ՄՏՈՐՈՒՄՆԵՐ.- ՀԱՅԱՍՏԱՆԻ ՏՆՏԵՍԱԿԱՆ ԶԱՐԳԱՑՈՒՄՆ ՈՒ ՎԵՐԱԿԱՆԳՆՈՒՄԸ ԹԷ՛ ԱՆՀՐԱԺԵՇՏ Է ԵՒ ԹԷ՛ ՀՆԱՐԱՒՈՐ

0 0
Read Time:3 Minute, 3 Second

p4economy-year2

 

ԱՅՎԱԶ ԳՐԻԳՈՐԵԱՆ

Մարտ 11, 2015

 

Հայաստանի տնտեսական վերականգնումը անհրաժեշտ է, որովհետեւ առանց դրան մեր երկրի հասարակական որեւէ բնագաւառ՝ գիտութիւն, արուեստ, մշակոյթ ու նաեւ ժողովրդավարութիւն զարգանալու հնարաւորութիւն չեն ունենայ։

Հայաստանի տնտեսական վերականգնումը նաեւ հնարաւոր է, որովհետեւ մեր ժողովուրդը (Հայաստան¬Սփիւռք) բոլոր առումներով մեծ կարողականութեամբ օժտուած ժողովուրդ է, մնում է միայն լաւապէս օգտուել այդ կարողականութիւնից։

Հայաստանի տնտեսական վերականգնումը միեւնոյն ժամանակ համազգային հարց է եւ համազգային հարցերը համազգային ճիգերով կարելի է լուծել եւ եթէ որեւէ քաղաքական կազմակերպութիւն կամ կրօնական յարանուանութիւն ժողովրդականութիւն ձեռք բերելու միտումով, փորձէ միայնակ այն լուծել, ոչ թէ կը նպաստէ մեր երկրի տնտեսական զարգացման, այլ ան կը խոչընդոտէ։ Այսպիսի հարցերը չի կարելի մենաշնորհի վերածել։

Սփիւռքի հայութեան մէջ ազգային պատկանելութեան եւ պատասխանատուութեան ու յանձնառութեան զգացումն ու գիտակցութիւնը արթնացնելու ու խթանելու նպատակով պէտք է Սփիւռքի հայերին Հայաստանի քաղաքացի դարձնել։

Սփիւռքի հայութեան մէջ Հայաստանի քաղաքացի դառնալու ցանկութիւն ստեղծելու նպատակով մեր կրօնական հաստատութիւնները, քաղաքական կազմակերպութիւնները, տարբեր բնոյթի միութիւնները եւ խմբաւորումները համատեղ ջանքերով միջոցառումներ ու հաւաքներ կազմակերպելով եւ արդիական հաղորդակցութեան բոլոր միջոցներից՝ լրատուամիջոցներից, մամուլից, համացանցից եւ էլեկտրոնական նամակից ու այլ միջոցներից օգտուելով կարող են մատնանշուած ցանկութիւնը առաջացնել հայ համայնքներում ի միջի այլոց տարբեր կազմակերպութիւններն ու հաստատութիւնները, որոնցից որոշները, որոնք յաւակնում են, որ ունեն հազարաւոր անդամներ ու համակիրներ, առանձնաբար կարող են յիշեալ միջոցներին դիմել իրենց շրջանակներում, սակայն այս բոլորը կարելի է անել ժողովրդի ու տարբեր մարդկանց կարծիքն ու տեսակէտը լսելով եւ հարցը ժողովրդի սեփականութիւնը դարձնելով, քանզի որեւէ հասարակական հարց իր լուծումին կարող է հասնել ժողովրդի մասնակցութեամբ։

Հայաստանի տնտեսական վերականգնումը խթանելու համար մեր յարանուանութիւնները, քաղաքական կազմակերպութիւնները եւ տարբեր միութիւններն ու խմբաւորումները միասնաբար կարող են հրաւիրել ու համախմբել Սփիւռքի հայ գործարարներին, ձեռնհաս ու մասնագէտ մարդկանց միջոցով կարող են մեր երկրի տնտեսական կացութեան մասին նրանց տեղեկութիւններ փոխանցել։

Հայ գործարարները կամ նրանցից ոմանք կարող են համախմբուել, մեծ ընկերութիւններ ստեղծել եւ որպէս արտասահմանեան մեծ ու նիւթապէս հզօր ընկերութիւններ մուտք գործել Հայաստան եւ այնտեղ ներդրումներ կատարել։ Գիտենք, որ Հայաստանում առանձին գործարարներ, իրենց գործունէութեան ընթացքում, խոչընդոտների են հանդիպում, սակայն մեր յիշած մեծ ու նիւթապէս հզօր արտերկրեան ընկերութիւնները, իբրեւ արտասահմանեան մեծ ու հզօր ընկերութիւններ խոչընդոտների չեն հանդիպի, ինչպէս որ նման խոչընդոտների չեն հանդիպում Հայաստանում գործող բազմազգեան հզօր ընկերութիւնները։

Վերը յիշուած ընկերութիւնները, որոնց բաժնեկիցները հայեր են, հաւանաբար այլ օտար ընկերութեանց նման իրենց շահը արտասահման չեն փոխադրի, այլ այդ շահով աւելի կþընդարձակեն իրենց գործունէութիւնը եւ նոր աշխատատեղեր կը ստեղծեն եւ կը բարձրացնեն հայրենաբնակ մեր ժողովրդի կենսամակարդակը։

Մեր յիշած ընկերութեանց յաջողութեան պարագային, մեծ հաւանականութեամբ Սփիւռքում կþառաջանան նման այլ ընկերութիւններ, նոր թափ հաղորդելով Հայաստանի տնտեսական վերականգնմանը։

Վերոնշեալ ընկերութիւնները, յաջողութեան պարագայում, կարող են բաժնեթղթային դրութիւն ստեղծել, հայ պարզ աշխատաւորներին մասնակից դարձնել իրենց ներդրումներին եւ տնտեսական ներդրումները ժողովրդականացնել։

Հայաստանն իր ճարտարարուեստը կամ այսպէս ասած՝ տեխնոլոգիան զարգացնելու համար կարիքն ունի իւրացնելու արեւմտեան ճարտարարուեստը։

Սփիւռքում՝ յատկապէս արեւմտեան երկրներում, կան բազմաթիւ մասնագէտ ու վարպետ հայ հանգստեան կոչուած արհեստաւորներ, սրանց եւս վերոյիշեալ ձեւերով կարելի է համախմբել, կարելի է հայ գործարարների ջանքերով մեր երկրում արհեստագիտական դպրոցներ բացել եւ յիշեալ մասնագէտների երթուդարձի ու կեցութեան ծախսերը հոգալով, կարելի է նրանց՝ իբրեւ կամաւոր դասատուներ Հայաստան ուղարկել յիշեալ դպրոցներում դասաւանդելու եւ իրենց հարուստ փորձը հայրենի երիտասարդութեան փոխանցելու նպատակով։

Յիշեալ արհեստագիտական դպրոցների պատասխանատուները հաւանաբար կը կարողանան յիշեալ դպրոցների շրջանաւարտների համար համապատասխան գործ գտնել։

Մասնագէտ արհեստաւորներից ոմանք կամ շատերը հաւանաբար իրենք կը հոգան իրենց երթուդարձի եւ կեցութեան ծախսերը եւ նրանք արհեստագիտական դպրոցներում դասաւանդելով ոչ միայն օգտակար կը դառնան մեր երկրին, այլեւ կþիմաստաւորուի իրենց կեանքը եւ հոգեկան բաւարարութիւն կը զգան։

Գործարարներից ու մասնագէտ արհեստաւորներից բացի կարելի է համախմբել նաեւ հայ բժիշկներին, գիտնականներին եւ թերեւս նաեւ Սփիւռքի հասարակական այլ շերտերին, որոնք մեծ թիւ ու մեծ ուժ են ներկայացնում։ Օրինակ Աւստրալիայում մենք ունենք շուրջ 70 բազմամիլիոնատէր գործարարներ եւ համարեայ նոյնքան էլ իրաւաբանական տարբեր ոլորտներում աշխատող իրաւաբաններ եւ Աւստրալիահայ գաղութը Սփիւռքի համեմատաբար երիտասարդ եւ փոքր գաղութներից է։

Հայաստանում բազմազաւակութիւնը քաջալերելու համար եւս կարելի է համախմբել հասարակական տարբեր շերտերի։

Այս բոլորը իրականացնելու համար համապատասխան մասնագէտների օգնութեամբ կարելի է կազմել ճշգրիտ նախագծեր։

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles