0
0
Ըստ երեւոյթին, Հայաստանի ներքին քաղաքական կեանքը հետզհետէ աւելի “անշնչելի“ միջավայր մը կը ստեղծէ: Այսպէս, քաղաքական մութ հաշիւներու լոյսին տակ, վերջերս Հ.Հ. նախկին Արտաքին Գործոց նախարար եւ անոր “Սիվիլիթաս“ հիմնադրամի հիմնադիր Վարդան Օսկանեանի դէմ յարուցուած է քրէական դատ:
Ազգային Անվտանգութեան Ծառայութիւնը, յատուկ հաղորդագրութեամբ մը, տարածած է այս ցնցիչ եւ մտահոգիչ լուրը: “Սիվիլիթաս“ հիմնարկը, իր կարգին հաղորդագրութիւն մը լոյս ընծայելով, տեղեկացուց թէ այս ամէնը կը միտի Խոչընդոտել “Սիվիլիթաս“ի գործունէութիւնը: Յայտարարութեան մէջ կ՛ըսուի, որ “Սիվիլիթաս“-ի նախաձեռնած ծրագիրները այս չորս տարիներուն ընթացքին իրականացուած են եւ կ՛իրականացուին հիմնադրամի կանոնադրութեան եւ Հայաստանի օրէնքներու պահանջներուն խստագոյն կատարումով:
“ԴՐԱՄ ԼՈՒԱԼՈՒ ՀԱՄԱՐ ՆԱԽ ԴՐԱՄԸ ՊԷՏՔ Է ԿԵՂՏՈՏ ԸԼԼԱՅ“ ԿԸ ԲԱՑԱՅԱՅՏԷ ՕՍԿԱՆԵԱՆ
Հայաստանի նախկին Արտաքին Գործոց նախարար, “Բարգաւաճ Հայաստան“ Կուսակցութեան անդամ Վարդան Օսկանեան, կատարեց յայտարարութիւն մը, որուն մէջ արձագանգեց Ազգային անվտանգութեան ծառայութեան աւելի կանուխ հրապարակած յայտարարութեան: Օսկանեան շեշտեց, որ միայն քաղաքական նպատակ հետապնդողը կրնայ բարի մարդու բարի գործը վերածել քաղաքական մանրադրամի:
Ան նշեց, որ Ազգային անվտանգութեան ծառայութիւնը տարածեց յայտարարութիւն մը, որով փորձ կը կատարուի ցոյց տալ, որ յարուցուած քրէական գործը քաղաքական պատուէր չէ: “Կը կրկնեմ` ատիկա միանշանակ քաղաքական պատուէր է եւ կ՛ուզեմ ըսել հետեւեալը` “դրամներ լուալ–Օսկանեան–Հանթսման“ բառերը մէկ նախադասութեան մէջ չեն կրնար ըլլալ: Դրամ լուալու համար նախ դրամը պէտք է կեղտոտ ըլլայ: Այս պարագային դրամի աղբիւրները յայտնի են, գնորդը յայտնի է, դրամի փոխանցումը ինծի եւ Սիվիլիթասին նուիրատուի ցանկութեամբ եղած է թափանցիկ եւ դրամատան միջոցով“, ընդգծեց Վարդան Օսկանեան:
Օսկանեան յայտնեց, որ ըստ իրաւաբաններուն, որեւէ հարկային պարտաւորութիւն չէ յառաջացած: Իսկ, ըստ համաձայնագիրին, “ստացողին փոխանցուելիք գումարները կը դիտարկուին իբրեւ նուէր, զոր ստացողը իրաւունք ունի օգտագործել իր հայեցողութեամբ եւ իր կանոնադրական նպատակներուն իրականացման համար“:
“ԱՆԸՆԴՈՒՆԵԼԻ Է, ԵՐԲ ՔԱՂԱՔԱԿԱՆ ՀԵՏԱՊՆԴՈՒՄԸ ԿԸ ՔՈՂԱՐԿՈՒԻ ՔՐԷԱԿԱՆ ՄԵՂԱԴՐԱՆՔՆԵՐՈՎ“ԿԸ ՅԱՅՏԱՐԱՐԷ ՎԱՀԱՆ ՅՈՎՀԱՆՆԻՍԵԱՆ
“Մէկ բան գիտեմ, որ եթէ քրէական մեղադրանքներով կը քողարկուի քաղաքական հետապնդումը, ասիկա ինծի եւ Հ.Յ.Դաշնակցութեան համար բացարձակապէս անթոյլատրելի եւ անընդունելի է, մենք միշտ այսպիսի երեւոյթներուն դէմ եղած ենք եւ պիտի ըլլանք: Բայց յստակ իրաւական բնոյթի քննարկում ես չեմ կրնար ընել, որովհետեւ բացարձակապէս ծանօթ չեմ մեղադրանքի բնոյթին: Կը կասկածիմ, սակայն, որ այսպիսի մեղադրանքներ կրնան իսկապէս Օսկանեանին վերաբերիլ“, ըսաւ Հ.Յ.Դ. Բիւրոյի անդամ, Հայաստանի Ազգային ժողովի պատգամաւոր Վահան Յովհաննիսեան: Այսպէս, ան չբացառեց, որ Հայաստանի նախկին Արտաքին Գործոց նախարար, Բարգաւաճ Հայաստան կուսակցութեան անդամ Վարդան Օսկանեանի դէմ Ազգային անվտանգութեան ծառայութեան կողմէ քրէական գործ յարուցելու փաստը կրնայ կապուած ըլլալ անոր քաղաքական գործունէութեան աշխուժացման հետ:
Ան աւելցուց, թէ այս պահու ընտրութիւնը կրնայ որոշ կասկածներ յառաջացնել:
Վահան Յովհաննիսեան կրկին շեշեց, որ Վարդան Օսկանեանը եւ անոր ընտանիքը անձամբ ճանչնալով, խիստ կը կասկածի, որ ան կրնար ներգրաւուած ըլլալ այսպիսի ծանր յանցագործութեան մէջ, բայց քանի որ ծանօթ չէ գործի մանրամասնութիւններուն, չի գիտեր, թէ ի՛նչ փաստարկներու կամ ապացոյցներու վրայ հիմնուած են այդ մեղադրանքները, ապա իրաւական գնահատականներ չի կրնար տալ:
“ՍԻՎԻԼԻԹԱՍԸ ԿԱՐԵՒՈՐ Է ՄԵԶԻ ՀԱՄԱՐ“ ԿԸ ՅԱՅՏՆԷ Ա.Մ.Ն.-Ի ԴԵՍՊԱՆ ՃՈՆ ՀԵՖԸՐՆ
“Ազատութիւն“ ձայնասփիւռի կայանին տրուած հարցազրոյցի մը ընթացքին, Հայաստանի մէջ Ամերիկայի Միացեալ Նահանգներու դեսպան Ճոն Հեֆըրն` պատասխանելով այն հարցումին, թէ ինչպէ՞ս պիտի գնահատէր Արտաքին Գործոց Նախարար Վարդան Օսկանեանի յայտարարութիւնը, թէ Ազգային Անվտանգութեան ծառայութեան յարուցուած գործի ետին յստակ քաղաքական պատուէր կայ, ըսաւ.– “Այն փաստը, որ Սիվիլիթաս հիմնադրամի դէմ քրէական գործ կը յարուցուի քաղաքական այս ժամանակահատուածին մէջ, անհանգստացնող է: Սիվիլիթասը կարեւոր է մեզի համար, եւ մենք շատ հետաքրքրուած ենք այս գործով“:
Նշենք թէ Հեֆըրն այցելեց “Սիվիլիթաս“ հիմնադրամ` տեղեկանալու համար խնդիրի մանրամասնութիւններուն:
