0
0
ԵՐԵՒԱՆ (“Փանորամա“).- Արդէն իսկ, երկու տարիէ ի վեր, Հայաստանի ազգային օդանաւորդութեան ընկերութեան կողմէ ստեղծուած է “Սքայ Նեթ“ ընկերութիւնը, որու մասնագիտութիւնն է, կազմակերպել ներքին թռիչքներ, հայրենի զանազան քաղաքներու մէջ:
Նոյեմբեր 25-ին կայացած մամլոյ ասուլիսի ընթացքին, ընկերութեան գլխաւոր տնօրէն Գրիգորի Վարդանեան յայտնեց թէ ընկերութիւնը, իր տրամադրութեան տակ ունի բրիտանական “Ճէթսթրիմ 32“ տիպի փոքր օդանաւներ, որոնք կը փոխադրեն 19 ճամբորդ: Այս տիպի օդանաւը կրնայ 1200 քլմ. հեռաւորութեամբ, թռիչքներ կատարել: “Սքայ Նեթ“ ընկերութիւնը պիտի կատարէ թռիչքներ, դէպի Գիւմրի, Կապան եւ Ստեփանաւան:
Վարդանեան յայտնեց, որ իրենց ընկերութեան առաջարկած ծրագիրներուն մէջ կան նաեւ զբօսաշրջային ծառայութիւններ Հայաստանի մէջ: Անոր համաձայն, Կապանի օդակայանը հաւանաբար մօտիկ ապագային սկսի գործել: Նոյնիսկ, աշխատանք կը տարուի, դէպի Ջերմուկ, թռիչքներ կազմակերպելու, սակայն այս վերջինին օդակայանը, բաւական մը նորոգութեան կարիքն ունի:
Ընկերութիւնը պատրաստ է, նաեւ արտաքին մօտակայ թռիչքներ իրականացնել` Վրաստան եւ Իրան:
