ՀԱՂՈՐԴԱԳՐՈՒԹԻՒՆ.- ԽՈՐՀՐԴԱԿՑԱԿԱՆ ԺՈՂՈՎՆԵՐ ԵՒ ՀԱՆԴԻՊՈՒՄՆԵՐ

Read Time:4 Minute, 54 Second

Հ. Յ. Դ. Հիւսիսային Ամերիկայի Արեւելեան Շրջանի Կեդրոնական Կոմիտէի հրաւէրով խորհրդակցական ժողով մը տեղի ունեցաւ Շաբաթ, Յունուար 14, 2012 -ին Նիւ Եորք քաղաքի Քուինզ շրջանի Հայ Կեդրոնին մէջ: Միօրեայ այս ժողովին հրաւիրուած էին Հիւսիսային Ամերիկայի Արեւելեան Շրջանի քոյր կազմակերպութիւններու (Հ.Օ.Մ.-ի, Հ.Մ.Ը.Մ.-ի, Համազգայինի եւ Հ.Ե.Դ.-ի) Շրջանային Վարչութիւնները:

Ժողովին գլխաւոր օրակարգերն էին մշակել, համադրել եւ զարգացնել գաղութային աշխատանքներու ու ձեռնարկներու համագործակցութիւնը եւ որակաւոր ու արդիւնաբեր աշխատանքի համար, իրականացնել մարդուժի փոխանակման կարելիութիւնները:

Կազմակերպութիւններուն Շրջանային վարչութիւնները իրենց գործունէութեան մասին հակիրճ զեկոյցներ տալէ ետք, ներկայացուցին իրենց յառաջիկայ տարուան գործունէութեան կմախքը, կիզակէտ ունենալով մերձեցող 100-ամեակը Ցեղասպանութեան:

Քննարկուեցան նաեւ “Ցեղասպանութեան 100-ամեակ“-ի առթիւ ծրագրային եւ կազմակերպչական զանազան միջոցառումներու հնարաւորութիւնները, եւ անոնց գործադրման եղանակներն ու պիւտճէական պարտաւորութիւնները: Ժողովականները միաձայնութեամբ յայտնեցին իրենց բաղձանքը, որ Ցեղասպանութեան 100-ամեակի մեր բոլոր նախաձեռնութիւնները ըլլան եւ ունենան համահայկական բնոյթ, շրջանին բոլոր հայկական կազմակերպու-թիւններու մասնակցութեամբ: Որոշուեցաւ չբաւարարուիլ Ապրիլ 24-ի առթիւ լոկ ոգեկոչման ձեռնարկներ կազմակերպելով զանազան քաղաքներու մէջ: Ընդհակառակը, պահանջատիրական եւ հատուցման սկզբունքներու վրայ հիմնուած, 2015 թուականի ամբողջ տեւողութեան, բազմատեսակ նախաձեռնութիւններու շարանով մը, Ցեղասպանութեան 100-ամեակը ազգային բնոյթ ունեցող գործընթացի մը վերածել: Որոշուեցաւ կազմակերպել քաղա-քական, քարոզչական, հրատարակչական, մշակութային եւ այլ նախաձեռնութիւններ, ազգային իրաւունքներու հանդէպ նպաստաւոր հանրային կարծիք ստեղծելու Միացեալ Նահանգներու Արեւելեան շրջանին մէջ:

Ապա, մօտաւորապէս 25 հոգինոց ժողովականներէ բաղկացած խումբը ուղղուեցաւ Հայաստանի Հանրապետութեան Մ.Ա.Կ.-ի դեսպան Կարէն Նազարեանին հետ հանդիպում մը ունենալու Հ.Հ. Նիւ Եորքի դեսպանատան մէջ: Դեսպանը սիրալիր կերպով ընդունեց Հ.Յ.Դ.-ի Միացեալ Նահանգներու Արեւելեան Շրջանի Կեդրոնական Կոմիտէի եւ վերոյիշեալ չորս կազմակերպութիւննրու ներկայացուցիչները: Տեղի ունեցաւ մօտաւորապէս մէկ ժամ տեւողութիւն ունեցող հարց ու պատասխանի երկխօսութիւն, որուն ընթացքին յարգելի դեսպանը նախ ընդհանուր տեղեկութիւններ տուաւ դեսպանատան կատարած բազմակողմանի քաղաքական աշխատանքներու մասին եւ յետոյ, մէկ առ մէկ, պատասխանեց ներկայացուցիչներուն արծարծած Հայաստանի ներկայ քաղաքական, ազգային, ընկերային, տնտեսական եւ դատական իրավիճակներու մասին եղած հարցումներուն:

Կազմակերպութիւններուն ներկայացուցիչները անգամ մը եւս շեշտեցին հայրենիքին եւ հայ ժողովուրդին ծառայելու իրենց անսակարկ պատրաստակամութիւնը: Հանդիպումի վերջաւորութեան դեսպան Կարէն Նազարեան շնորհակալութիւն յայտնեց բոլոր ներկաներուն իրենց կատարած գնահատական խօսքերուն եւ արտայայտած մտահոգութիւններուն համար:

Իր հարազատ խօսքերու եւ սիրալիր ընդունելութեան արդիւնք, այդ օր դեսպանատան մէջ եղող ներկաները ինքզինքնին իրենց տան մէջ զգացին… եւ հոգեպարար զգացումով հրաժեշտ տուին Հ.Հ. Մ.Ա.Կ.-ի մօտ դեսպան Կարէն Նազարեանին:

Ա.Մ.Ն. ԱՐԵՒԵԼԵԱՆ ՇՐՋԱՆԻ

Հ. Յ. Դ.-Ի ԿԵԴՐՈՆԱԿԱՆ ԿՈՄԻՏԷ