0
0
Բաւական անսպասելի կաղանդչէք՝ ձօն մը Պաքուին, կատարուած Սպիտակ Տան կողմէ, եւ յատկապէս նոյնինքն, յամառօրէն իր թեկնածութեան կառչած՝ Մէթիու Պրայզային:
Այսպէս Ա.Մ.Ն.-ի նախագահ Օպամա, մէկուկէս տարիէ աւելի թափուր մնացած թապուն լուծեց եւ դեսպանի պաշտօնին համար որդեգրեց այլընտրանք մը՝ այլ ճանապարհային քարտէս մը, թէեւ բաւական անակնկալ, սակայն նոյնքան մութ հարցադրումներով եւ յոռատեսութեամբ լեցուն: Ան կատարեց միջ-նստաշրջանային նշանակում մը, առանց Ծերակոյտի հաստատումին, երբ այս վերջինը կը գտնուէր ամանորի արձակուրդի մէջ: Նմանօրինակ նշանակում կը փաստէ թէ նախագահին եւ ծերակուտականներուն միջեւ լուրջ հակադրութիւն պիտի ստեղծուի, որովհետեւ ծերակուտականները զրկուեցան խորհուրդ եւ հաւանութիւն տալու իրենց սահմանադրական լիազօրութենէն: Իսկ աւելին, Պրայզայի դիւանագիտական պարտականութիւնները ինքնաբերաբար վայելած պիտի չըլլան Ծերակոյտի հովանաւորութիւնն ու վստահութիւնը:
Օպամա քաջատեղեակ է թէ, խնդրոյ առարկայ նշանակեալը, ԵԱՀԿ-ի Մինսքի խմբակի ամերիկացի նախկին համանախագահն էր, թէ ան (այսինքն Պրայզա) խիստ սերտ յարաբերութիւններ կը մշակէ Ատրպէյճանի քաղաքական գործիչներու հետ, որոնք նոյնիսկ բարեացակամութիւնը ունեցած են, Պոլսոյ մէջ, իր թուրք կողակից՝ Զէյնօ Պարանի հետ իր ամուսնութեան ծախսերը հոգալու: Յաւելեալ մանրամասնութիւններ եւ թուական պատկեր կարելի է ստանալ մեկենաս՝ Ատրպէյճանի ելեւմուտքի նախկին նախարարէն:…Կողակից տիկին Պրայզա մը, որ ղեկավարն էր Ատրպէյճանի հետ համագործակցող քարիւղի ընկերութիւններէն նիւթական յատկացումներ ստացող «Հատսըն» հիմնարկին:
Նոյնինքն Պրայզա մը, որ ամիսներ առաջ Ծերակուտականներ՝ Պարպըրա Պոքսըրի եւ Ռոպըրթ Մենենտէսի արծարծած հարցադրումներու եւ քննարկումներու ընթացքին, պապանձեց, կակազեց եւ կցկտուր պատասխաններ փոխանցեց: Ծերակուտականները մեղադրած էին Հայոց Ցեղասպանութիւնը պատշաճ կերպով չճանչնալու, Արցախի հարցին առնչութեամբ սահմանային խախտումները չդատապարտելու յանցանքներով եւ Նախիջեւանի մէջ, հայկական խաչքարերը, տեղւոյն ազերիներու կողմէ աւերելու հարցին մէջ անտարբերութիւն ցուցաբերելու:
Ինչպէ՞ս բացատրել նման «խիզախ եւ յանդուգն» որոշում, Սպիտակ Տան կողմէ: Յստակ է թէ, արտաքին քաղաքականութեան միջավայրէն ներս, Պրայզա կը վայելէ իր բարձրաստիճան եւ ազդեցիկ ընկերներու աջակցութիւնն ու երաշխաւորութիւնը, յատկապէս յանձինս արտաքին գործոց նախարար Հիլըրի Քլինթընի, որ պատրաստած էր այս անակնկալ ձօնը:
Ձօն մը, որ իր ծանր հետեւանքները պիտի ունենայ եւ ստեղծէ յաւելեալ բարդ եւ կողմնակալ կացութիւններ:
«Հայրենիք»
Յունուար 1, 2011
