ՀՈՒՐԻԿ ՓԱՓԱԶԵԱՆ-ՍԱՀԱԿԵԱՆԻ ՀՐԱԺԵՇՏԸ

0 0
Read Time:2 Minute, 24 Second

Ա․Մ․Ն․ Արեւելեան թեմի Ազգային Առաջնորդարանի երկարամեայ գործակից եւ Ազգային Ուսումնական Խորհուրդի նախկին վարիչ տնօրէն՝ տիկ. Հուրիկ Փափազեան-Սահակեան մահացաւ, 96 տարեկան հասակին, Նոյեմբեր 23-ին։

Տիկ. Հուրիկ Սեդա Փափազեան-Սահակեան ծնած էր Նիւ Եորք, Ապրիլ 19, 1926-ին։ Հայրը՝ Վահան Փափազեան, օժտեալ արուեստագէտ մըն էր, որ լայն մասնակցութիւն բերած էր ամերիկահայ քաղաքական ու մշակութային կեանքին մէջ։ Անոր ընտանիքին մաս կազմած են երկու հոգեւորականներ՝ Տ. Յուսիկ Քհն. Փափազեան եւ Տ. Ներսէս Քհն. Փափազեան, եւ երկու հռչակաւոր դէմքեր՝ գրող Վրթանէս Փափազեան (1866-1920), եւ հօրեղբայրը՝ յեղափոխական գործիչ Վահան Փափազեան (Կոմս, 1876-1973)։ Մայրը՝ Արփի Մելիք-Ստեփանեան, Ղարաբաղի մելիքներու շառաւիղներէն էր եւ կարեւոր դերակատարութիւն ունեցած էր հայ որբեր Միացեալ Նահանգներ փոխադրելու աշխատանքներուն մէջ Բ. Աշխարհամարտէն ետք։

Հուրիկի կողակիցը՝ Ռոպըրթ Վահէ Սահակեան, որուն հետ 63 տարի կազմած էր հայաշունչ բոյն մը, մահացած էր 2016-ին։

Վաթսունամեայ կրթական գործունէութեան մէջ, Հուրիկ Փափազեան-Սահակեան լայնօրէն նպաստած էր Միացեալ Նահանգներու եւ արտասահմանի հայկական դպրոցներու բարենորոգումին։ 1950-ին, Լեւոն Շանթի հրաւէրով, ճամբորդած էր Պէյրութ, ուր «Նշան Փալանճեան» ճեմարանին մէջ մանկապարտէզի բաժանմունքի ստեղծումին մեծապէս սատարած է, ամերիկեան կրթական փիլիսոփայութիւնն ու մեթոտաբանութիւնը մուծելով։ Վերադառնալով Ամերիկա, շարունակած էր երաժշտութեան ուսուցիչի աշխատանքը Նիւ Ճըրզիի մէջ։ 1970-ական թուականներու վերջաւորութեան, Նիւ Ճըրզիի հայկական վարժարանի (այժմ «Յովնանեան» վարժարան) տնօրէնութիւնը ստանձնած էր։

1960-1970-ական թուականներուն, Թեմի վախճանեալ առաջնորդներու՝ Հրանդ Արքեպիսկոպոսի եւ Գարեգին Արքեպիսկոպոսի հրաւէրով, Հուրիկ Ազգային Առաջնորդարանի զանազան ծրագիրներու մէջ աշխատած էր։ Ազգային Ուսումնական Խորհուրդի անդամ դառնալէ ետք, 1980-ական թուականներու սկզբանւորութեան, օրուան առաջնորդ՝ Մեսրոպ Արքեպիսկոպոսի յանձնարարութեամբ, ստանձած էր Ուսումնական Խորհուրդի վարիչ տնօրէնի պաշտօնը։

Ան ծրագիրներ ստեղծած է ամերիկահայ պատանիներու եւ չափահասներու համար, դոկտ. Սթիւ Չեքոսկիի հետ համահիմնադիր ըլլալով «Սիամանթօ» լսարանին (1981), որ քառասնամեայ իր գործունէութեամբ երկրորդականի տարիքի աշակերտներու իրերայաջորդ սերունդներու հայեցի դաստիարակութիւն ջամբած է՝ յայտնի դասախօսներու եւ հրաւիրեալ դասախօսներու մասնակցութեամբ։ Տիկին Փափազեան-Սահակեանի ժրաջան աշխատանքին շնորհիւ, Ուսումնական Խորհուրդի աշխատանքը լայն ծաւալ ստացած է։

Ուսումնական ծրագիր մշակման կողքին, ան երկլեզու «Հայաստանի պատմական ատլաս»-ի ստեղծման մղիչ ուժը հանդիսացած է, Արտաշէս Համբարեանի հետ միասնաբար խմբագրելով քանի մը կարեւոր աշխատութիւններ՝ Ռոպըրթ Պետրոսեանի «Հայաստան հին եւ միջնադարեան ժամանակներուն», եւ Թոմըս Սամուէլեանի «Արդի արեւմտահայերէնի դասընթացք» եւ «Տառադարձուած հայերէն բառարան»։ Պէյրութեան տարիներուն, Լեւոն Շանթի հետ մշակած է սկզբնական բնօրինակը մանկական յայտնի «Փոքրիկ Անին» եւ «Պետիկն ու գայլը» դասագիրքերուն։

Որպէս երաժիշտ, թէ՛ դաշնակահար եղած է եւ թէ՛ դասատու։ Իր մօտիկ ընկերուհի Սօսի Գատեանի հետ, Հուրիկ Փափազեան-Սահակեան հայկական երգեր ու պարեր ներկայացուցած է՝ յայտնի երաժիշտներու ընկերակցութեամբ։ Կեանքի վերջին տարիներուն, անոր գործունէութիւնը դադար ունեցած չէ։ Հիմնած է “The Way We Were” թատերախումբը, գրելով ու բեմադրելով երաժշտախառն թատերախաղեր, ուր հայ մշակոյթն ու պատմութիւնը ներկայացուած են։ «Վարանոտ հարսը», «Բարեւ, Էլիս Այլընտ» եւ «Հայկական լեգէոն. կամաւորին պատմութիւնը» նման թատերախաղեր էին, որոնք մեծ յաջողութեամբ ներկայացուած են Արեւելեան Միացեալ Նահանգներու բազմաթիւ սրահներու մէջ։  2014-ին, անգլերէնի թարգմանած է Անուշաւան Արքեպիսկոպոսի «Ի խորոց սրտի» հատորը, նուիրուած՝ Մեծի Տանն Կիլիկիոյ Զարեհ Ա. եւ Խորէն Ա. Կաթողիկոսներուն։

Տան կարգը տեղի ունեցաւ Հինգշաբթի, Դեկտեմբեր 1-ին։ Բարեջան Առաջնորդ Գերշ. Տ. Անուշաւան Արքեպիսկոպոս նախագահեց յուղարկաւորութեան, որ տեղի ունեցաւ Ուրբաթ, Դեկտեմբեր 2-ին, Սրբոց Վարդանանց (Ռիճֆիլտ, Նիւ Ճըրզի) եկեղեցւոյ մէջ։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles