“ՀԱՅՐԵՆԻՔ“

Տօնական են օրերը:

Նաեւ “Հայրենիք“ի երդիքէն ներս:

Արդարեւ, քանի մը օրէն »Հայրենիք« պիտի թեւակոխէ 115-ամեայ տարեշրջանը:

…Եւ այս առթիւ, տարեշրջանի ընթացքին, աւանդապահին տարեդարձը պիտի

նշուի բազմաթիւ առիթներով, շրջանի զանազան գաղթօճախներէ ներս:

Դժուար է հաւատալ, թէ ցայսօր հակառակ բազմաթիւ արգելքներու, կը հրապարակուի Մեսրոպաշունչ թերթը, իր ելեկտրական կայքէջային տարբերակին կողքին: Առ այդ…երէկ, նաեւ այսօր եւ յատկապէս վաղը, կարելի չէ հրաժարիլ այս կառոյցի գոյութենէն:

Ներկայ օրերուն դիւցազնական նախաձեռնութիւն է, հայերէն թերթ լոյս ընծայելը: Սակայն, ազգային գոյատեւման առաքելութեան մէջ, հայերէն թերթը նոյնքան կարեւոր ազդակ մըն է, որքան դպրոցն ու ծուխը, ի խնդիր ձուլման սպառնալիքի տակ գտնուող եւ օտարութեան մէջ կորսուող գաղութին:

Թէ՛ հրապարակուած օրինակով եւ թէ՛ կայքէջային դրութեամբ աշխատանք կայ կատարելիք:

Մամուլն ու իր ոլորտը նկատի ունենալով կիզակէտ, առաջին հերթին, նկատի կ՛ունենաք հաղորդակցութիւնը, որ ինքնին հակառակ ներկայ արդիականացած միջոցներուն, շարունակ կապուած ու կառչած է լեզուին:

Սփիւռքահայ այլ թերթերու նման, “Հայրենիք“ին պարտականութիւնն է շրջանի գաղթօճախներուն շահերը պաշտպանելու, Հայ Դատի աշխատանքներու գծով, իր քարոզչական աշխատանքը կատարելու, Արցախի, Ջաւախքի,Հայաստանի (…նաեւ Արեւմտահայաստանի) եւ հայութեան ապահովութեան սատարելու եւ անշուշտ ամենէն էականն ու դժուարը` ապագայ սերունդներու հայեցի դաստիարակութեամբ զբաղուելու:

Տեղին է նշել թէ այսօր պայմանները փոխուած են: Փոխուած են նաեւ, առաջնահերութիւններն ու կարիքները, նոյնիսկ մօտեցումներն ու հայեացքները, սակայն հայ մամուլին աշխատանքն ու ստանձնած պարտականութիւնը կը մնան անփոփոխ:

…Եւ դեռ աւելին, հայ թերթը, դաստիարակի, ուղղեցոյց տուող առաջնորդի դերն է որ ստանձնած է  եւ պիտի շարունակէ ստանձնել:

Հուսկ…Տօնական օրերուն առթիւ, Շնորհաւոր Ամանոր…եւ 115-ամեայ աւանդ: