0
0
Հ.Յ.Դ.Բիւրոյի հրաւէրով՝ Շաբաթ, Նոյեմբեր 14, 2009-ին, Փարիզի Ալֆորվիլ շրջանին մէջ գումարուեցաւ Հ.Յ.Դ.Եւրոպայի մարմիններու Ռայոնական ժողովը: Ներկայ գտնուեցան Հ.Յ.Դ. Բիւրոյի ներկայացուցիչ Հրանդ Մարգարեան եւ անդամներ Մկրտիչ Մկրտիչեան ու Լեւոն Մկրտչեան, ինչպէս նաեւ Հ.Յ.Դ.Ֆրանսայի, Հոլանտայի, Պելճիքայի, Գերմանիոյ, Աւստրիոյ, Շուէտի, Յունաստանի, Կիպրոսի, Պուլկարիոյ, Իտալիոյ, Անգլիոյ եւ Երուսաղէմի մարմիններու ներկայացուցիչներ եւ պատասխանատու այլ ընկերներ:
Ժողովի օրակարգին վրայ էր Հայաստան-Թուրքիա յարաբերութիւններու հաստատման գծով ստորագրուած արձանագրութիւններուն նկատմամբ իրականացուող քաղաքականութեան քննարկումը, ինչպէս նաեւ ընթացիկ ընելիքներու հարցը:
Ժողովին ներկայ եղող Եւրոպայի կուսակցական մարմիններու ներկայացուցիչները վճռակամօրէն եւ միաձայնութեամբ վերահաստատեցին իրենց մերժողական կեցուածքը արձանագրութիւններուն նկատմամբ, արժեւորեցին կատարուած աշխատանքներուն ընթացքը եւ ճշդեցին յառաջիկայի գործունէութեան թիրախները:
Յատուկ ուշադրութեան առարկայ դարձաւ արտաքին թէ ներազգային ուղղութեամբ տարուող քարոզչական աշխատանքներու ծաւալումը:
Ժողովի մասնակիցները հաստատեցին, թէ ներկայ իրավիճակին մէջ պէտք է յաւելեալ թափ տալ Հայոց Ցեղասպանութեան միջազգային ճանաչման աշխատանքներուն եւ Եւրոպայի մէջ ապահովել հայանպաստ հասարակական կարծիքի ձեւաւորումն ու արտայայտումը: Շեշտուեցաւ, որ որեւէ պարագայի պէտք չէ թոյլ տալ, որ հայկական միասնականութիւնը խախտուի եւ պառակտում յառաջանայ հայրենիքի եւ Սփիւռքի միջեւ:
Ժողովը արձանագրեց, որ ծաւալելով մեր աշխատանքներուն ընթացքը՝ Թուրքիան պէտք է համոզուի, որ Հայաստանի իշխանութիւններուն կողմէ նման արձանագրութիւններու ստորագրման փաստէն անկախ, անկարելի պիտի ըլլայ խուսափիլ հայութեան պահանջատիրութենէն:
Քննարկումներու նիւթ դարձան նաեւ յառաջիկայ աշխատանքներու համադրման հարցեր եւ որոշուեցաւ նմանօրինակ հանդիպումներ կրկնել պարբերաբար:
Հ.Յ.Դ.
ՄԱՄԼՈՅ ԴԻՒԱՆ
Ալֆորվիլ, Ֆրանսա
Նոյեմբեր 14, 2009
