Լուրեր Նիւ Եորքէն.- Հ.Բ.Ը.ՄԻՈՒԹԵԱՆ ԿԱԶՄԱԿԵՐՊՈՒԹԵԱՄԲ ՏԱՐԵԿԱՆ 7-ՐԴ ՀԱՄԵՐԳԸ ՆՈՒԻՐՈՒԱԾ` ՏԻԳՐԱՆ ՄԱՆՍՈՒՐԵԱՆԻ ԾՆՆԴԵԱՆ 75-ՐԴ ՏԱՐԵԴԱՐՁԻՆ

0 0
Read Time:2 Minute, 34 Second

MANSURIAN

ՅԱԿՈԲ ՎԱՐԴԻՎԱՌԵԱՆ

Անկասկած օգտակար նախաձեռնութիւն մըն է որ յանձն առած է Հ.Բ.Ը.Մ.-ը այս մեծ ոստանի` Նիւ Եորքի մէջ։ Արդարեւ, յաջորդական 7րդ տարին ըլլալով Նիւ Եորքի Բարեգործականի կանանց յանձնախումբը կը կազմակերպէ դասական երաժշտութեան համերգ, որ ընդհանրապէս կը զուգադիպի ամանօրեայ տօնական օրերուն։

Այս տարուան հանդիսութիւնը նուիրուեցաւ հայրենի երգահան Տիգրան Մանսուրեանի ծննդեան 75րդ տարեդարձին։ Ան իր գնահատանքը գրաւոր յայտնեց, ըսելով որ իր ստեղծագործութիւնները կը դառնային պատճառ ի մի հաւաքելու երաժշտասէր հասարակութիւնը։ Ըսենք որ այսօր Հայաստանի ամենէն վաւերական եւ համաշխարհային վարկ վայելող երաժիշտն է ան, որ Լիբանանէն հայրենադարձ եկաւ Խորհրդային Հայաստան եւ իր տաղանդն ու արուեստը շաղախեց հայրենի այլապէս հարուստ արուեստի աշխարհին, ինչպէս ըրին` Գոհար Գասպարեան, Օհան Տուրեան, Յովհաննէս Չեքիճեան եւ մեր միւս մեծերը։MASURIAN2

Այս յայտագրին կազմակերպութեան համաատենապետները` Մարալ Ճէպէճեան ու Սօսի Սեդրակեան ամէն ջանք թափած էին լաւագոյնս կազմակերպելու այս ելոյթը։ Արդարեւ Նիւ Եորքի Ճիւլիըրտ երաժշտադպրոցէն, Լոնտոնի Արքայական Երաժշտութեան Հիմնարկէն, Միշիկընի Նահանգային Համալսարանէն, Սկովտիոյ Արքայական Երաժշտանոցէն եւ Մոնրէալի Համալսարանէն շրջանաւարտ հոյլ մը տաղանդաւոր երիտասարդ երաժիշտներ բերին իրենց մասնակցութիւնը։ Բարեգործականի ամենէն որակաւոր մշակութային ձեռնարկը կոչուելու արժանի է այս տարեկան համոյթը։

Յայտագրին մէջ երկու գործ յատկացուած էր Մանսուրեանի ստեղծագործութիւններուն` «Ակնիւս Տէյ» մասնակցութեամբ` Նարեկ Յարութիւնեանի` աւագասրինգ (clarinet), Սամուէլ Առաքելեանի` ջութակ, Էտուըրտ Պօղոսեանի` թաւջութակ եւ Գրիգոր Խաչատրեանի` դաշնակ։ Նաեւ «Լամենթօ» կատարողութեամբ` Նունէ Մելիքեանի` դաշնակ, աննման կատարողութեամբ, ինչպէս միշտ։

Յայտագիրը սկսաւ Մոցարթի բարձրասրինգի (oboe)«քառեակ»ով Լորեն Ուիլիըմզ` բարձրասրինգ, Նունէ Մելիքեան` դաշնակ, Վերոնիքա Վարդբարդիկեան` վիոլա եւ Էտուըրտ Պօղոսեան` թաւջութակ։ Այնուհետեւ դաշնակի վրայ Գրիգոր Խաչատրեան լաւագոյնս արժեւորեց Շոփէնի «Էթիւտ Օփիւս 25»ի գործը։

Սարգիս Մելքոնեան` բնիկ պուլկարահայ, որ գեղարուեստական ղեկավարն էր այդ երեկոյ, դաշնակի վրայ անմահացուց Առնօ Պապաջանեանի «Էլէժի»ն, իսկ ներկաներուն բարձր գնահատանքին արժանացաւ Ալեքսանդր Սպենդիարեանի «Երեւան Էթիւտ»ը, մասնակցութեամբ` Նունէ Մելիքեանի, Լիլիթ Քիւրտեանի` թաւջութակ եւ Գրիգոր Խաչատրեանի։

Յայտագրին երկորդ բաժինը սկսաւ Ռոպերթ Շումանի «Դաշնակի հնգեակ»ով, որմէ ետք Նարեկ Յարութիւնեան, աւագասրինգի վրայ հանդէս եկաւ Իվան Օլենչիքի «Սպանական քափրիս» կտորով, որ դարձեալ ընդունուեցաւ ներկաներուն կողմէ ծափահարութիւններով։ Արամ Խաթատուրեանի «Օրօր»ը Լորըն Ուիլիըմզի, Սամուէլ Առաքելեանի, Լիլիթ Քիւրտեանի եւ Սարգիս Զաքարեանի կողմէ ու այնուհետեւ Մոցարթի «Դաշնակի Սօնաթա»ն նուագուած Զաքարեանի եւ Խաչատրեանի կողմէ յաջողութեան նոր ու եզակի արձանագրութիւն մը հանդիսացաւ անկասկած։

Հուսկ, դարձեալ Սպենդիարեանէն «Խայթարմա»ն Առաքելեան-Մելիքեան-Վարդբարդիկեան-Պօղոսեան բերաւ աւարտը այս սքանչելի յայտագրին։

Արձանագրենք որ յայտագրին մասնակիցներուն մեծամասնութիւնը Հայաստան ծնած մեր տաղանդաւոր արուեստագէտներն էին։ Անգամի մը համար դարձեալ կը հաստատենք մեր հայրենիքի մշակութային կեանքին որակն ու մակարդակը։ Որքա~ն աշխատանք տարուած է այս նոր սերունդին վրայ դեռ խորհրդային կարգերէն սկսեալ, երբ գուրգուրանքով անոնց ուսուցիչները հետեւած են իրենց աշակերտներուն երաժշտական դաստիարակութեան։ Անոնք միայն պատիԲւ կրնան բերել որեւէ ազգի։ Եւ անշուշտ Նիւ Եորքահայութեան մէջ անոնք մէկական արժէքներ կը մնան ու պիտի մնան ընդմիշտ։

Այս առթիւ կը շնորհաւորենք երաժշտկան յանձնախումբը գլխաւորութեամբ Հայկ Արսէնեանի, ինչպէս նաեւ այս հանդիսութիւնը կազմակերպող տիկինները` Անիթա Անսրլեան, Գարոլ Արսլանեան, Սերտա Պըլըքտանեան, Պեթի Չերքեզեան, Մելիսա Տէմիրճեան, Նիլա Ֆստըգճեան, Մարալ Հաժժար, Հիլտա Յարութիւնենա, Մարալ Ճէպէճեան, Վեսնա Մարգարեան, Սօսի Սեդրակեան եւ Վերա Սեդրակեան, մէկական ազնիւ տիկիններ, որոնք ամէն ջանք կը թափեն բարձր պահելու հայ երաժշտութեան որակը այս հարուստ ոստանէն ներս։

Դեկտեմբեր 6-ի երեկոյեան Գարնըկի համերգասրահի Ուայլ սրահը լեցուցած էին երաժշտասէր հասարակութիւն մը, ինչպէս նաեւ Հ.Բ.Ը.Մ.-ի պատասխանատուներ գլխաւորութեամբ` Միութեան նախագահ Պերճ Սեդրակեանի, բարերարներ եւ Մ.Ա.Կ.-ի մօտ Հ.Հ. մնայուն ներկայացուցիչ դեսպան Զօհրապ Մնացականեան։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles