Հ.Յ.Դ. ԴՈՒՐՍ ԵԿԱՒ ԴԱՀԼԻՃԷՆ

0 0
Read Time:1 Minute, 39 Second

 

Հ.Յ.Դաշնակցութեան Գերագոյն Մարմնի ներկայացուցիչ Արմէն Ռուստամեան կը յայտնէ թէ, Հ.Յ.Դ. հրաժարած է կառավարութենէն

Երկուշաբթի Ապրիլ 27, 2009-ին, յատուկ յայտարարութեամբ մը, Հ.Յ.Դաշնակցութեան Գերագոյն Մարմնի ներկայացուցիչ Արմէն Ռուստամեան, յայտնեց որ Հ.Յ.Դ. դուրս եկած է ներկայ կառավարութենէն եւ դարձած ընդդիմադիր կուսակցութիւն:
Ստորեւ, այս առթիւ հրապարակուած յայտարարութիւնը.-
 

Հայ Յեղափոխական Դաշնակցութիւնը յայտարարում է քաղաքական «կոալիցիա»ին իր մասնակցութիւնը դադարեցնելու մասին:

Նկատի ունենալով խնդրի քաղաքական նշանակութիւնը, հանրային հնչեղութիւնը եւ հետեւանքները` անհրաժեշտ ենք համարում պարզաբանել այս քայլի պատճառները:

Նախ` Հ.Յ.Դ.-ն «կոալիցիա»ին մաս կազմեց նախագահական ընտրութիւններից յետոյ երկրում ստեղծուած ճգնաժամը, հայկական երկու պետութիւնների անկախութեանն ու անվտանգութեանն ուղղուած ռազմաքաղաքական սպառնալիքները միասնական ուժերով յաղթահարելու եւ համակարգուած բարեփոխումներ իրականացնելու նպատակադրումով:

Այս ընթացքում որոշակի յաջողութիւններ արձանագրուեցին, սակայն անյաղթահարելի սկզբունքային տարաձայնութիւն առաջացաւ արտաքին քաղաքականութեան ուղեգծի շուրջ:

Մենք մշտապէս համոզուած ենք եղել, որ պետութեան ազգային անվտանգութեան ռազմավարական ուղղութիւններից մէկը  Հայոց ցեղասպանութեան համընդհանուր, մասնաւորապէս` Թուրքիոյ կողմից ճանաչումն ու դատապարտումն է: Սա դիտարկուել է ոչ միայն պատմական արդարութեան վերականգնման, այլեւ տարածաշրջանում փոխադարձ վստահութեան մթնոլորտի բարելաւման եւ ապագայում նման ոճիրների կանխարգելման համատեքստում: Այս առումով, ինչպէս արդէն յայտարարել ենք, մեզ համար անընդունելի ու դատապարտելի էր Ապրիլ 24-ի անմիջական նախօրէին եւ Թուրքիայի ղեկավարների հակահայկական, նախապայմաններ թելադրող կեցուածքների համատեքստում Հայաստանի ու Թուրքիայի արտգործնախարարութիւնների համատեղ յայտարարութեան ընդունումը: Ունենք նաեւ սկզբունքային տարաձայնութիւններ Հայաստան-Թուրքիա բանակցութիւններում արծարծուող որոշ դրոյթների  վերաբերեալ Հայաստանի Հանրապետութեան իշխանութիւնների դիրքորոշման հարցում: Այդ դրոյթների վերաբերեալ ամբողջական տեսակէտները կ’արտայայտենք դրանց հրապարակային քննարկումների ժամանակ:

Հետեւաբար Հ.Յ.Դաշնակցութիւնը Հայաստանի քաղաքական դաշտում գործելու է նոր` ընդդիմադիր ուժի կարգավիճակով: Մեր հիմնական առաջնահերթութիւնները լինելու են.

1/ Դառնալ իշխանութեան լիարժէք այլընտրանք` բոլոր հիմնահարցերի վերաբերեալ առաջարկելով սեփական ծրագրերն ու լուծումները:

2/ Որպէս ընդդիմութիւն ստանձնել իշխանութիւններին արդիւնաւէտօրէն հակակշռելու եւ զսպելու  դերակատարութիւն:
3/ Իրականացնել անհրաժեշտ գործառոյթներ` քաղաքական դաշտի առողջացման եւ բիւրեղացման, իշխանութիւն-ընդդիմութիւն քաղաքակիրթ յարաբերութիւնների ձեւաւորման, սոցիալական արդարութեան հաստատման եւ ժողովրդավարութեան ամրապնդման նպատակով:

4/ Ծաւալել նախընտրական խոստումներից բխող ամբողջական գործունէութիւն, դրսեւորելով Հ.Յ.Դաշնակցութեան գաղափարաքաղաքական ինքնատիպութիւնը:

5/ Հայ-թուրքական յարաբերութիւնների, Ղարաբաղեան հակամարտութեան կարգաւորման գործընթացներում առաջնորդուել բացառապէս ազգային-պետական շահերի եւ նպատակների գերակայութեամբ:

Մենք գնահատելի ենք համարում «կոալիցիոն» գործընկերների հետ համատեղ գործունէութիւնը եւ յաջողութիւն ենք մաղթում նրանց աշխատանքներին` ի շահ մեր պետութեան եւ ժողովրդի:

ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ
ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
Ապրիլ 27, 2009

About Post Author

admin

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles