Արցախի Մէջ Հ.Օ.Մ.–ի Իրականացուցած Ծրագիրներուն Մասին Զեկուցում

Յուլիս 2-ին Ստեփանակերտի մէջ կայացաւ Հայ Oգնութեան Mիութեան Արցախի մասնաճիւղի 18-րդ տարեկան Ընդհանուր անդամական ժողովը: Արցախի շրջափակման եւ տարբեր հարցերու առկայութեան պատճառով հրաւիրուած ժողովը քննեց միաւորի վարչութեան 21-ամսեայ գործունէութիւնը եւ նախանշեց յառաջիկայ գործունէութեան հիմնական ուղղութիւնները: Ժողովին առցանց մասնակցեցաւ Հ.Օ.Մ.-ի Կեդրոնական վարչութեան անդամ Համեստ Պէօճեքեանը: Հաշուետու ժողովին ներկայ գտնուեցաւ ՀՅԴ Արցախի Կեդրոնական կոմիտէի անդամ Ալեոնա Գրիգորեանը: Ժողովի աւարտին ընտրուեցաւ Հ.Օ.Մ.-ի Արցախի միաւորի վարչութեան նոր կազմը` Լիլիթ Մարտիրոսեան, Մելանեա Բալայեան, Տաթեւիկ Յովհաննիսեան, Իրինա Գրիգորեան, Անահիտ Գասպարեան: Հ.Օ.Մ.-ի Արցախի միաւորի գործունէութեան ու կատարած աշխատանքներուն մասին զեկուցեց Հ.Օ.Մ.-ի Արցախի մասնաճիւղի վարչութեան ատենապետուհի Լիլիթ Մարտիրոսեանը: Ան նշեց` շրջափակման պայմաններու մէջ շատ դժուար էր նոյնիսկ Ընդհանուր անդամական ժողովի կայացումը ապահովելը, որովհետեւ վառելիքի սղութեան պատճառով շարք մը բնակավայրերու ընկերուհիներ չկրցան հասնիլ Ստեփանակերտ, իսկ Կեդրոնական վարչութեան անդամ Համեստ Պէօճեքեան ժողովին առցանց մասնակցեցաւ: Լիլիթ Մարտիրոսեան հաղորդեց, որ Հ.Օ.Մ.-ի Արցախի միաւորը` իբրեւ Արցախի մէջ արձանագրուած եւ գործող բարեսիրական-հասարակական կազմակերպութիւն, պետական կառոյցներու կողմէ ճանչցուեցաւ եւ համագործակցեցաւ Արցախի կառավարութեան, տարբեր նախարարութիւններու, պետական եւ հասարակական կազմակերպութիւններու հետ: «Հ.Օ.Մ.-ի Արցախի միաւորը` իբրեւ ուղեկից կազմակերպութիւն, համագործակցեցաւ ՀՅԴ Արցախի կառոյցին հետ, որուն իբրեւ արդիւնք` կազմակերպուեցան միացեալ ձեռնարկներ, վարչութիւնը ստացաւ փոխադարձ գործակցութիւն եւ օժանդակութիւն», ըսաւ Հ.Օ.Մ.-ի Արցախի միաւորի ատենապետուհին` աւելցնելով, որ շարք մը ծրագիրներ իրականացան նաեւ ՀՅԴ Արցախի երիտասարդական միութեան հետ: Մարտիրոսեանի խօսքով, հաշուետու ժամանակաշրջանին ՀՕՄ-ը Արցախի մէջ շարունակեց իրականացնել կրթութեան ոլորտի զարգացման միտուած իր մնայուն ծրագիրները: «2021-2022 ուսումնական տարուան համար Հ.Օ.Մ.-ի կրթաթոշակին արժանացաւ Մարտունի քաղաքի բնակչուհի, Երեւանի պետական համալսարանի «Եւրոպական լեզուներ եւ հաղորդակցութիւն» բաժանմունքի ուսանողուհի Անի Մկրտչեանը: 2022-2023 ուսումնական տարուան համար Կեդրոնական վարչութեան գնահատանքին ներկայացուեցան երկու ուսանողներու դիմումնագիրներ` Արցախի Ասկերանի շրջանի Խնածախ գիւղէն Պաւել Աւագիմեանին եւ նոյն շրջանի բռնագրաւուած Ակնաղբիւր գիւղէն Սօսէ Մարգարեանին. երկու ուսանողներն ալ բարձր յառաջադիմութեամբ ուսանած են Երեւանի Մխիթար Հերացի անուան պետական համալսարանին մէջ»: Հ.Օ.Մ.-ը Արցախի մէջ կ՛իրականացնէ նաեւ «Ուսանող» ծրագիրը: Հ.Օ.Մ.-ի Կեդրոնական վարչութեան մտայղացումով 2020-2022 ուսումնական տարուան համար ծրագրի շահառուները Արցախի բոլոր համալսարաններու 105 ուսանողներն էին, որոնք մասնակցեցան Արցախի 44-օրեայ պատերազմին: Արցախի պետական, «Մեսրոպ Մաշտոց», «Գրիգոր Նարեկացի», ինչպէս նաեւ Շուշիի արհեստագիտական համալսարաններու որոշ ուսանողներ 100-ական ամերիկեան տոլար դրամական պարգեւ ստացան: Արցախի դէմ սանձազերծուած պատերազմին պատճառով Արցախի մէջ գործող Հ.Օ.Մ.-ի 8 «Սօսէ» մանկապարտէզներէն 4-ը` Մեծ Թաղերու, Շուշիի, Տողի եւ Քարեգահի մանկապարտէզները, կը գտնուին թշնամիին կողմէ բռնագրաւուած տարածքներուն մէջ: Ներկայիս կը գործեն Հ.Օ.Մ.-ի 4` Ստեփանակերտի, Խնձրիստանի, Աշանի եւ Ակնաբերդի «Սօսէ» մանկապարտէզները: «Պատերազմի ընթացքին կրած մեծ կորուստներով հանդերձ, «Սօսէ» մանկապարտէզները կը շարունակեն գործել Հ.Օ.Մ.-ի Կեդրոնական վարչութեան եւ աշխարհասփիւռ Հ.Օ.Մ.-ուհիներու հոծ բանակի, ինչպէս նաեւ իրենց աշխատանքին ու առաքելութեան նուիրուած ընկերուհիներու, աշխատակիցներու շնորհիւ», ըսաւ ատենապետուհին: Հ.Օ.Մ.-ի Արցախի միաւորի ատենապետուհին հակիրճ խօսեցաւ իրականացուած այլ ծրագիրներու մասին եւս: 2021 թուականի դեկտեմբերին Հ.Օ.Մ.-ի Քանատայի միաւորին հանգանակած գումարով թշնամիին անմիջական ազդեցութեան տակ գտնուող Ասկերանի, Մարտունիի, Մարտակերտի, Շուշիի շրջաններու 22 համայնքներու 1190 երեխաներ ստացան 20 ամերիկեան տոլարի համարժէք ամանորեայ նուէրներ եւ 581 ընտանիք` 20-ական ամերիկեան տոլար դրամական նուէր: Ծրագիրը իրականացուեցաւ Արցախի կրթութեան, գիտութեան, մշակոյթի եւ մարմնակրթութեան նախարարութեան հետ համագործակցութեամբ: Արցախի 44-օրեայ պատերազմէն անմիջապէս ետք «Նահատակուած հերոսներու զաւակներ» ծրագրի ծիրին մէջ հաւաքուեցաւ Արցախէն 662 երեխայի մասին տեղեկութիւն: 2021-2023 թուականներուն ծրագրի շրջանակներուն մէջ փոխանցուեցաւ 411 երեխայի գումար: 2022 թուականի օգոստոս 3-ին Արցախի Մարտակերտի շրջանի Կոճողոտ գիւղի դպրոցականներուն համար Հ.Օ.Մ.-ի Արցախի միաւորի վարչութիւնը դպրոցի տնօրէնութեան հետ միասին 50 երեխայի համար կազմակերպեց միօրեայ հանգիստի ծրագիր: «2023 թուականի փետրուար 6-ին Սուրիոյ մէջ տեղի ունեցած ահաւոր երկրաշարժին պատճառով յառաջացած մարտահրաւէրներուն դիմակայող մեր հայրենակիցներուն օժանդակելու համար, արձագանգելով Հ.