ՄԱԿԱՐԸ ՀՈԳԵԳԱԼՍՏԱԿԱՆ ԵՐԱԶ ՏԵՍԵՐ Է

0 0
Read Time:2 Minute, 29 Second

balian

Մակար,

Յուլիս 2, 2015, ի Պերիտոն

 

Հեռաձայնի զի՝լ զանգ: Յուլիս: Շոգ: Յետմիջօրէ: Պարտէզի հողէն կրակ կ’ելլէ:

Արմենակն էր:

– Մակա՛ր, երազահան ունի՞ս, երազ կրնա՞ս մեկնաբանել:

– Մօրմէս մնացած հատոր մը կայ: Ի՞նչ պիտի ընես:

– Երազ մը տեսայ: Չեմ գիտեր քնացա՞ծ էի, թէ՞ արթուն: Գամ եւ խօսինք:

Ժամ մը ետք, եկաւ Էլպիսին հետ: Սեղանը զարդարուեցաւ զովացուցիչներով: Եթէ չգային, պիտի զրկուէի, քանի որ շաքար կը պարունակեն եւ առողջութեան համար լաւ չէ:

Կիները խոհանոց գացին:

– Է՛հ, Արմենակ, ի՞նչ երազ տեսար, ձրի թատրո՞ն գացիր:

– Այսպէս բան չէր պատահած: Տեղ մըն էի, մարդիկ զբաղած էին, ականջակալներ ունէին, կը խօսէին տարբեր լեզուներ, պատառիկներ կ’իմանայի, արաբերէն, ֆրանսերէն, անգլերէն, սպաներէն, թրքերէն, լեզուներ՝ որոնք չինարէնի եւ հնդկերէնի կը նմանէին, երբեմն ալ հայերէն բառեր:

– Երազեր ես Մ.Ա.Կ.ի ժողովին ներկայ ըլլալ, հայկական հարցի մասին խօսելու:

– Զիս ձեռք մի՛ առներ եւ լսէ՛: Մէկուն եւ միւսին ետեւէն կը վազէի, հազիւ կը պատասխանէին հարցումներուս: Հասկցայ, որ քաղաքին բոլոր բնակիչները հայ էին, կը խօսէին տարբեր լեզուներ: Հարցուցի, թէ ո՞վ որու հետ կը խօսէր եւ ո՞ր լեզուով: Երիտասարդ մը շուարումս տեսնելով, ականջակալները հանեց եւ ամերիկեան շեշտով հայերէնով հարցուց, թէ ի՞նչ կ’ուզէի:

–  Ո՞ւր կը գտնուիմ, այս մարդիկը ո՞վ են, ինչո՞ւ ականջակալ ունին:

– Հոս հայերուն տիեզերական քաղաքն է: Մենք ստեղծեցինք: Լիբանանէն, Սուրիայէն Արժանթինէն, Ամերիկայէն, Քանատայէն, Ֆրանսայէն, Գերմանիայէն, Չինաստանէն, Քամչաթքայէն, Ռուսիայէն, Վրաստանէն, Թուրքիայէն եւ Հայաստանէն եկած են բոլոր հայերը: Ազատ եւ ապահով: Իւրաքանչիւրը կը խօսի իր լեզուն, բայց զիրար կը հասկնան: Մեծ մասնագէտներ ունինք արուեստական ուղեղի, Քեավարի մէջ համակարգիչներու մեծ կեդրոն կայ, անցեալի նախնական Սիլիքոն վալլիէն լաւ: Իւրաքանչիւրը կը խօսի իր լեզուն, կեդրոնը անմիջապէս կը թարգմանէ եւ իւրաքանչիւրը կը լսէ իր գիտցած լեզուով:

– Խիստ հետաքրքրական,- ըսի,- հայ ազգի միացման գաղտնիքը գտեր ես: Յետո՞յ…

– Ապա ըսաւ, որ մարդիկ բեմ կ’ելլեն, կը խօսին իրենց լեզուով, ոչ ոք կը դժգոհի, կը հասկնան զիրար: Գիրք, թերթ, թուայնացած են, գրականութիւն, իմաստասիրութիւն: Ալէնը ֆրանսերէն կը գրէ, Չիչէքօղլուն՝ թրքերէն, Պոպը՝ ամերիկերէն, Խուանը՝ սպաներէն, Վլատիմիրը՝ ռուսերէն, ամէն մէկը իր լեզուով, եւ հայ գրականութիւն կը ստեղծուի, ալ չենք ըսեր, որ Փաթրիքին կամ Մարքին, Սինթիային կամ Տէպիին գրածը հայ գրականութիւն չէ: Հայերէնը հայ գրականութեան պատնէշ չէ:

– Ի՜նչ հարցերու լուծում գտեր ես երազիդ մէջ:

– Ըսաւ նաեւ, որ այս համաշխարհայնացում է, արդէն համաշխարհային ազգ էինք: Հիմա ամբողջ աշխարհ մեզ կը ճանչնայ: Մեր հայրերը եւ մայրերը կը խօսէին եւ կը գրէին, եւ  իրենք կը լսէին: Հիմա մեր տարբերութիւններով հանդերձ մէկ ազգ մէկ մշակոյթ ենք:

– Ան մեր նոր մարգարէն ըլլալու էր, Արմենակ, որ երազիդ մէջ քեզի երեւցեր է, ինչպէս Տապանակ Ուխտին՝ Մովսէսին եւ հայերէն գիրերը՝ Մաշտոցին: Ալ պէտք չէ տրտնջալ, երբ ոմանք անգլերէն, թրքերէն, ռուսերէն, արաբերէն, սպաներէն գիրք կը գրեն եւ կ’ըսեն որ այդ բոլորը հայ գրականութիւն են:

– Ճիշդ այդպէս, վէճերն ալ վերջ կը գտնեն: Երիտասարդը պէտք է գտնեմ, որպէսզի միութիւններ եւ կազմակերպութիւններ, զինք երկրէ երկիր ման ածեն: Իրարու ձեռքէ խլեն:

Եզրակացնելու համար ըսի.

– Տե՛ս որ Քեավարի բիզնեսմէնները շատ ականջակալ արտադրեն, որպէսզի արատագաղթող եւ հայրենադարձ, չհանդիպին լեզուական արգելքի, եւ ազատ ժամերու գրականութեան ծառայեն: Նոր դարք, շողոքորթի բարք ու փառք…եւ մէկութիւն…

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles