ԽՈԺՈՌՆԻԻ ԱՌՕՐԵԱՅԷՆ…
Լուսանկարներ՝ Իննա Մխիթարեանի
Լոռի գաւառի հիւսիսային սահմանամերձ շրջանի գիւղերէն է Խոժոռնին: Բրդաձորին, Ծփին, Օփրէթին, Խոխմելին, Շանախչիին եւ Ախքիորփիին նման, Խոժոռնին մաս կը կազմէ Վրաստանի սահմանային Քվեմօ-Քարթլի շրջանին:
Այնպիսի ահաւոր կացութիւն մը ստեղծուած է, որ 82-ամեայ բնակիչ Մակար Հախվերտեանի (նկար թիւ 2) բնակարանը կրնայ պատմական նկատուիլ: Արդարեւ, Մակարի տունը կը գտնուի վրացական հողի վրայ, իսկ գոմն ու զուգարանը՝ հայկական հողի վրայ: Վերջին ամիսներուն, ստեղծուած սահմանային վէճին արդիւնք, Մակարի ոչխարները դատապարտուած են միայն գոմէն ներս արածելու…
Խոժոռնին, Չանախչիի նման 1935-ին Խորհրդային օրերուն յանձնուած է Վրաստանի եւ փոխարէն ոչ մէկ հող առնուած է: Գիւղի չորս անտառապահներէն մէկուն 22-ամեայ զաւակը բանտարկուած է անցեալ Սեպտեմբերէն ի վեր…արգիլուած հողաշերտեր օգտագործած ըլլալուն պատճառաւ:
Կը թուի թէ այլ սահմաններէ ներս ալ ճանապարհային քարտէսները կը մնան մշուշապատ եւ պղտոր:
