0
0
ՇԱՆԹ ԺԱՄԿՈՉԵԱՆ
Հ.Մ.Ը.Մ. Տիթրոյթի մասնաճիւղի տարեկան պարահանդէսը տեղի ունեցաւ Շաբաթ, Հոկտեմբեր 19-ին, Սաութֆիլտ շրջանի “Ռեճընսի Փալաս“ շքեղ սրահին մէջ, ներկայութեամբ աւելի քան երեք հարիւր անդամներու եւ համակիրներու:
Այս տարուան ճաշկերոյթ-պարահանդէսը, որ կը զուգադիպէր միութեան 95-ամեակի տօնակատարութիւններուն, իւրայատուկ էր իր տեսակին մէջ: Յայտագրի առաջին բաժինը կ՛ընդգրկէր Գայլիկ-Արծուիկներու եւ արի-արենոյշներու երդման եւ խոստումի արարողութիւն:
Հայր Անտոն Աթամեանի Ճաշի սեղանը օրհնելէն ետք. Օրուայ հանդիսավար եղբայր Շանթ Ժամկոչեանը յայտագրի պաշտօնական բաժինը սկսաւ Գէորգ Էմինի “Սասունցիների Պարը“ ասմունքով, որմէ ետք ներս հրաւիրեց մասնաճիւղին գայլիկ-արծուիկներն ու Արի-Արենոյշները որոնք առաջնորդութեամբ Հ.Մ.Ը.Մ.ի դրօշով սրահ մուտք գործեցին, ապա հրաւիրեց ներկայ հոգեւորները` Տէր Հրանդ Քահանայ Գէորգեան (Սուրբ Սարգիս Հայաստանեաց Առաքելական եկեղեցւոյ հովիւ), Հայր Անտոն Աթամեան (Սուրբ Վարդան Հայ Կաթողիկէ Համայնքի ժողովրդապետ), Հայ Աւետարանական եկեղեցւոյ ներկայացուցիչներ` Շանթ Պարսումեան եւ տոքթ. Վահան Թութիկեան, օրուան պատւոյ նախագահ Պարոն Յակոբ Տաքէսեան եւ մասնաճիւղի ատենապետ` Սեպուհ Սարգիսեան: Նաեւ, ներկաներու շարքին էին Հ.Յ.Դ. Տիթրոյթի Ազատամարտ կոմիտէի ներկայացուցիչ` Րաֆֆի Ուրլեան ու կողակիցը: Հ.Օ.Մ.ի Միջ Մասնաճիւղերու խորհուրդի ատենապետուհի Ընկերուհի Սիրվարդ Թէլպէլեան, Համազգայինի Տիթրոյթի մասնաճիւղի ներկայացուցիչ Սօսի Ճալհաեան : Հրաւիրեալներու կարգին էր մասնաՃիւղի վաստակաւոր Հ.Մ.Ը.Մ.ականներէն Եղբայր Արա Թէլպէլեան:
Երդման արարողութիւնը կատարեց մասնաճիւղի փոխ-ատենապետուհի, սկաուտական շարժումի պատասխանատու Քոյր Կարինէ Չէօփճեանը: Օրհնուեցան փողկապներն եւ ապա կատարուեցաւ երդման արարողութիւն, որմէ ետք պատուոյ նախագահը երդուեալներուն յանձնեց իրենց փողկապները: Մասնաճիւղին խօսքը փոխանցեց եղբայր ատենապետը, ուր ան շեշտեց Հ.Մ.Ը.Մ.ի 95-ամեակին զուգադիպող այս գեղեցիկ ձեռնարկին յաջողութեան եւ ընդհանրապէս միշտ գրաւականը հանդիսացող միութեան հաւատարիմ համակիրներուն փաղանգը, որոնք միշտ ալ միութեան զօրակցած են:
Երեկոն Խանդավառեց այս առթիւ, Լոս Անճելըսէն հրաւիրուած սիրուած Երգիչ Ժոզէֆ Գրիգորեանը, որու ընկերակցեցան շրջանի ծանօթ երաժիշտներէն` Ժիրայր Դաւիթեան (երգեհոն) եւ Յակոբ Շիքլանեան (թմբուկ):
Խանդավառուած այս մթնոլորտէն եղան սրտաբուխ նուիրատուութիւններ:
Այս ուրախ առիթով տեղին է յատուկ շնորհակալութեան խօսք ուղղել կազմակերպող քոյրերուն եւ եղբայրներուն` Թալին Մարկոսեանին, Րոսալին Պասմաճեանին, Կարինէ Չէօփճեանին, Սօսի Փալանճեանին, Սիլվա Սաղրեանին, Ժանտարք Մուրատեանին եւ Շանթ Քենտիրճեանին:
