0
0
Թաւրիզի Հ.Օ.Մ.ի մասնաճիւղի «Տաթեւ» պարախումբը, իր անդրանիկ բացառիկ ելոյթով հմայեց տեղւոյն մշակութասէր հայորդիերը:
Դեկտեմբեր 8-ի երեկոյեան, Ազգային Առաջնորդարանի «Համազասպ Ոսկանեան» սրահին մէջ, տեղի ունեցաւ այս ելոյթը:
Ատրպատականի Հայոց Թեմի հովանաւորութեամբ տեղի ունեցած սոյն պա¬րային համոյթին կը նախագահէր Առաջնորդ Սրբազանը, իր կողքին ունենալով Ազգային իշխանութեան ներկայացուցիչները,Հ.Օ.Մ.ի անդամուհիները, Միութիւններու եւ Կազմակերպութիւններու ներկայացուցիչները, ինչպէս նաեւ սրահը լեցուցած Թաւրիզահայերը:
Հայկական, ռուսական, յունական, արաբական եւ այլ ժողովուրդներու ազ¬գային պարերու ելոյթներուն շարքին գերակշռող տեղ գրաւած էր բնականօրէն հայկական պարերու տարբեր տեսակներուն ներկայացումը բեմին վրայ:
Տարիքային երեք խմբաւորումներու կամ դասարաններու բաժնուած 50 հո-գինոց «Տաթեւ» պարախումբը, գեղարուեստական ղեկավարութեամբ Կարինէ Մանուչերեան-Սուքիասեանի, երկուքուկէս տարի առաջ Թաւրիզի մէջ հիմնադրուեցաւ, Թեմի ազգային իշխանութեան եւ Հ.Օ.Մ.ի Թաւրիզի Մասնաճիւղի Վարչութեան հովանաւորութեամբ, ընդհանուր պա¬տասխանատու ունենալով Հ.Օ.Մ.ի նուիրեալ անդամուհի՝ Նայիրի Դիլանեանը: Խումբը անդամագրած էր չորսէն մինչեւ 30 տարեկան անդամներ, իւրաքանչիւրին յատուկ պարերու ուսուցում կատարելով:
Պարախումբին բոլոր անդամներն ալ կամաւոր, սկսնակ եւ նորավարժ ըլլալով հանդերձ, յարատեւ փորձերով եւ հետեւողութեամբ իրենց գեղարուեստական ղեկավարի եւ փորձավարներու ցուցմունքին, կանոնաւորապէս նախապատրաստուած էին որակաւոր ելոյթին: Մանուկներուն պարերն իսկ փորձառու պարողներու տպաւորութիւն կը թողէին, որոնք կը նախապատրաստուին ապագայ կատարելագործումի: Իսկ պատանիներուն եւ երիտասարդ պարողներուն պարագայիմ, արդէն զգալի էր սէրը՝ պարարուեստի հանդէպ, ինչպէս նաեւ գիտակցութիւնը՝ մշակութային իրագործում կատարելու Թաւրիզի մէջ: 
Մէկ պարէն միւսը անցումային պահերը կը լեցուէին Թաւրիզահայ տաղանդաշատ ասմունքող՝ Նայիրի Դիլանեանի բանաստեղծական ելոյթներով, ինչպէս նաեւ պարախումբին ստեղծման մասին մօտաւոր անցեալի պատմութեան շուրջ տեղեկատուական բացատրութիւններով:
Նայիրի Դիլանեան բացատրեց այն կարեւոր իրողութիւնը, թէ՝ սոյն պարախումբին ստեղծումը անհրաժեշտութիւն մը եւ պարտք մըն էր Թաւրիզահայ գաղութին, երբ տակաւին գոյութիւն ունին նուիրեալ անձեր: 
Առաջնորդ Սրբազանը իր հայրական օրհնանքի խօսքը ուղղելով ներկաներուն, սպասուած մշակութային վայելքի նախաքայլ համարեց երեկոյի ընթացքին արձանագրուած յաջողութիւնը: Սրբազանը օրինակ առնելով պարարուեստը, ուր ներդաշնակութիւնն ու իւրաքանչիւրին համար իր տեղին իմացութիւնը մեծ նշանակութիւն ունին ընդհանուր խումբին յաջողութեան համար, նոյնը նաեւ հա-ւաքական եւ անհատական կեանքին համար կարեւոր նկատեց, յատկապէս մեր «մեծ խումբին»՝ մեր ազգի հաւաքական աշխատանքներուն յաջողութեան իմաստով:
Առաջնորդ Սրբազանը իր եզրափակիչ խօսքով շեշտեց կամքի զօրութեան արդիւնք սոյն աշխատանքը. «Հայ մշակոյթի օրրան եղած է Թաւրիզը: Իսկ մշակոյթը այստեղ չէ՛ մարած, անիկա միայն մոխիրներուն տակ պահուած կրակ էր, որ վերստին դուրս եկաւ իր վառ գոյնով»:
