ՀԻՆԳԵՐՈՐԴ ՊՈՂՈՏԱՅ, ԹՐԱՄՓ ԱՇՏԱՐԱԿ ԵՒ ԳՆՈՒՄ ՉԸՆՈՂ ԶԲՕՍԱՇՐՋԻԿՆԵՐԸ

0 0
Read Time:1 Minute, 51 Second

magar2

Մակար, Դեկտեմբեր 7, 2016, ի Քուինզ, Նիւ Եորք

Այսօր՝ Դեկտեմբեր 7: Մեղա՜յ զոհերուն…
Էլպիսը եւ Մակարուհին Քուինզի վաճառատուներէն գնուածներով լեցուցած էին ճամպրուկները: Որոշած էին Ամավերջի տօներուն առիթով Նիւ Եորքի գեղազարդուած Հինգերորդ Պողոտան տեսնել: Արդէն գիշեր էր: Կեդրոնականցին տրտնջաց, զիս ալ համոզեցին: Գետնուղիի աղմկոտ կառաշարը մեզ հասցուց քաղաքին սիրտը:
Հռչակաւոր մակնիշներով լոյսերու մէջ լողացող կողք-կողքի հսկայ վաճառատուներ: Մարդկային հեղեղին մէջ նաեւ մենք: Յայտնի չէր, թէ վազողները աշխատանքէ՞ կը վերադառնային, թէ մեզի պէս բերանաբաց հիացողներ էին: Ցուցափեղկերը հէքիաթ էին եւ բարձրախօսները երաժշտական աղմուկ կը փսխէին: Ապահովական ուժերը աչալուրջ կը հսկէին:
Կանգ առինք նորընտիր նախագահի անունը կրող աշտարակին առջեւ. Թրամփ Թաուըր: Լուսանկարող-լուսանկարուողներ, ինչպէս Կիզէի բուրգերուն կամ Էյֆէլի աշտարակին առջեւ, ինչպէս մենք՝ երբ Ծիծեռնակաբերդ ուխտի կ’երթանք: Մենք ալ անմահացանք այդ Թաուըրին առջեւ: Մայթին վրայ երիտասարդ մը հասոյթի աղբիւր մը գտած էր: Հաստ ստուարաթուղթի մը վրայ մեծատառ անգլերէն գրած էր. «Իմ նախագահս չէ»: Այդ գրութեան կողքին կամ ետին, Թրամփ Թաուըրը որպէս խորքի տեսարան ունենալով, մարդիկ կը լուսանկարուէին եւ… կը վճարէին այդ ծառայութեան համար: Այդ շահին համար ալ ենթական հարկ պիտի վճարէ՞ր: Ոչ ոք կ’արգիլէր այդ բացասական վերաբերումը:
Էլպիս եւ Մակարուհին կանգ կ’առնէին գոհարավաճառատուներու առջեւ, ուր ցուցադրուած էին առասպելական ադամանդներ: Պայուսակներու եւ հագուստներու տօնավաճառ: Չփորձուեցան ձեռք տալու անոնց: Երկնաքերերու պատերը լուսազարդուած էին, դարձած էին գոյնի եւ պատկերի պաստառ:
Մտանք վաճառատուն մը: Զարմանալի: Էլպիսը եւ Մակարուհին ցուցադրուած ապրանքներու գիներուն անգամ չնայեցան եւ բաւարարուեցան դիտելու հաճոյքով: Բազկաթոռներ կային: Արմենակի հետ հանգչեցանք: Սպասեակներ կը շրջէին, կը հրամցնէին «չէմփէյն», եւ անուշեղէն: Բերին տաք «չաքլէյթ»: Ապա շարունակեցինք թափառիլ մարդկային հեղեղին հետ:
Կրկին մտանք գետնուղի: Երբ դուրս եկանք եւ կ’երթայինք դէպի ինքնաշարժը, Էլպիս եւ Մակարուհի, իրենց ձեռքի գերարդիական եւ շուտ հինցող բջիջայիններուն վրայ ճշդեցին, թէ երեք մղոն քալած էինք:
Կեդրոնականցին երբ այդ իմացաւ, հառաչելով ըսաւ.
– Կը հասկնամ թէ ինչո՞ւ քայլերս դանդաղած են եւ ոտքի մատներս կը բողոքեն:
Փսփսալով ըսի.
– Արմենակ, գոհ եղի՛ր, փորձութեան պողոտային վրայ գէթ քսակդ չբողոքեց:
Արմենակ նոր Տալայ Լամայի պէս եզրակացուց.
– Անվճար յիշատակ պիտի ըլլայ մեր «պատմական» լուսանկարը Թրամբ Թաուըրի առջեւ, նորընտիր նախագահին հետ լուսանկարուելու աժան անմահութեան երբեք պիտի չարժանանանք: Դուռ-դրացի պիտի զարմացնենք, հպարտութեամբ անոնց ցոյց տալով, որ նորագոյն պատմութենէն մեր բաժինը ստացած ենք:
Ոչ ոք խօսեցաւ Դեկտեմբեր 7-ի մասին:
Խորհեցայ որ մենք մեզմէ դուրս բանտարկուած ենք: Բայց չըսի: Ինչո՞ւ պաղ ջուր լեցնել եփած ապուրին վրայ…

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles