Փարիզ.- «Սովորական Դատ Մը Չէ Մեր Դատը Եւ Ո՛չ Ալ կտոր մը հող վերադարձնելու Միտող Մասնակի Դատ Մը» Յայտնեց Արամ Ա. Կաթողիկոս

0 0
Read Time:2 Minute, 31 Second

 

cath4

ՓԱՐԻԶ.- Ուրբաթ, Յունիս 19-ին, Փարիզի խորհրդարանի հրապարակային ձեռնարկներու յատուկ սրահին մէջ տեղի ունեցող Հայ Դատին նուիրուած համագումարին բացումը կատարելով` Արամ Ա. կաթողիկոս յայտարարեց, թէ «Մեծի Տանն Կիլիկիոյ կաթողիկոսութեան կողմէ Թուրքիոյ Սահմանադրական դատարանին մօտ բացուած դատին նպատակը յստակ է.- Սիսի պատմական կաթողիկոսարանի վերադարձն է: Արդ, դատավարական ընթացքին առնչուած մօտեցումները պէտք չէ շփոթել դատին նպատակին հետ: Այս նպատակը իրագործելու համար սկզբունքային երկու մօտեցում ճշդուած է` կաթողիկոսարանի կալուածի վերադարձ եւ կաթողիկոսարանին մէջ կրօնական արարողութիւն կատարելու իրաւունքի վերահաստատում: Այս երկրորդ կէտը կենսական է հետեւեալ պատճառներով` ա) Կրօնական պաշտամունքի իրաւունքի վերահաստատումը բնական ընթացքով նաեւ կ’ենթադրէ կաթողիկոսարանի կալուածին վերադարձը: բ) Փոքրամասնութիւններու կրօնական պաշտամունքի իրաւունքներուն անդրադարձ եղած է Լոզանի դաշնագիրին մէջ: գ) Եւրոպայի մարդկային իրաւանց դատարանը յատուկ զգայնութիւն կը ցուցաբերէ կրօնական խղճի ազատութեան»:
Բացման նիստին, Ֆրանսայի խորհրդարանի Ընկերվարական կուսակցութեան ներկայացուցիչներու նախագահ եւ նախկին վարչապետ Պրունօ Լերու վերահաստատեց Ֆրանսայի ժողովուրդին ու կառավարութեան զօրակցութիւնը հայ ժողովուրդին եւ անոր արդար դատին: Ապա, անդրադարձաւ վեհափառ հայրապետին դերակատարութեան միջեկեղեցական ու միջկրօնական ծիրին մէջ եւ հրաւիրեց զինք, որ ներկայացնէ իր դասախօսութիւնը: Վեհափառ հայրապետին ֆրանսերէնով ներկայացուցած դասախօսութիւնը երեք բաժիններէ բաղկացած էր:cath3cath2
Դասախօսութեան առաջին մասին մէջ վեհափառ հայրապետը շեշտելով հանդերձ Հայոց Ցեղասպանութեան ճանաչման ուղղութեամբ տարուող աշխատանքներուն կարեւորութիւնը, կոչ ուղղեց առաջնահերթութիւն տալու մեր պահանջատիրութեան հատուցման երեսին: Այս ծիրին մէջ վեհափառ հայրապետը մէջբերումներ կատարելով միջազգային օրէնքի շարք մը փաստաթուղթերէն կարեւորութեամբ ընդգծեց հատուցման հրամայականը:
Երկրորդ բաժինով, Արամ Ա. կաթողիկոսը անդրադառնալով Անթիլիասի մայրավանքին մէջ Փետրուար 2012-ին հատուցման գծով տեղի ունեցած միջազգային համագումարին, ուրուագծային կերպով ներկայացուց յատկապէս եկեղեցապատկան ու ազգապատկան կալուածներու վերադարձին առնչուած շարք մը կարելիութիւններ ու դժուարութիւններ:
Վեհափառ հայրապետին դասախօսութեան վերջին կէտը առնչուած էր Թուրքիոյ Սահմանադրական դատարանին մօտ Մեծի Տանն Կիլիկիոյ կաթողիկոսութեան բացած դատին: Այս ուղղութեամբ վեհափառ հայրապետը կարգ մը տեղեկութիւններ փոխանցեց, ինչպէս նաեւ յստակեցումներ եւ ընդգծումներ կատարեց: «Սովորական դատ մը չէ մեր դատը եւ ո՛չ ալ կտոր մը հող վերադարձնելու միտող մասնակի դատ մը: Նկատի ունենալով Կիլիկիոյ կաթողիկոսարանի կրօնական, ազգային ու քաղաքական իմաստը եւ անոր ունեցած խորհրդանշական մեծ կարեւորութիւնը, մենք ուզեցինք զայն նկատի առնել իբրեւ առաջին հանգրուան մեր եկեղեցապատկան ու ազգապատկան կալուածներու վերադարձի պահանջին: cathՄեր մօտեցման մէջ ռազմավարական ու մարտավարական տուեալները առաւելագոյն չափով սերտուեցան մասնագէտներէ կազմուած յանձնախումբին կողմէ, ինչպէս նաեւ` առկայ իրաւական ու քաղաքական խոչընդոտները: Կը հաւատանք, որ իրաւական այս քայլը նոր ուժականութիւն մը պիտի տայ մեր պահանջատիրութեան` զայն բանալով նոր հորիզոններու դիմաց», ըսաւ վեհափառ հայրապետը:
Դասախօսութեան սկիզբը, Արամ Ա. իր գնահատանքը յայտնեց Ֆրանսայի ժողովուրդին ու կառավարութեան, Հայ Դատին իրենց բերած զօրակցութեան համար, ինչպէս նաեւ գնահատեց Ֆրանսայի Հայ դատի մարմինը իր տարած աշխատանքներուն համար: Ներկայ համագումարը կազմակերպուած էր Ֆրանսայի Հայ դատի գրասենեակին կողմէ եւ անոր նիւթն էր «Արդարութիւն եւ հատուցում»: Ներկայ էին Ֆրանսայի Հայոց թեմի առաջնորդ Վահան եպս. Յովհաննէսեան, Ֆրանսայի կաթողիկէ հայոց առաջնորդ Յովհաննէս եպս. Թէյրուզեան, եկեղեցական, քաղաքական եւ կուսակցական անձնաւորութիւններ, լրագրողներ:
Համագումարէն առաջ վեհափառ հայրապետը հանդիպում ունեցաւ երեսփոխան Լերուի հետ, որ միաժամանակ նախագահ Հոլանտի կարեւոր գործակիցներէն մէկն է: Սոյն հանդիպումին նաեւ ներկայ էին Վահան եպս. Յովհաննէսեան, Հ.Յ.Դ. Բիւրոյի անդամ Մուրատ Փափազեան եւ Ֆրանսայի Կեդրոնական կոմիտէի անդամներ: Արամ Ա. կաթողիկոս երեսփոխան Լերուին ներկայացուց Միջին Արեւելքին մէջ քրիստոնեաներու ներկայութեան կարեւորութեան հրամայականը եւ առաջարկ ներկայացուց, որ Ֆրանսայի կառավարութիւնը աւելի գործօն մասնակցութիւն բերէ Միջին Արեւելքի մէջ քրիստոնեայ համայնքներու պահպանման եւ քրիստոնեայ-իսլամ գոյակցութեան առաւել ամրապնդման աշխատանքներուն մէջ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles