0
0
ՀԱԼԷՊ «Գանձասար» .- Կիրակի Յունիս 27-ին, հովանաւորութեամբ Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեանի, կազմակերպութեամբ Հ.Մ.Ը.Մ.-ի Սուրիոյ Շրջ. Վարչութեան, տասը տարիներու ընդհատումէն ետք, Հալէպի մէջ, մեծ խանդավառութեամբ տեղի ունեցաւ միջմասնաճիւղային տողանցք-փառատօնը, Հ.Մ.Ը.Մ.-ի Դամասկոսի, Հալէպի, Լաթաքիոյ, Գամիշլիի եւ Քեսապի մասնաճիւղերու փողերախումբերուն, սկաուտական կազմերուն եւ մարզական խումբերուն մասնակցութեամբ: Տողանցքին իրենց մասնակցութիւնը բերին նաեւ Հ.Մ.Ը.Մ.-ի «Շաւարշ Քրիսեան» քարաթէի մարզական խումբը եւ Սուրիոյ Հայ Սեւ Գօտիներու Միութեան մարզիկները:
Հալէպահայ հոծ բազմութեան կողքին ներկայ էին հայկական եւ արաբական լրատուամիջոցներ:
Տողանցքին ներկայ գտնուեցան Բերիոյ Հայոց Թեմի Առաջնորդը, հայ համայնքապետներու ներկայացուցիչները, Հ.Հ. Հալէպի Գլխաւոր Հիւպատոսը, Հ.Հ. Մարդասիրական Առաքելութեան խումբի Հիւպատոսութեան ներկայացուցիչը, պետական բարձրաստիճան հիւրեր, Հ.Մ.Ը.Մ.-ի Կեդր. Վարչութեան անդամ եղբ. Մանուկ Քէօշկէրեան, Ազգային Կեդրոնական Վարչութեան, Բերիոյ Հայոց Թեմի Ազգային Վարչութեան, Կրօնական Ժողովի եւ ազգային մարմիններու ներկայացուցիչներ, եկեղեցիներու թաղականութիւններ, հալէպահայ միութիւններու եւ հաստատութիւններու ներկայացուցիչներ եւ հրաւիրեալներ:
Տեղի ունեցաւ Հ.Մ.Ը.Մ.-ի միջմասնաճիւղային տողանցքը, որուն բացումը կատարեցին Սուրիոյ Շրջանային խմբապետութիւնն ու հինգ մասնաճիւղերու խմբապետները: Յաջորդաբար տողանցեցին Դամասկոսի, Լաթաքիոյ, Գամիշլիի, Քեսապի եւ Հալէպի մասնաճիւղերու սկաուտական եւ մարզական խումբերը, իրենց փողերախումբերուն առաջնորդութեամբ: Տողանցեցին նաեւ Հ.Մ.Ը.Մ.-ի երէց եղբայրները, որոնք երկար տարիներու վաստակ ունին միութեան շարքերէն ներս, ապա տողանցեցին Հ.Մ.Ը.Մ.-ի «Շաւարշ Քրիսեան» քարաթէի մարզական խումբը եւ Սուրիոյ Հայ Սեւ Գօտիներու Միութեան մարզիկները:
Լոզունգներու կարգին հնչեց Մեծի Տանն Կիլիկիոյ Կաթողիկոս Արամ Ա. Վեհափառ Հայրապետին Հ.Մ.Ը.Մ.-ի նուիրուած խօսքը, որուն ընթացքին հանդիսավարը Հ.Մ.Ը.Մ.-ի մեծ ընտանիքին անունով շնորհաւորական խօսք ուղղեց Նորին Սրբութեան գահակալութեան 26-ամեակին առիթով, Վեհափառ Հայրապետին մաղթելով արեւշատութեամբ եւ քաջառողջութեամբ լեցուն ընդ երկար գահակալութիւն:
Ներկաներուն իր սրտի խօսքը ուղղեց Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեան: Ան ողջունեց Սուրիոյ տարբեր շըրջաններէն ժամանած Հ.Մ.Ը.Մ.-ականները, որոնք որպէս մէկ ամբողջութիւն միացան՝ միասնաբար մեր շնորհաւորութիւնները յայտնելու Սուրիոյ նախագահին՝ իր վերընտրութեան առիթով: Ապա դիտել տուաւ, որ այսօր սու-րիացի ժողովուրդը յաղթական դուրս եկած, անգամ մը եւս կը համախմբուի իր նախագահին շուրջ, որ ամբողջ տասը տարի իմաստութեամբ, խոհեմութեամբ, լրջութեամբ եւ քաջութեամբ պայքարեցաւ սուրիական հայրենիքին ազատութեան եւ անոր ամբողջականութեան պահպանման համար: Սուրիոյ բոլոր բաղադրիչ տարրերուն հետ սուրիահայութիւնը իր մասնակցութիւնը բերաւ իր զաւակներուն արիւնը նուիրաբերելով սուրիական հայրենիքի ազատութեան եւ անկախութեան, յայտնելով Տէր Զօրէն եկող յարուցեալ հայուն հաւատարմութիւնը սուրիական հայրենիքին, անոր վսեմաշուք նախագահին եւ սուրիացի ասպնջական ժողովուրդին:
Սրբազան Հայրը հպարտութեամբ յիշեց Հայաստանի Հանրապետութեան կերտման 103-ամեակը, որուն պայծառութիւնը ի յայտ կու գայ ազգային արժէքները պահող սուրիահայ համայնքին մէջ:
Հպարտութիւն առթող տողանցքին ընդմէջէն ան տեսաւ մէկ բռունցք կազմած Հ.Մ.Ը.Մ.-ականներուն կապուածութիւնը՝ Հայաստանին, Արցախին եւ Սուրիոյ եւ Սուրիան ծաղկեցնելու անոնց վճռակամութիւնը:
Այնուհետեւ Հ.Մ.Ը.Մ.-ի Շրջ. Վարչութեան ձեռամբ տեղի ունեցաւ յուշանուէրներու յանձնում՝ Սուրիոյ հինգ մասնաճիւղերու վարչութիւններուն եւ փողերախումբերուն: Ապա տեղի ունեցաւ պարգեւատրում՝ հինգ մասնաճիւղերու մարզական ներքին մրցաշարքերու ախոյեաններուն, ինչպէս նաեւ Հալէպի Մասնաճիւղի վերանորոգուած դաշտերուն վրայ տեղի ունեցած ոտնագնդակի եւ պասքեթի մրցումներու ախոյեան խումբերուն:
Տողանցքին խանդավառութիւնը ամբողջացաւ Համազգայինի մեծ ընտանիքին գեղարուեստական յայտագիրի ներկայացումով:
