0
0
Բոլոր անոնք, որոնք լրջօրէն մտահոգուած են ազգի ճակատագրով մանաւանդ Սփիւռքի այլասեռող պայմանները նկատի ունենալով, կը գիտակցին անշուշտ, որ ձուլման վտանգը դիմակայելու ամենէն ազդու միջոցը հայ դպրոցն է: Ահա ճիշդ այդ գիտակցութեամբ ու հայ դպրոցին օժանդակելու եւ նիւթապէս նեցուկ կանգնելու մտադրութեամբ, Տոքթ. Արա եւ Արեւիկ Գաբրիէլեանները որոշեցին քաղաքս հիւրաբար գտնուող երեւանաբնակ, տաղանդաւոր նկարչուհի` Լաուրա Աւետիսեանի նկարներու ցուցադրութիւնևվաճառքը կազմակերպել իրենց տան մէջ այն համաձայնութեամբ, որ վաճառուած նկարներու գումարին որոշ տոկոս մը պիտի յատկացուի Ս. Լուսաւորիչ Ամէնօրեայ վարժարանին:
Ուրբաթ Փետրուար 11ին, Գաբրիէլեաններու ասպնջական ու ջերմ յարկի տակ արուեստասէր ընտրանի մը հաւաքուած էր վայելելու Լաուրա Աւետիսեանի գեղանկարները, միաժամանակ օգտակար ըլլալու դպրոցին: Տան տիրոջ բարի գալուստի սեղմ խօսքերուն յաջորդեց դպրոցի Խնամակալ Մարմնի ատենապետ` տոքթ. Հրանդ Մարգարեանի գնահատանքի արտայայտութիւնը: Ներկաները, կարճ ժամանակի մէջ, կատարեցին իրենց ընտրութիւնները գնելով բոլոր նկարները ու գոհունակ դէմքերով մեկնեցան, զարդարելով, ջերմացնելով իրենց տուները Լաուրա Աւետիսեանի նկարներով:
Սակայն, նախքան հիւրերու հրաժեշտ տալը, երբ Անահիտ Դաշտենցն ու ամուսինը` Պերճ Թիւրապեանը լսեցին ձեռնարկի մասին, իրենց տունը հիւրաբար գտնուող վաստակաւոր դերասան, ասմունքող` Ազատ Գասպարեանի հետ ժամանեցին Գաբրիէլեաններու տունը: Ազատ Գասպարեանը, որ քանի մը օր յետոյ պիտի մասնակցէր գրող, թարգմանիչ Խաչիկ Դաշտենցի ծննդեան հարիւրամեակին նուիրուած ձեռնարկին, ներկաներուն վայելքը կրկնապատկեց իր սրամտութիւններով եւ ինքնաբուխ արտասանութեամբ:
Քիչ յետոյ, անակնկալօրէն հեռախօսեց ազատութեան, անկախութեան աննկուն ախոյեան` Պարոյր Հայրիկեանը ու երբ լսեց հաւաքոյթի մասին, իսկոյն եկաւ յաւելեալ փայլք տալով երեկոյին:
Հետաքրքրական զրոյցները շարունակուեցան մինչեւ առտուայ կանուխ ժամերը: Ներկաները փափաք յայտնեցին կրկին հանդիպելու Պարոյր Հայրիկեանի հետ ու »Համազգային«ի Նիւ Եորքի մասնաճիւղը կազմակերպեց յարգելի հիւրի դասախօսութիւնևզրոյցը Հինգշաբթի, Մարտ 24ին ժամը 8:00ին Հայ Կեդրոնի մէջ հետեւեալ նիւթի շուրջ` »դասական ուղղագրութեան վերադառնալու անհրաժեշտութիւնը«:
Այդ օր բոլոր արուեստասէր հիւրերը ըստ արժանւոյն իրենց գնահատանքը յայտնեցին Լաուրա Աւետիսեանին ու մեկնեցան Ս. Լուսաւորիչ Ամէնօրեայ Հայ վարժարանին նիւթապէս օժանդակած ըլլալու գոհունակութեամբ:
Ահա մէկ ապացոյց եւս, որ Նիւ Եորքի մտաւորականութեան համար Ս. Լուսաւորիչ Ամէնօրեայ Վարժարանը իրենց ուշադրութեան կեդրոնն է:
ԹՂԹԱԿԻՑ
