ՆՈՐՎԵԿԻԱԿԱՆ ԱՌԱՍՊԵ՞Լ…

0 0
Read Time:1 Minute, 57 Second

1 khemp

ՀԱՅՐԵՆԻՔ

Խմբագրական

Ապրիլ 7, 2015

“Հայ ազգի պատմութիւնը ամբողջութեամբ փորձարկում է: Գոյապահպանութեա՛ն փորձարկում“

Հայ ժողովուրդին մօտիկ բարեկամ՝

Նորվեկիացի Ֆրիտեոֆ Նանսէն (1861-1930)

 

Հայորդիէն աւելի Ֆրիտեոֆ Նանսէն (տեսնել.-  http://hairenikweekly.wpengine.com/2015/04/08/21554) պիտի վրդովէր եւ ընդվզէր, իր պատկանած երկրի՝ Նորվեկիոյ վարչապետ Էրնա Սոլպերկի “չոր եւ տափակ“ յայտարարութիւններէն:

Պարզ զարմանքի մը կամ անախորժ անակնկալի մը առջեւ գտնուած պիտի չըլլար այս գթասիրտ հայասէրը, որ Հայոց Ցեղասպանութեան յաջորդող տարիներուն, եղաւ հայ գաղթականութեան հոգատար պահապանը եւ մինչեւ իր հրաժեշտը՝ կեանք կոչեցեալ բնագաւառէն, ամէն ճիգ ի գործ դրաւ վերապրող հայութեան խոր վիշտը ամոքելու եւ սպիները դարմանելու։

Վարչապետ Սոլպերկ շեշտած էր, թէ իր երկիրը՝ Նորվեկիան, վարչապետի եւ արտաքին գործոց նախարարութեան մակարդակով պիտի չմասնակցի ձեռնարկներուն, եւ փոխարէն միայն Հայաստանի մէջ Նորվեկիոյ աւագ դեսպանն է, որ իր մասնակցութիւնը պիտի բերէ:

Աւելի՛ն, Սոլպերկ առանց բառերը ծամծմելու եւ պատճառաբանութիւններ գտնելու, յանդգնութիւնն ու քաջութիւնը ունեցաւ յայտնելու թէ Թուրքիոյ հետ երկկողմանի յարաբերութիւններու ամրապնդումը շատ աւելի կարեւոր է իր երկրին համար: Սակայն այս մէկը, երբեք կարելի չէ արդար եւ ընդունելի մօտեցում նկատել երկրի մը համար, որ կը նկատուի աշխարհի ամենէն աւելի ոչ թէ՛ միայն քաղաքակրթուածն ու յառաջդիմածը, այլ նաեւ արդարամիտ հեղինակութիւն եւ յարգանք վայելողը:

Ա. Համաշխարհային պատերազմէն դրուագ մը բաւարար է որ վերոյիշեալ ներկայացումը արտացոլացուի: Արդարեւ, պատերազմի ազդանշանէն իսկ, Նորվեկիա չէզոքութիւնը ընտրեց, եւ այդ իսկ պատճառաւ տնտեսական լուրջ դժուարութիւններու առջեւ գտնուեցաւ, մանաւանդ երբ Միացեալ Նահանգները կողմ ըլլալով, արգելք հանդիսացան դէպի Նորվեկիա ապրանքներու առաքման։ Նոյնինք Նանսէնի վիճակուեցաւ դիւանագիտական նոր առաքելութիւն մը, Ուաշինկթընի մօտ, տնտեսական արգելքը վերցնելու բանակցութեանց համար։ Այդ առաքելութիւնը մեծ յաջողութեամբ աւարտեց Նանսէն, որ տասնեակ տարիներ առաջ, նոյնքան ճկուն քաղաքականութիւն որդեգրելով, կերտած էր իր երկրի անկախութիւնը: Ապա, ականատես ըլլալով մարդկային դաժանութիւններու, որոնց կարգին Հայոց Ցեղասպանութեան, Նանսէն մօտէն առընչուեցաւ եւ եղաւ լիազօր յանձնակատար՝ ժողովուրդներու դէմ գործուած ողբերգութեան եւ յատկապէս գաղթականական հարցերով։

Անցեալի այս Նորվեկիական հեղինակութեան դիմաց, ակնթարթ մը եթէ նշենք ներկայ վարչապետարանի խորհրդական Պաարտ Կլատ-Փետերսենի այն խուսափողական յայտարարութիւնը թէ պատմական նիւթերը պէտք է պատմագէտներուն ձգել եւ.- “Թէ հայոց այս նիւթը վերջին տարիներուն յաճախակիօրէն վիճաբանութեան առարկայ կը դառնայ, սակայն Մ.Ա.Կ.-ի որոշումներով յայտնի է, թէ ի՛նչ բան ցեղասպանութիւն կը նկատուի, ի՛նչ բան չի նկատուիր: Այդ պատճառով, ձգենք, որ արժեւորումները կատարեն պատմագէտները“…Ըստ երեւոյթին շատ բան փոխուած Օսլոյի մէջ:

Հեղինակութիւնն է որ կը բացակայի եւ առ այդ բնական է որ այլ երկիրներու մէջ կատարուելիք ձեռնարկներուն ընթացքին ալ, Նորվեկիան ներկայանայ ոչ բարձր մակարդակի եւ միայն շրջաններէն ներս գործող պատուիրակութիւններով:

Նորվեկիական առասպե՞լ…Աւա՜ղ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “  ՆՈՐՎԵԿԻԱԿԱՆ ԱՌԱՍՊԵ՞Լ…

  1. Shame on Norway..
    But this unhuman Prime Minister knows the history? Or everything for her is material interest?

Leave a Reply

Your email address will not be published.

Social profiles