Օ.Մ.-ի Կեդրոնական վարչութեան կոչին, Հ.Օ.Մ.-ի Արցախի միաւորը, Արցախի կառավարութեան հետ համագործակցութեամբ, կազմակերպեց դրամահաւաք, որուն իրենց աշխուժ մասնակցութիւնը բերին` պետական կառոյցներու աշխատակիցները, ՀՅԴ Արցախի կառոյցը, Հ.Օ.Մ.-ի ընկերուհիները, աշխատակիցները, մանկապարտէզներու սանիկներու ծնողները, Արցախի տարբեր համայնքներու բնակիչները», տեղեկացուց Լ. Մարտիրոսեան` աւելցնելով, որ սուրիահայ համայնքը բարձր գնահատեց այս դժուարին պայմաններու մէջ Արցախէն իրենց հասած օժանդակութիւնը: 2022-ի Սեպտեմբեր-Դեկտեմբերին Հ.Օ.Մ.-ի «Թիկունք կանգնենք արցախահայ ընտանիքին» ծրագրի ծիրին մէջ աջակցութիւն տրամադրուեցաւ Քաշաթաղի շրջանէն 2022-ի օգոստոսին հարկադրաբար տեղահանուած Աղաւնոյ գիւղի այն 6 ընտանիքներուն (թիւով 21), որոնք բնակութիւն հաստատեցին Արցախի տարբեր բնակավայրերու մէջ: Հ.Օ.Մ.-ի Կեդրոնական վարչութեան, Հ.Օ.Մ.-ի Արցախի միաւորի վարչութեան եւ ՀՅԴ Արցախի Կեդրոնական կոմիտէի որոշումով Աղաւնոյ գիւղի մեր հայրենակիցներուն չորս ամիս շարունակ, ըստ ընտանիքներու շունչերուն, իւրաքանչիւրին տրամադրուեցաւ 40 հազար հայկական դրամ` իբրեւ աջակցութիւն: 2022 թուականի Սեպտեմբեր 23-ին Հ.Օ.Մ.-ի Կեդրոնական վարչութեան միջոցով Հ.Օ.Մ.-ի Միացեալ Նահանգներու Արեւմտեան շրջանի Շրջանային վարչութեան կողմէ 52 վիրաւորներուն տրամադրուեցաւ 200-ական ամերիկեան տոլար (80 հազար հայկական դրամ) նիւթական աջակցութիւն: Ծրագիրը իրականացուեցաւ Արցախի ընկերային զարգացման եւ գաղթի հարցերու նախարարութեան եւ Ստեփանակերտի Քերոլայն Քոքսի անուան վերականգնողական կեդրոնին հետ համագործակցութեամբ: Յետպատերազմեան շրջանին Արցախի մէջ իրականացուած ամէնէն մեծ ծրագիրներէն է Հ.Օ.Մ.-ի «Արեւային Արցախ» ծրագիրը, որուն նպատակն է ապահովել արցախահայութեան կեանքի բնականոն ընթացքը հայրենի հողին վրայ: Հ.Օ.Մ.-ի «Արեւային Արցախ» ծրագրի ծիրին մէջ 101 արեւային ջրատաքացուցիչներ տեղադրուեցան ընկերային խոցելի խաւերու եւ Արցախի 44-օրեայ պատերազմին նահատակ ունեցած ընտանիքներուն համար: Սարքաւորումներուն որոշ մասերու ներմուծման դժուարութիւններու, տուներու տանիքներու հետ կապուած հարցերու պատճառով որոշ առանձնատուներու մէջ տեղադրման աշխատանքները աւարտին չեն հասած: Արցախի ՀՅ Դաշնակցութեան Ստեփանակերտի «Արթուր Մկրտչեան» կոմիտէի նախաձեռնութեամբ, կազմաւորուեցաւ յանձնախումբ` Հ․Յ․Դ․ կուսակցութեան ուղեկից կառոյցներու, այդ շարքին` Հ.Օ.Մ.-ի վարչութեան անդամներուն հետ: Յանձնախումբը ապրիլ 7-ին Ստեփանակերտի մէջ կազմակերպեց ձեռնարկ մը` նուիրուած մայրութեան եւ գեղեցկութեան, Սուրբ Աստուածածնի Աւետման տօնին առիթով: Ձեռնարկին մասնակցեցան` արցախեան պատերազմներու ընթացքին նահատակուած Հ․Յ․Դ․ եւ ուղեկից կառոյցներու անդամներու կիներ, մայրեր, ՀՅԴ Արցախի կառոյցի ներկայացուցիչներ եւ Հ.Օ.Մ.-ի Արցախի միաւորի անդամներ: Յանձնախումբին յաջորդ ձեռնարկը նուիրուած էր Հայաստանի Ա. Հանրապետութեան տօնին: Հայոց պետականութեան վերականգնման` Հայաստանի Ա. Հանրապետութեան հիմնադրութեան 105 ամեակին առիթով Հ․Յ․Դ․ Արցախի երիտասարդական միութեան նախաձեռնութեամբ եւ Հ.Օ.Մ.-ի Արցախի մասնաճիւղի վարչութեան աջակցութեամբ, Ստեփանակերտի Մշակոյթի եւ երիտասարդութեան պալատին մէջ մայիս 29-ին կազմակերպուեցաւ տօնական ձեռնարկ, որուն ընթացքին երկու համարներով հանդէս եկան նաեւ Հ.Օ.Մ.-ի Ստեփանակերտի «Սօսէ» մանկապարտէզի սաները: Ծրագիրները ֆինանսաւորուեցան Հ.Օ.Մ.-ի Միացեալ Նահանգներու Արեւմտեան շրջանի Շրջանային վարչութեան կողմէ: «1992 թուականին մուտք գործելով Արցախ` Հ․Օ․Մ․-ը իր հետեւողական, յամառ աշխատանքով իրականացուց բարեսիրական, հասարակական եւ մարդասիրական շարք մը ծրագիրներ եւ նպաստեց կրթութեան, մշակոյթի, առողջապահութեան, ընկերային ու տնտեսական այլ ոլորտներու զարգացման: Հ․Օ․Մ․-ը իր կամաւոր անդամուհիներով 44-օրեայ պատերազմի օրերուն եւ անոր յաջորդած տարիներուն անգնահատելի ծառայութիւններ մատուցեց հայրենիքին, թիկունք կանգնեցաւ մեր հայրենակիցներուն, սատարեց զոհուած ազատամարտիկներու ընտանիքներուն, վիրաւորներուն, տեղահանուածներուն, սահմանին կանգնած հայ զինուորին եւ առ այսօր ալ կ՛աջակցի արցախցիին` թշնամիին կողմէ շրջափակման պատճառով Արցախի մէջ ստեղծուած մարդասիրական ճգնաժամի յաղթահարման գործին մէջ: Վստահ ենք, որ Հայ օգնութեան միութիւնը հաւատքով եւ նուիրումով պիտի շարունակէ իր առաքելութիւնը` հաւատարիմ մնալով Հ.Օ.Մ.-ի կարգախօսին` «ժողովուրդիս հետ, ժողովուրդիս համար», հաստատեց Հ.Օ.Մ.-ի Արցախի միաւորի ատենապետուհին:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

Արցախի Մէջ Հ.Օ.Մ.–ի Իրականացուցած Ծրագիրներուն Մասին Զեկուցում

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Սրբութեան Լուսաւոր Շողը` Ս.Իգնատիոս Մալոյեան

Երկար Ապրի Փաշինեանին «Ժողովրդավարութիւնը». Բանտերը Կը Լեցուին Դիմատետրեան Քննադատներով

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է