ՊԱՀԱՆՋԱՏԻՐՈՒԹԻՒՆ ԵՒ ՀԱՏՈՒՑՈՒՄ…ՍԻՍԻ ԿԱԹՈՂԻԿՈՍԱՐԱՆ

0 0
Read Time:1 Minute, 36 Second
Լուսանկար՝ Նուպարեան գրադարան, Փարիզ
Լուսանկար՝ Նուպարեան գրադարան, Փարիզ

 

ՀԱՅՐԵՆԻՔ

Խմբագրական

Փետրուար 9, 2015

Սեպտեմբեր 2014-ին, Երեւանի մէջ կայացած Հայաստան-Սփիւռք հինգերորդ համաժողովին, Մեծի Տանն Կիլիկիոյ Արամ Ա. Կաթողիկոսը, արդէն իսկ անդրադարձած էր Կիլիկիոյ թագաւորութեան մայրաքաղաք՝ Սիսի մէջ գտնուող Կիլիկիոյ կաթողիկոսարանի մասին, եւ պաշտօնապէս տեղեկացուցած՝ թէ Թուրքիոյ Սահմանադրական դատարանէն ներս, դատ պիտի բացուի` պահանջելով պատմական կեդրոնի` Սիսի կաթողիկոսարանի վերադարձը իր իրաւատիրոջ` հայ եկեղեցւոյ եւ հայ ժողովուրդին:
Նախքան այդ համաժողովին կատարուած յայտարարութիւնը, աւելի քան երեք տարիներէ ի վեր, այս կարեւոր հարցին առնչութեամբ, արդէն իսկ շարք մը հանդիպումներ կատարուած են միջազգային իրաւունքի մասնագէտներու հետ:
Բեմահարթակէն պարզ ճառախօսական եւ զգացական լոզունքներ չէր արձակած Արամ Ա. Կաթողիկոսը, այլ պահանջատիրութեան եւ հատուցման իւրայատուկ աշխատանքի մը ձեռնարկած էր, որ ցնցիչ անդրադարձներ պիտի ունենայ:
Տեղին է արագ պատմական ակնարկով մը, հետաքրքրական տեղեկութիւններ փոխանցել այս կաթողիկոսարանին մասին: Հեթում Ա. թագաւորի կառուցած պալատն է, որ գրեթէ վեց հարիւր տարի ետք, 1810-ին կը վերածուի կաթողիկոսական համալիրի, յանձին Կիրակոս Ա. Աջապահեան կաթողիկոսին:
Նորակառոյց մայր տաճարը կը բարձրանայ թագաւորական տարիներու Սուրբ Սոփիայի աւերակներուն վրայ։ Այդ պատճառով ալ, Նոր վանք կը կոչուի կաթողիկոսական համալիրը, որ կը գտնուի քաղաքին հիւսիս-արեւմուտքը, բերդին բլուրին լանջին։
Այսպէս, 19-րդ դարու սկիզբը, երբ կը հիմնուի Նոր վանքը՝ Կաթողիկոսարանը, Հին վանքի եկեղեցին՝ Հին Վանքը, շուքի մէջ կը մնայ եւ վայրը կը վերածուի կրթօճախի մը:
Նոր տաճարը նոյնպէս կը կոչուի Սուրբ Սոփիա, որ ճարտարապետական տպաւորիչ գործ մըն է, օժտուած՝ շքեղ աւագ խորանով մը եւ նոյնքան տպաւորիչ կաթողիկոսական գահով մը։
Արամ Ա.-ի խօսքերով, զգացական մօտեցումով կամ քարոզչական նկատառումներով չէ, որ այս յանդուգն քայլին դիմուած էր, ոչ ալ սովորական եկեղեցապատկան կալուած մը կամ սրբատեղի մը պահանջելու մօտեցումով:
Կիլիկիոյ կաթողիկոսարանը պատմական, խորհրդանշական խոր իմաստ ունի համայն հայութեան համար:
Վերջերս, Արեւմտահայաստանէն ներս, բազմիցս հողաշերտի դատական հարցեր սկսած են արծարծուիլ Տիգրանակերտի օդակայանէն սկսեալ, մինչեւ Մուշի երկրորդական գիւղերէն հողաշերտեր, սակայն Սիսի կաթողիկոսարանի պարագան տարբեր է: Յառաջիկայ շաբաթներուն յատարուելիք, այս դատական հայցի նպատակն է, Ցեղասպանութեան հատուցման ծիրէն ներս, միջազգային հանրութեան ուշադրութիւնը հրաւիրել հայապատկան կալուածներու վերադարձի հարցին առնչութեամբ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles