ԻՐԱՆԻ ԵՐԿՐԱՇԱՐԺ.- ԱՏՐՊԱՏԱԿԱՆԻ ՀԱՅՈՑ ԹԵՄԻ ՊԱՏՄԱԿԱՆ ՎԱՆՔԵՐԸ ԱՆՎՆԱՍ
Թաւրիզի Ազգային Առաջնորդարանը, շաբաթասկիզբին յատուկ հաղորդագրութեամբ մը կը տեղեկացնէ թէ Շաբաթ Օգոստոս 11-ին, հիւսիսային Իրանի մէջ տեղի ունեցած երկրաշարժէն, անվնաս մնացած են Ատրպատականի Հայոց Թեմի պատմական զոյգ վանքերը` Սուրբ Թադէն եւ Սուրբ Ստեփանոսը:
Թեմի Առաջնորդ Գերպ. Տ. Գրիգոր Ծ. Վրդ. Չիֆթճեան, կապ հաստատեց զոյգ վանքերուն մէջ բնակող հնագիտական հիմնարկի պաշտօնեաներուն, ինչպէս նաեւ Իրանի մէջ Եունեսքոյի հետ կապի պատասխանատու` Տիկին Շէրլի Աւետեանին հետ եւ հետեւողական քննութիւններու արդիւնքները ցոյց տուին, թէ զոյգ վանքերու պատերուն վրայ չափագրուած նախկին ճաքաչափերը մնացած էին նոյն հեռաւորութեան վրայ, երբեք չ՛ազդուելով կատարուած ցնցումէն: Երկրա շարժը նաեւ ցնցած է Արցախն ու Մեղրիի շրջանը:
Նշենք թէ, Ատրպատականի Հայոց Թեմը զոյգ վանքերուն մէջ ձեռնարկած է սենեակներու վերադասաւորման աշխատանքին, յարմարաւէտ պայմաններ ստեղծելու համար տարեկան ուխտագնացութեանց ընթացքին:
