Հայաստան-Ուզպեքիստան Ֆութպոլի Բարեկամական Մրցումը…Թուրքիո՞յ Մէջ

0 0
Read Time:4 Minute, 43 Second

daghdevirian

Սարգիս Տաղտէվիրեան

Վերջերս Հայաստանի ֆութպոլի ֆետերասիոնը իր կայքէջով յայտարարեց, եւ «Արմէնփրէս» մամլոյ գործակալութիւնն ալ առանց մեկնաբանութիւններու տարածեց, որ Փետրուար 12, 2017ին Հայաստանի եւ Ուզպեքիստանի ֆութպոլի ազգային հաւաքականները բարեկամական մրցում մը պիտի խաղան իրարու դէմ, «ԹՈՒՐՔԻՈՅ ԱՆԹԱԼԻԱ ՔԱՂԱՔԻՆ ՄԷ՛Ջ…»:
Զիս բնա՛ւ չի հետաքրքեր, թէ Ուզպեքիստանի մարզական ու քաղաքական ղեկավարութիւնը այս խաղով ի՞նչ կը հետապնդէ. չի՛ ալ զարմացներ Թուրքիոյ համապատասխան իշխանութիւններուն հայավնաս նպատակները: Ուղեղային պտոյտ պատճառողը՝ որոշումն է Հայաստանի ֆութպոլի ֆետերասիոնին, որուն ղեկավարութիւնը մարզականէն վեր-վեր սաւառնելով, բաւական քաղաքական «հասունութիւն» պէտք է զարգացուցած ըլլայ, որ կարողութիւնը ունենայ համատեղելու տնտեսական, ռազմավարական, ընկերային ու մարզական ազդակները եւ համարձակութիւնը ցուցաբերէ ոտնակոխելու այդ բոլորը՝ վերակենդանացնելու Հայաստանի Ազգային ժողովին ու Սահմանադրական դատարանին փակուած էջ կարծած հայ-թրքական փրոթոքոլները եւ անոնց մեկնարկած «ֆութպոլային քաղաքականութիւնը»:
Առաջին հայեացքով, կարգ մը՝ իրենք զիրենք քաղաքական գործիչներ հաւակնողներ կամ մարդասիրական լոզունգներ արձակողներ կրնան գովաբանել քայլը, որպէս հաշտութեան նախաձեռնութիւն:
Միանգամընդմիշտ հասկնանք, որ ծնկաչոքող կողմը յաղթանակի չի՛ հասնիր, հաւասարութեան կամ համակեցութեան իսկ չի՛ մօտենար, եթէ հակառակորդը նոյն բարեացակամ կեցուածքը չէ որդեգրած եւ միշտ կ՚աշխատի աւելի ու աւելի, հարուածի տակ, վար պահել առաջինը, մինչեւ այլեւս ան չկարողանայ վերականգնիլ: Ասիկա մեզի կը յիշեցնէ՞ Օսմանեան կայսրութեամբ սկսած ու թրքական յաջորդական կառավարութիւններով շարունակուած հայութեան հանդէպ կեցուածքը:
Որեւէ ֆութպոլի, մրցունակ թէ բարեկամական խաղի մը համար, հայրենի ֆութպոլի ֆետերասիոնը նիւթական յատկացում կը կատարէ, որ մեր խաղացողներն ու խումբին անձնակազմը՝ մարզիչներ, բժիշկներ, մերսողներ եւ երբեմն ալ անոնց ապահովութեանը հսկիչներ, ճամբորդեն տուեալ երկիրը, մի քանի օր իջեւանին որոշ մակարդակի պանդոկ մը, մրցախաղի ժամերէն դուրս ունենան յատուկ փորձեր ու երբեմն ալ ժամանցի պահեր, յաջողութեամբ աւարտելու համար որոշուած մարզական հանդիպումը:
Այս յատկացումները պէտք է կատարուին, ինչպէս նշեցինք, նաեւ բարեկամական խաղերու համար, մեր խումբերը լաւագոյնս պատրաստելու համար ախոյեանութիւններուն: Բայց ա՛յս գումարը՝ Հայաստանի տառապող տնտեսական իրավիճակին մէջ մեծ զոհողութիւններով հաւաքուած, տանիլ եւ յանձնել թուրքերուն, ծախսել Թուրքիոյ մէջ, խաղի մը համար որ Թուրքիոյ իսկ չի վերաբերիր, երբ այդ երկրին զբօսաշրջիկութիւնը սկսած է որոշ չափով կաղալ, նոյն ինքն երկրին իշխանութեան բռնատիրական քայլերուն հետեւանքով, մեր ֆութպոլի դաշնութեան մնա՞ց անոր նպաստել:
Մենք հարիւր հազարաւոր հայրենակիցներ ունինք, որոնք կը մերժեն Արեւմտեան Հայաստանի ու Կիլիկիոյ հայապատկան իրենց պապենական հողերը այցելել, պարզապէս նիւթական նպաստ չբերելու համար հայկական հողերը բռնագրաւած Թուրքիոյ ու անոր տնտեսութեան: Այցելող հայորդիները թող չընդվզին, զիրենք այպանողը չեմ. մեր հողերն են, մեր կալուածներն են, լաւագոյնս պէտք է ծանօթանանք անոնց ու շրջապատին, կենդանի թէ անշունչ, որպէսզի յարմար պայմաններուն պարագային, կարելի նուազագոյն զոհողութեամբ զանոնք «տուն բերենք»: Միլիոնաւոր հայորդիներ ալ ունինք որոնք մերժողական կեցուածք ունին թրքական արտադրութեան ապրանքներուն դէմ, նոյն՝ հակառակորդին չնպաստելու մտայնութեամբ:
Մարզական մրցունակ մրցաշարքերուն համար ցամաքամասի կամ համաշխարհային ֆետերասիոններու օրէնքներով, մեր խումբերը պարտաւոր են Թուրքիա կամ Ատրպէյճան մեկնիլ ու մասնակցիլ, այլապէս կ՚ենթարկուին խիստ պատիժներու, մինչեւ իսկ վտարման: Բայց ծրագրել Թուրքիոյ մէջ կատարել բարեկամական խաղ մը, որուն կայացումը միայն մեր եւ ուզպէքներուն տնօրինումի սահմաններու մէջ է, հայ միտքի չորութիւն է:

Մենք պէտք է յիշենք, որ թուրք եւ ազերի ժողովուրդները ինչպիսի նախատական եւ հալածողական ընդունելութիւն ցուցաբերած են հայ մարզիկներուն, իրենց երկիրներուն մեջ կայացած բոլոր մրցաշարքերուն ընթացքին:
Քաղաքական գետնի վրայ, հիմնուելով՝ նուազագոյնը հրապարակաւ, Եւրոպայի, Ռուսիոյ ու Միացեալ Նահանգներու բարձրաստիճան ղեկավարներու յայտարարութիւններուն վրայ, ներկայի Թուրքիան, մանաւանդ Ռ. Թ. Էրտողանի նախագահ ընտրուելէն ետք, վարկաբեկուած է իր թէ՛ ներքին եւ թէ՛ արտաքին քայլերուն պատճառով:
Ներքին ճակատի վրայ, փոքրամասնութիւններու (ներառեալ հայերու) դէմ սանձարձակ բռնութիւնները, սպանութիւններն ու այլախոհներու ձերբակալութիւնները, տպագիր ու եթերային մամուլի դէմ ճնշումները, խմբագիրներու արգելափակումներն ու կարգ մը թերթերու եւ համացանցի կայքէջերու ամբողջական փակումները, յուլիսին պետական հարուածի փորձին մասնակցած կամ ոչ, ընդիմադիր բանակայիններուն չէզոքացումը, տասնեակ հազարաւոր ուսուցիչներու եւ պետական պաշտօնեաներու բանտարկութիւնները, Թուրքիոյ միջազգային համաձայնագրերով ստանձնած պարտաւորութիւններու վերջին միայն մի քանի ոտնակոխումներն են:
Արտաքին ճակատի վրայ, Իրաքի ու Սուրիոյ մէջ զինուորական ծրագրուած ներխուժումները, այդ երկիրներու քիւրտ ժողովուրդներուն դէմ մահացու մաքրագործումները, Իսլամական պետութիւնը բացայայտօրէն նիւթապէս երաշխաւորելը, զինելը, ռազմական յետնամասի նեցուկ տրամադրելը, նոյնին բռնագրաւումով Իրաքի ու Սուրիոյ գողցած քարիւղը մեծ շահոյթով համաշխարհային շուկայ բերելը, դէպի Եւրոպայի քրիստոնեայ երկիրներ գաղթականներու հոսքը կազմակերպելը եւ օգտագործելը նիւթական անհամաչափ նպաստ ստանալու համար, Միացեալ Նահանգներու հետ լարուիլը Ֆ. Կիւլէնի հարցով եւ Ռուսիոյ հետ տագնապը Սուրիոյ մէջ զգետնուած ռուսական ռազմական օդանաւին պատճառով, անհանդուժողական Թուրքիոյ մի քանի իրականացումներն են միայն:
Այս բոլորին դիմաց, Հայաստանի ֆութպոլի ֆետերասիոնը բարենիշ կ՚ուզէ՞ պարգեւել Թուրքիոյ:
Արցախեան գոյամարտի 1994ի զինադադարէն անցած է 22 տարի. թերեւս մեր յուշերը քիչ մը մշուշոտած են, բայց Արցախի դէմ Ապրիլի քառօրեայ պատերազմը տակաւին թարմ է մեր յիշողութեան մէջ: Հայութիւնը միասնակամ ու մարտունակ՝ յաջողութեամբ դիմակայեց Ատրպէյճանի իբրեւ թէ Ստեփանակերտ հասնելու եւ հոն տեղաւորուելու ծրագիրներուն: Թուրքիան, համաթուրանականութիւնը ի մտի, անվերապահօրէն, բոլոր միջոցներով, առաջին, բացայայտ եւ գլխաւոր զօրակցողն էր Ատրպէյճանին:
Բոլորս գիտենք, նոյնիսկ զայն տակաւին չճանաչողները, որ Հայոց Ցեղասպանութիւնը ծրագրած եւ իրագործած է Թուրքիան, սկսած Օսմանեան կայսրութեան օրերուն եւ շարունակուած Քեմալական Թուրքիոյ հանրապետութեան տարիներուն: Ո՛չ մէկ զղջումի, ճանաչումի եւ հատուցումի նախանշան կ՚երեւայ անոր ներկայ քաղաքական իշխանութեան մօտ. ընդհակառակը՝ աւելի կարծրացում թէ՛ Հայաստանի եւ թէ՛ Սփիւռքի նկատմամբ, պահանջելով որ հայութիւնը ի՛նք զիչի, մոռնայ, հողերէն հրաժարի եւ ընդունի սեղանին դրուած ստրկացնող ամէն պայման:
Հայաստանի ֆութպոլի ֆետերասիոնը Թուրքիոյ այս դերն ու կեցուածքը կ՚ուզէ՞ վերացնել հայութեան միտքէն, օր ցերեկով:

* * *

Հայաստանի ֆութպոլի ազգային խումբը վերջին մի քանի տարին անցուց տագնապալի շրջան մը: Մարզիկներուն խաղարկութիւնը համադրելու եւ յանձնառութիւնը բարելաւելու համար բարեկամական մրցումները անհրաժեշտ են, աշխարհի չորս կողմը ցրուած լաւագոյն խաղացողները հաւաքականին մաս կազմելու անաչարօրէն հրաւիրելը՝ հիմնական, առաջնակարգ հաւաքականներու դէմ մրցումներ ունենալը՝ առաւել օգտակար ու հայկական ֆութպոլը արժեւորող հանդիսատեսներու եւ ինչու չէ նաեւ համակիրներու ներկայութիւնն ու քաջալերանքը՝ անժխտելի առաւելութիւն: Այս բոլորը իրականացնելու վայրը Թուրքիան չէ՛: Տարածաշրջանին մէջ գոյութիւն ունին ուրիշ երկիրներ, ուր գոնէ մի քանի հայեր կ՚ապրին եւ Եռագոյնը կ՚ուզեն պարզել խաղին ընթացքին:

* * *

Անմիջապէս տեղափոխե՛լ վայրը: Վստահ որ յանցաւոր ալ կայ այս գաղափարին ետին. գտնե՛լ եւ իրեն յարմար տեղը գամե՛լ: Մեր մարզիկները, համայն ժողովուրդով, պէտք չունին այս անպատւութեան:
Հայ ժողովուրդի մարդկային եւ ազգային արժանապատւութիւնը կարելի չէ արհամարհել տալ կարգ մը գործակալ հոտող անբարտաւան անձերու կողմէ: Մեր զանազան մարզիկները Հայաստանի դրօշով փաթթուած են յաղթանակներու պարագային եւ իրենց կերտած նուաճումը նուիրած Արցախի սահմանագիծի մեր նահատակ թէ սխրագործութիւն կատարած մարտիկներուն. կարելի չէ այդ վեհութիւնը ջարդուփշուր ընել Թուրքիոյ արհամարհական քմծիծաղին դիմաց:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Կրանիթ Սիթիի Սուրբ Գրիգոր Լուսաւորիչ Հայոց Առաքելական եկեղեցւոյ 62-ամեակի Տօնախմբութիւն
Next post Արա Տեմիրճեանի Մահուան Քառասունքին Առիթով .- Սրտի Խօսք

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “Հայաստան-Ուզպեքիստան Ֆութպոլի Բարեկամական Մրցումը…Թուրքիո՞յ Մէջ

  1. Միանգամյն ճիշտ է հոդվածի հեղինակը և Հայրենիք շաբաթերթը, քանի այս տոնական Ամանօրի օրերին, այդ գործարքի կաշառված հեղինակները և նրանց հովանավորող պետական դավաճան ղեկավարները, մի աննկարագրելի հաճույք պատճառեցին մեր թշնամիներին: Մեկնաբանությունները ավելորդ են:

Leave a Reply

Your email address will not be published. Required fields are marked *

Social profiles