս կողմէ սակայն մարդիկ տակաւին այս նոյն աշխարհին մէջ ահրելի փորձառութիւնը կ՚ունենան տեղահանութեան, սպառնալիքի ու անարդարութեան։

Այսօր, այս վայրկեանին, ամբողջ աշխարհի դիմաց, ակնյայտ ու առանց դոյզն հաշիւի, մեր սիրեցեալ ծննդավայր Քեսապը, համայն հայութեան սիրտը կը ճմլէ, հոգին կ՚ընկճէ, արիւնը կը ճայթքեցնէ, որովհետեւ ան զոհն է մարդկային վայրագութեան, որ կ՚իրագործոի նորէն թուրքին կողմէ։ Նոյնիսկ հարիւր տարին չթեւակոխած, տեղահանութեան ու աքսորի սարսափը պատեց մեր անմեղ ժողովուրդը, մեր մանուկներն ու մայրերը, հայրերն ու քոյրերը, եղբայրներն ու մեծ ծնողները… մէկ խօսքով Քեսապահայերը։ Այն Քեսապը, որ դարաւոր Կիլիկեան թագաւորութեան ցայտուն օրինակն է։ Օրինակն է կ՚ըսեմ, որովհետեւ պիտի մնայ նոյն օրինակը, որ մեր արեան ու ջիղերուն մէջ ներարկեց մարդ արարածի, քրիստոնեայի ու հայու վեհագոյն նկարագիրը։ Քեսապը երբ մեզ ծնաւ, մեր մէջ ծնունդ տուաւ այն ոգին, որ մեզ կը սնուցանէ ամէն օր։

Քեսապցին, հաւատարիմ իր հայրենական ու դարաւոր հողին, այդ հողաշերտը վերածեց հայտրոփ ու շէն աւանի, ապահով հենարանի, ուր սերունդներ ըմբոշխնեցին ու տարածեցին աշխարհով բոլոր։ Քեսապը հայկական իրականութեան մէջ մեծ կարեւորութիւն ունեցող աւան մըն է, որուն զաւակները ուր որ կը գտնուին կամ գտնուած են, միշտ հետամուտ եղած են մարդկային արժէքները պահելու, քրիստոնեայի ու հայու պատիւը բարձր պահելու եւ ըլլալու ազնիւ ժողովուրդ։ Ա՛յս է հայուն նկարագիրը, ուր որ ալ ծնի, երբ որ ալ ծնի։

Հարիւրամեակի նախօրեակին, թուրքը անգամ մը եւս իր բարբարոսութիւնն ու նախնիներէն աւանդ թողուած վայրագութիւնը չկրցաւ կշռել ու զսպել։ Բայց մենք, որպէս հայ ժողովուրդ, ցեղասպանութեան հարիւրամեակի սեմին, մեր նախնիներէն մնացած աւանդը կը պահենք ու պիտի պահենք, մեր հայու ազնիւ ու քաջ նկարագրով պիտի ապրինք ու ցոյց տանք համայն մարդկութեան, թէ մենք կը սիրենք ապրիլ, կ՚ուզենք ապրիլ ու պէտք է որ ապրինք։ Հայու իրաւունքն է եւս ապրիլ, որովհետեւ հայը ինքն իրեն համար չ՚ապրիր միայն, այլ ան համայն մարդկութեան օրինակ կը հանդիսանայ արժեւորելու աստուածատուր այս կեանքը։

Դարեր շարունակ Քեսապը հայութեան ու մարդկութեան տուաւ այնպիսին, որ այստեղ արձանագրելու կարիքը չեմ զգար, բայց վստահ ըլլանք, գօտեպնդուինք ու իրար քաջալերելով զօրանանք, որովհետեւ Քեսապը իր առաքելութեան հաւատարիմ, իր հողին ու ջուրին, օդին ու շունչին մաքրութեամբ պիտի տակաւին բաբախէ որպէս զօրաւոր զարկերակներէն մէկը հայութեան։ Իր անառիկ լեռները, խիտ անտառները, զուլալ աղբիւրները, խորհրդաւոր ձորերը, գեղատեսիլ ծովեզերքը, վտիտ հորիզոնը,  բերքառատ արտերը, աղօթաբիւր եկեղեցիները, քրիստոնէաշունչ բնակարանները, մարդկութիւն ու գիտութիւն ջամբող վարժարաններն ու կեդրոնները, պիտի մնան իւրաքանչիւր հայու կեդրոն ու ապահով օրրան։

Աստուծոյ վախը չունեցողները, իրենց աստուծոյ անունով կրնան սպաննել, քանդել, այդ մէկը իրենց նկարագիրն է ու սորվածը, սակայն հայը կը շինէ, հայը հայուն ձեռքէն բռնելով միասնաբար կը կերտէ ու կ՚ապրի։

Քաջալերուինք ու սրտապնդուինք, որպէսզի մենք եւս քաջալերենք ու գօտեպնդենք մեր հարազատները, յոյս ու կամք ներշնչենք իրենց, իւրաքանչիւրս օգտակար ըլլանք մեր ձեւերով ու միջոցներով, եւ աղօթենք առ Աստուած, որ համբերութիւն, հաւատք եւ ուժ պարգեւէ Քեսապահայութեան, ինչպէս նաեւ Սուրիոյ տարածքին գտնուող իւրաքանչիւր հայու, որոնք անցնող երեք տարիներուն անբացատրելի դժուարութիւններու հանդիպեցան, սակայն յաղթեցին ու պիտի յաղթեն, իրենց յաղթանակը հայութեան յաղթանակն է։

Քեսապցի իւրաքանչիւր ընտանիք, որ այսօր տեղահանութեան իրողութեան մէջ է, իր պատուարժան ոգիով ու արդար իրաւունքով կը սպասէ այն լուսաւոր օրուան, որ պիտի ծագի Քեսապի երկնակամարին վրայ։

Վարձքը կատար բոլոր անոնց, որոնք ամէն կերպով օգտակար կ՚ըլլան ու պիտի ըլլան քեսապահայութեան, վարձքը կատար Լաթաքիոյ հայութեան որ գրկաբաց ընդունեց մեր հարազատները, ինչպէս նաեւ տեղացի ժողովուրդին։ Վարձքը կատար սիւրիահայ շտապ օգնութեան եւ սփիւռքեան միութիւններուն, մարմիններուն ու կազմակերպութիւններուն, որոնք ամէն միջոցներով իրենց ներդրումը կ՚ունենան Քեսապի արդար դատին ու ժողովուրդի բարեկեցութեան։

Դարաւոր ու  օրհնեալ հողդ թող քեզի վերադառնայ, ո՜վ սիրուն մեր աւան…

Քաջ ու պատուաւոր ժողովուրդդ թող քեզի միանայ, ո՜վ քաղցրիկ իմ ծննդավայր։

 

 

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles