ՄԱՔՍԱՅԻՆ ՄԻՈՒԹԵԱՆ ՄՈՒՏՔԻ ԿԱՄ… ՃԱՄԲՈՒ ԱՆՈՐՈՇ ՔԱՐՏԷՍԻ ՍԵՄԻՆ

0 0
Read Time:1 Minute, 35 Second

p1 khemp

 ՀԱՅՐԵՆԻՔ

Խմբագրական  

Աշխարհի զանազան գաղթօճախներու նման, Պելոռուսիոյ հայութիւնն ալ, յատկապէս մայրաքաղաք Մինսքի մէջ, կը նշէր »Հայոց Ցեղասպանութիւն« հպարգելքը: Այդ օրերուն, նաեւ տեղւոյն գաղութը ականատես կ՛ըլլար Հայաստանի ապագան կերտող այլ կարեւոր հանդիպումի մը: Արդարեւ, Պելոռուսիոյ նախագահ Լուքաշենքոյի հիւրընկալութեամբ, Ռուսաստանի եւ Ղազախստանի նախագահներ՝ Փութինի եւ Նազարպաեւի մասնակցութեամբ կատարուած էր Եւրասիական բարձրագոյն տնտեսական խորհուրդի աշխատանքային կարեւոր նիստը, որուն ընթացքին քննուած էր Հայաստանի՝ Մաքսային Միութեան անդամակցութեան «ճամբու քարտէս»ի իրականացման գործընթացը:
Այս գծով, երեք երկիրներուն նախագահները հաւանութիւն տուած էին Մաքսային միութեան եւ Միասնական տնտեսական տարածքին Հայաստանի, սոյն միութեան ճամբու քարտէսի իրականացման ուղղութեամբ մինչեւ այսօր կատարուած աշխատանքին:
Հոս, տեղին է նշել թէ, անցեալ աշնան սկսած էին այս միութեան հիմնադրման գծով աշխատանքները: Հայաստանի նախագահ Սերժ Սարգսեան շտապ որոշումով մը, Սեպտեմբեր 3, 2013-ին բեմահարթակներէն բարձրաձայն յայտարարած էր թէ իր երկիրը մտադրած է Մաքսային միութեան անդամակցիլ, եւ ոչ թէ երկու ամիս ետք՝ Նոյեմբեր 2013-ին, Եւրոպական Միութեան հետ կնքել խոր եւ համապարփակ ազատ առեւտուրի գօտիի մասին համաձայնագիր։
Բնականաբար, այսպիսի անխոհեմ եւ արագ որոշում, օրին եւ ցայսօր ուղղակիօրէն իր ազդեցութիւնը ունեցած էր, յատկապէս Եւրոպայի հետ որ տարիներէ ի վեր գործի լծուած է Եւրոմիութեան սահմանները դէպի արեւելք ընդլայնելու:
Անցեալ աշնան սկսած այս ճամբու քարտէսը, բազմաթիւ դժուարութիւններու հանդիպեցաւ, որոնց ամենէն աւելի վիթխարին՝ Ուքրայինայէն ներս ստեղծուած ներկայ կացութիւնը: Հոս բառին բուն իմաստով ճամբու անորոշ քարտէս մըն է որ ուրուագծուած է, սկսելով մայրաքաղաք Քիեւէն եւ փոխադրուելով ռուսամէտ Օտեսայի թերակղզին, Տոմպասի եւ Արեւելեան այլ շրջաններ, որոնք կը կազմեն երկրի ծանր ճարտարարուեստի առիւծի բաժինը:
Մաքսային Միութեան եւ միասնական տնտեսական տարածքին Հայաստանի միանալու մասին փաստաթուղթը պիտի պատրաստուի մինչեւ Յունիս 1 եւ ապա ներկայացուի պետութիւններու ներկայացուցիչ՝ նախագահներու քննարկումին Եւրասիական բարձրագոյն տնտեսական խորհուրդի նիստին, որ տեղի պիտի ունենայ Ղազախստանի մայրաքաղաք՝ Ասթանայի մէջ, Մայիս 29-ին:
Հետաքրքրականը այն է թէ, մինչեւ փաստաթուղթի ստորագրումը տեղադրուած հաղորդագրութեան մէջ, ճամբու քարտէսի 126 կէտերէն, որոնք պէտք է կատարուին , 111-ը իրականացուած են, իսկ 15-ը կ՛ընդգրկուին Մաքսային միութեան եւ Միասնական տնտեսական տարածքին Հայաստանի միանալու բուն փաստաթուղթին մէջ:
Մինչեւ Ասթանա, յստակ է ճամբու քարտէսը…ետքն է հարցականը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles