0
0
ՍՏԵՓԱՆԱԿԵՐՏ.- Արցախի Հանրապետութեան մարդու իրաւունքներու պաշտպան Գեղամ Ստեփանեան կը տեղեկացնէ, թէ Շուշիի Սուրբ Ամենափրկիչ (Ղազանչեցոց) եկեղեցւոյ մէջ «Վերանորոգութեան աշխատանքներ»-ու պատրուակով, Ատրպէյճան կը սրբապղծէ հոգեւոր մշակութային արժէքներէն մէկը: Յատկապէս գմբէթն է, որ քանդուած է: Յստակ է, թէ Պաքուի նպատակը ոչնչացնել է հայկական ներկայութիւնն ու հետքը:
Գեղամ Ստեփանեան կը յայտնէ, թէ. «Ատրպէյճանը չի կարող վերականգնել մի ժողովրդի մշակութային արժէք, որի նկատմամբ տարիներ շարունակ պետական մակարդակով համակարգուած ատելութիւն է տարածում:
Այսպէս կոչուած ՛՛նորոգման աշխատանքներ՛՛-ի քօղի տակ Ատրպէյճանցիները աղաւաղում են հայկական հոգեւոր մշակութային կարեւորագոյն արժէքներից մէկը` Շուշիի Ղազանչեցոց Սուրբ Ամենափրկիչ եկեղեցին:
Բազմաթիւ դէպքերով մենք տեսել ենք, թէ ինչպէս է Ատրպէյճանը վերաբերում հայկական մշակութային արժէքներին, եւ արդէն իսկ հասկանալի է, թէ ՛՛վերանորոգման աշխատանքներ՛՛-ի անուան տակ իրականում ինչ է արւում․ նպատակը հայկական ներկայութիւնն ու հետքը ոչնչացնելն է:
Տարիներ շարունակ Ատրպէյճանի կողմից վարուել է Արցախում հայկական քրիստոնէական մշակոյթը այլ ազգերին վերագրելու պետական քաղաքականութիւն, որը բազմիցս քննադատութեան է արժանացել պատմաբանների եւ մշակութաբանների կողմից մի պարզ պատճառով, այդ փորձերը հիմնազուրկ են թէ՛ պատմական ժամանակագրութեան, թէ՛ մշակութային- ճարտարապետական առանձնայատկութիւնների տեսանկիւնից:
Եթէ Ատրպէյճանն իրօք հոգում է մշակութային արժէքների պահպանութեան մասին եւ ՛՛վերանորոգում՛՛ է այն, ապա մեծ հարց է առաջանում` ո՞րն է պատճառը, որ մինչեւ այսօր չի թոյլատրել, որ Եունեսքօ-ի անկախ փորձագիտական խումբը ժամանի տարածաշրջան:
Ատրպէյճանի կողմից հայկական մշակոյթի նկատմամբ իրականացուող վանտալիզմի մասին մենք ամէն օր ենք բարձրաձայնում` միջազգային համապատասխան կառոյցներին տեղեկացնելով կատարուողի մասին: Սակայն հարցը քննադատութիւններից կամ կոչերից այն կողմ չի անցնում, այնինչ յստակ քայլեր են պէտք: Թողտուութիւնն ու անպատժելիութիւն են Ատրպէյճանի սանձարձակ պահուածքի հիմնական պատճառները»:
