ՈՒԱՇԻՆԿԹԸՆԻ ՄԷՋ Ա.Մ.Ն. ԱՐԵՒԵԼԵԱՆ ՇՐՋԱՆԻ ՀԱՅ ԴԱՏԻ ՅԱՆՁՆԱԽՈՒՄԲԻ ՏԱՐԵԿԱՆ ՄԵԾԱՐԱՆՔԻ ՀԱՆԴԻՍՈՒԹԻՒՆ

0 0
Read Time:3 Minute, 26 Second

2

Շաբաթ, Դեկտեմբեր 3-ին, Ուաշինկթընի Արլինկթըն շրջանի շքեղ «Ուեսթին» պանդոկի սրահին մէջ, տեղի ունեցաւ Ա.Մ.Ն. Արեւելեան շրջանի Հայ Դատի յանձնախումբի կազմակերպած մեծարանքի հանդիսութիւնը:
Իւրայատուկ էր այս տարուած ձեռնարկը, որովհետեւ կը նշէր իր տասնամեակը: Այդ պատճառով որոշուած էր կայացնել մայրաքաղաքին մէջ:
Ներկայ էին Հայաստանի եւ Արցախի հանրապետութեանց դեսպաններ՝ Գրիգոր Յովհաննիսեան եւ Գրիգոր Աւետիսեան:
Օրուան հանդիսավարն էր վաստակաւոր լուսանկարիչ՝ Սքաութ Թիւֆէնքճեան, որ բազմաթիւ հայկական գաղթօճախներ այցելած եւ լուսանկարած
է եւ անշուշտ պատրաստած նախագահ Օպամայի նկարազարդ ալպոմ մը:1

Թիւֆէնքճեան առաջին հերթին բեմ հրաւիրեց Անահիտ Տէրտէրեանը, որ Ա.Մ.Ն.-ի եւ Հայաստանի քայլերգներով, կատարեց բացումը: Ապա, Ա.Մ.Ն. Արեւելեան Շրջանի Առաջնորդական Փոխանորդ Եպիսկոպոս Անուշաւան Դանիէլեան, կատարեց Տէրունական աղօթքը:
Թիւֆէնքճեան պաշտօնապէս բացուած նկատելով մեծարանքի երեկոն, յայտնեց թէ իրեն համար պատիւ է նմանօրինակ ձեռնարկի մը հանդիսավարութիւնը ստանձնելը: Ապա, Թիւֆէնքճեան բեմ հրաւիրեց Ա.Մ.Ն. Արեւելեան շրջանի Հայ Դատի յանձնախումբի ատենապետ Սթիւ Մեսրոպեանը, որ իր խօսքին մէջ յայտնեց թէ դժուար տարի մը բոլորեցին Հայ Դատի յանձնախումբերը, կրկնապատկելով իրենց գործունէութեան դաշտը, յատկապէս Ապրիլի քառօրեայ օրերուն: «Մեր պարտականութիւնն է շարունակ արթուն մնալ, անցուդարձերուն հետեւիլ, գործել, միջամտել, կապեր հաստատել: Եւ այդպէս ալ պիտի շարունակենք մեր ուղղին, ամէնայն հետեւողականութեամբ, ամենայն նուիրումով եւ ամենայն հաւատքով…», ըսաւ Մեսրոպեան:
Ընթրիքէն ետք, յատուկ յուշանուէրներ յանձնուեցան Հայ Դատի բնագաւառէն ներս գործող ակադեմականներ՝ Լեւոն Աւտոյեանի եւ Ռոճըր Սմիթի, որոնք բեմ հրաւիրուեցան յաջորդաբար Արամ Համբարեանի եւ Կարին Շամլեանի կողմէ:3

Պատմագէտ Լեւոն Աւտոյեան, որ նաեւ արժանացած է «Մովսէս Խորենացի» մետալին, շնորհակալութիւն յայտնեց եւ եզրակացուց թէ իր պարտականութիւնն է ծառայել հայութեան, անոր պատմութեան, մշակոյթին եւ դատին: Իսկ Ռոճըր Սմիթ խօսք առնելով յայտնեց թէ, Ցեղասպանութեան Միջազգային Հիմնարկէն ներս ծառայելով, մօտէն քաջատեղեակ է Հայ Դատի գործունէութեան: Ան յայտնեց թէ պիտի շարունակէ իր ներդրումը ունենալ յաչս Հայոց Ցեղասպանութեան ճանաչման:
Ցուցադրուցաւ քանի մը վայրկեան տեւողութիւն ունեցող վաւերագրական մը, որուն մէջ կը ներկայացուէր Հայ Դատի գործունէութիւնը:
«Վահան Քարտաշեան» շքանշան ստացան Ճոն Ճերիկեան, Լեւոն Բալեան եւ Թոմ Վարդապետեան (յետ մահու):
Ճոն Ճերիկեանին բեմ հրաւիրողն էր Ամերիկայի Հայ Մշակութային Միութեան պատասխանատու եւ Ռիչմընտի շրջանի Հայ Դատի գործօն անդամ՝ Պետրոս Պանտազեան: Ճերիկեան յուզմունքով անդրադարձաւ թէ ինք պիտի մնայ հայութեան ծառայողը, եւ այդ բոլոր բնագաւառներէն ներս:
Ուաշինկթընի շրջանէն Սեպուհ Ասատուրեան ներկայացուց շրջանի հաւատաւոր եւ ալեհեր ընկերներէն՝ Լեւոն Բալեանը (97 տարեկան), որ իր խօսքին մէջ յայտնեց թէ ինքզինք կը զգայ երիտասարդ եւ շարունակ պատրաստ՝ գործելու ի նպաստ Հայ Դատին: «120 տարեկան չեմ, այլ միայն 97 գարուններ բոլորած եմ», յայտնեց Բալեան զուարճացնելով ներկաները:4
Պոսթընի Հայ Դատի յանձնախումբէն ներս գործող Ցոլին Սարեան ներկայացուց Թոմ Վարդապետեանը, որ դժբախտաբար քանի շաբաթ առաջ մահացած էր: Սարեանի խօսքին հետ կ՛ընկերակցէին լուսանկարներու սահիկներ: Թոմի դուստրը՝ Սօնան ներկայացած էր ստանալու այս յուշանուէրը: Ան իր խօսքին մէջ կրկնեց թէ իր հօր համար ազգին ծառայելը ամէն բանէ վեր էր:
«Ազատութիւն» շքանշանով պարգեւատրուեցան Արցախի Հանրապետութեան նախագահ՝ Բակօ Սահակեան եւ ծերակուտականներ՝ Քրիսթոֆըր Վան Հոլըն կրտսեր (Մերիլենտ – Դեմոկրատական) եւ Մարք Քըրք (Իլինոյ – Հանրապետական):
Հայ Դատի Ուաշինկթընի գրասենեակի պատասխանատու Ռաֆֆի Համբարեան ներկայացուց Արցախի հանրապետութեան նախագահը, օրինակներ մէջբելով Մարթին Լութըր Քինկէն: Նախագահ Սահակեան յատուկ պատրաստուած երիզով մը ելոյթ ունեցաւ, որուն մէջ շնորհակալութիւն յայտնեց Հայ Դատի Ա.Մ.Ն. Արեւելեան շրջանի Հայ Դատի յանձնախումբին: Ան շեշտեց թէ միասնաբար գործելով կարելի եղած է պաշտպանել Արցախի եւ Արցախահայութեան շահերը:
Ծերակուտականներ՝ Քրիսթոֆըր Վան Հոլըն կրտսեր բազմազբաղ ըլլալով չէր կրցած ներկայ ըլլալ այս հանդիսութեան: Այս առթիւ, ան շնորհակալագիր մը յղած էր Հայ Դատի յանձնախումբին, որ կարդացուեցաւ: Վան Հոլըն, իր նամակին մէջ կը նշէր թէ ինք միշտ ալ պատրաստ է պաշտպանելու Հայ Դատի արծարծած հարցերը:
Կրէկ Պետեան ներկայացուց Ծերակուտական Մարք Քըրքը եւ զինք բեմ հրաւիրեց: Հակառակ կաթուածահար ըլլալուն, Քըրք ամենայն ինքնավստահութեամբ եւ յենուելով իր անդացուպին բեմ բարձրացաւ եւ յայտնեց թէ, որքան կարեւոր է պայքարիլը, եւ այդ ալ ամէն իմաստով: Իր անձնական առողջապահական վիճակէն եւ քաղաքական գործունէութենէն օրինակներ բերելով, ան շեշտեց թէ շարունակ պայքարելով կարելի է հասնիլ արդիւնքի: Ան կրկնեց թէ պիտի մնայ հայութեան բարեկամը, եւ յատկապէս Իլինոյի մէջ ամէն գնով ինքզինք ի սպաս պիտի դնէ հայութեան:
Փակման խօսքը փոխանցեց, Ա.Մ.Ն. Արեւելեան Շրջանի Կ.Կ.-ի ներկայացուցիչ Հայկ Օշականը, որ շեշտեց թէ Հայ Դատի աշխատանքը տարուէ տարի կը բազմանայ եւ բազմաթիւ նահանգներէ ներս արդէն իսկ կը գործեն կորիզներ:
Օշական շնորհակալութիւն յայտնեց կազմակերպող յանձնախումբին, որ ամենայն բծախնդրութեամբ գործած էր, եւ լաւապէս կազմակերպած՝ այս մեծարանքի ձեռնարկը:
Գեղարուեստական յայտագրով ելոյթ ունեցաւ Անդրանիկ Մելիքսէթեան, որ հմտօրէն հրամցուց քանի մը կտորներ, խանդավառելով ներկաները:
Փակման աղօթքը կատարեց Ա.Մ.Ն. Արեւելեան Շրջանի Առաջնորդական Փոխանորդ Եպիսկոպոս Անուշաւան Դանիէլեան:

ԹՂԹԱԿԻՑ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles