0
0
ԵՐԵՒԱՆ, ՍՏԵՓԱՆԱԿԵՐՏ.- Շաբաթասկիզբին, Արցախի նախագահ Բակօ Սահակեան Հայաստանի նախագահ Սերժ Սարգսեանի հետ միասին այցելեցին հանրապետութեան հիւսիս-արեւելեան մասին մէջ գտնուող շարք մը զօրամասեր:
Նախագահները հետեւեցան հրաձգային վարժութիւններու ընթացքին, նաեւ ծանօթացան նոր հրամանատարական կէտի պայմաններուն եւ մասնակցեցան զօրամասերէն մէկուն մէջ Սուրբ Գէորգ եկեղեցւոյ բացման արարողութեան:
Նախագահները այցելեցին նաեւ Մաղաւուզի քարածուխի հանք եւ ծանօթացան այնտեղ իրականացուող աշխատանքներուն:
Հայաստանի եւ Արցախի պետութիւններու ղեկավարներուն կ՛ուղեկցէին պաշտպանութեան նախարարները եւ բարձրաստիճան սպայական կազմի ներկայացուցիչները:
Միւս կողմէ Արցախի Հանրապետութեան Արտաքին Գործոց նախարար Կարէն Միրզոյեան ընդունեց սահմանային դիտարկման առնչութեամբ Արցախ ժամանած ԵԱՀԿ-ի գործող նախագահի անձնական ներկայացուցիչ Անճէյ Քասփրչիքը: Հանդիպման ընթացքին կողմերը քննարկեցին սահմանին տիրող իրավիճակը, ինչպէս նաեւ անդրադարձած են երկուստեք հետաքրքրութիւն ներկայացնող շարք մը կարեւոր հարցերու:
