0
0
Ուրբաթ, Դեկտեմբեր 3-ին, Կիպրոսի Թեմի Կաթողիկոսական Փոխանորդ՝ Գերշ. Տ. Առաջնորդ Խորէն Արք. Տողրամաճեան, ընդառաջելով Երուսաղէմի Լատին Պատրիարքին, Կիպրոսի Մարոնիթներու Արքեպիսկոպոսին եւ Սուրբ Երկրի Խնամակալութեան հրաւէրին, ներկայ գտնուեցաւ Նիկոսիոյ «Սուրբ Խաչ» Լատին եկեղեցւոյ մէջ տիեզերական աղօթքի արարողութեան Հռոմի Պապի եւ Երուսաղէմի Լատին Պատրիարքին հանդիսապետութեամբ ու մասնակցութեամբ խումբ մը կղզին ապաստանած գաղթականներու եւ փախստականներու:
Աղօթքի արարողութենէն ետք, Շուէտի դեսպանութեան հովանիին տակ գործող Religious Track-ի նախօրօք համադրուած ծրագրին, Սրբազան Պապը առանձին հանդիպում ունեցաւ Կիպրոսի քրիստոնեայ եւ իսլամ կրօնապետներուն հետ, ի ներկայութեան Շուէտի դեսպան՝ Պրն. Անտըրս Հէկէլպէրկի եւ Religious Track-ի գրասենեակի վարիչ՝ Տիկին Սալբի Էսքիճեանի հետ: Պրն. Դեսպանը մասնաւոր շնորհակալութիւն յայտնեց Պապին, Նախագահական պալատէն ներս պաշտօնական իր պատգամին մէջ յատուկ կերպով անդրադառնալուն Religious Track-ի դերին, աշխատանքներուն եւ առաքելութեան: Իւրաքանչիւր կրօնապետ իր կարգին առիթ ունեցաւ ողջունելու Սրբազան Պապը: Սրբազան Հայրը, նախ փոխանցեց Մեծի Տանն Կիլիկիոյ Կաթողիկոս՝ Ն.Ս.Օ.Տ.Տ. Արամ Ա.ի եղբայրական ողջոյնները ու ապա, Կրօնական, Ազգային Ժողովներու եւ Կիպրահայ Գաղութի անունով բարեմաղթութիւններ կատարեց: Բոլոր կրօնապետները ստացան յուշանուէր մը Սրբազան Քահանայապետին կողմէ:
Յայտնենք, որ Կաթողիկոսական Փոխանորդը նաեւ պատեհութիւնը ունեցաւ զրուցելու Երուսաղէմի Լատին Պատրիարքին եւ Լիբանանի Մարոնիթներու Ռայի Պատրիարքին հետ, որուն՝ տասնեակ տարիներու ընտանեկան բարեկամութիւն եւ մտերմութիւն ունի իր ծննդավայր Ճիպէյլի (նախքին՝ Պիպլոս – Լիբանան) օրերէն:
Արարողութեան աւարտին, Radio Vatican-ը անգլերէն եւ հայերէն լեզուներով հարցազրոյց մը կատարեց Սրբազան Հօր հետ, Պապին Կիպրոս այցելութեան եւ գաղթական-փախստականներու վերաբերեալ: Կաթողիկոսական Փոխանորդը պատասխանելով բոլոր հարցումներուն ընդհանրապէս արտայայտուելէ ետք գաղթականներուն ու փախստականներուն Միջին Արեւելքի եւ այլ երկիրներէն, մասնաւորապէս կարեւորութեամբ շեշտեց Հայաստանի եւ Արցախի իրավիճակին, անցեալ տարի Արցախեան 44-օրեայ պատերազմին, որուն հետեւանքով անկախ բազմահազար նահատակներու, անյայտ կորսուածներու, հարիւրաւոր գերիներուն, այսօր նաեւ բազմահազար հայ գաղթականներ ու անպատսպառեալներ կան, որոնց մասին աշխարհը լուռ կը մնայ: Ապա, մաղթեց որ զէնքերու համար մսխուած անեզր գումարները, երանի մարդոց հիւանդութիւնները բժշկելու եւ աշխարհին խաղաղաղութեան համար տրամադրուին:
