Լուրեր Նիւ Եորքէն.- ՏՈՔԹ. ՐԱՖՖԻ ՅՈՎՀԱՆՆԷՍԵԱՆ ԿԸ ՄԵԾԱՐՈՒԻ ԱՄԵՐԻԿԱՀԱՅ ԲԺՇԿԱԳԻՏԱԿԱՆ ՄԻՈՒԹԵԱՆ ԿՈՂՄԷ

0 0
Read Time:1 Minute, 44 Second

p13 dr rafi h

ՅԱԿՈԲ ՎԱՐԴԻՎԱՌԵԱՆ

Քսան տարիներու վրայ երկարող գնահատելի մարդասիրական եւ ազգանուէր աշխատանք մըն է որ կը կատարէ Ամերիկահայ այս միութիւնը, որուն կ՚անդամակցին հայ բժիշկներ, բուժքոյրեր, ատամնաբոյժներ, դեղագործներ, բժշկական ոլորտի մէջ եղող գիտնականներ։ Ու իրենց հիմնադրութեան 20րդ տարեդարձին առթիւ կազմակերպուեցաւ կալա հանդիսութիւն-ճաշկերոյթ Նոյեմբեր 21, 2014ին, Նիւ Եորքի ամենանշանաւոր հաւաքատեղիներէն «Նիւ Եորք Աթլեթիք Քլապ» ակումբին մէջ, ուր լեցուցած էին սրահը ոչ միայն անադմներ, այլեւ` համակիրներ ու բարեկամ ազգայիններ։

Այս միութեան տնօրէն խորհուրդին կ՚անդամակցին` Տոքթ. Լորընս Նաճարեան, նախագահ, Տոքթ. Թորոս Ջաղլասեան, նախկին նախագահ, Տոքթ. Արթիւր Քիւբիկեան, փոխ նախագահ, Տոքթ. Ցոլին Գոճաօղլանեան, ատենադպիր, Տոքթ. Քնարիկ Խաչատուրեան, հաղորդակցութեանց քարտուղար, Տոքթ. Կարպիս Պայտար, գանձապահ, Տոքթորներ Լուիզա Քիւբիկեան, Արամ Գազարեան, Լին Չեթին, Քիմ Հեքիմեան, Րաֆֆի Յովհաննէսեան, Վիգէն Փամուքեան, Դերենիկ Թերճանեան եւ Խորէն Նալպանտեան, խորհրդականներ։ Այս հանդիսութիւնը հովանաւորեց Միութեան պատւոյ նախագահը, նիւ ճըրզիաբնակ ազգային մեծ բարերար Տէր եւ Տիկին Նազար եւ Արտեմիս Նազարեանները։

Օրուան յայտագրին բացումը կատարեց միութեան նախագահ Տոքթ. Լորընս Նաճարեան, որ իր կարգին նուիրատուութեամբ մը կը մասնակցէր տեղի ունեցող նուիրատուութեանց կոչին։ Օրուան հանդիսավարն էր նիւ ճըրզիաբնակ ազգային բարերար Յակոբ Գույումճեան։ Հանդիսութիւնը սկսաւ պետական զոյգ քայլերգներով կատարողութեամբ` Նանոր Թերճանեանի։ Բացման աղօթքը կատարեց Ամերիկայի Հայոց Առաջնորդ Խաժակ Արք. Պարսամեան։

Այս հանդիսութեան յանձնախումբին ատենապետը` Տոքթ. Արամ Ղազարեան ներկայացուց քսան տարիներու ճանապարհը միութեան եւ որուն յաջորդեց Տոքթ. Լ. Նաճարեանի պաշտօնական խօսքը։ Ներկայացուեցաւ տեսաերիզ մը միութեան կատարած լայնածաւալ աշխատանքին նուիրուած։

Այս առթիւ պատուուեցան միութեան երկու հիմնադիրներէն` Տոքթ. Նահապետ Գասապեան եւ դեղագործ Խորէն Նալպանտեան, որոնց յանձնուեցան յուշատախտակներ եւ որոնք իրենց կարգին սրտի խօսքով ունեցան յաւուր պատշաճի ելոյթ։

Հուսկ հրաւիրուեցաւ օրուան մեծարեալը` «դեսպան մարդասիրութեան եւ բժշկութեան» կոչումով ներկայացուած նիւ ճըրզիաբնակ ազգային բարերար Տոքթ. Րաֆֆի Յովհաննէսեան։ Ան յուզումով ընդունեց իրեն եղած մեծարանքի այս արտայայտութիւնը։ Այս առթիւ իրեն շնորհուեցաւ ՀՀ նախագահ Սերժ Սարգսեանի «Մովսէս Հերացի» մետայլը, որ յանձնեց ՀՀ Միացեալ Նահնագներու դեսպան Տիգրան Սարգիսեան եւ Ամենայն Հայոց Հայրապետ Գարեգին Բ.-ի «Ս. Ներսէս Շնորհալի» շքանշանն ու սրբատառ կոնդակը, զոր յանձնեց Թեմիս Բարեխնամ Առաջնորդը` Խաժակ Սրբազան։ Նեկաները յոտնկայս դիմաւորեցին այս պարգեւատրումները, որոնց լիովին արժանի է համայնքին կողմէ սիրուած մեծարեալ բժշկապետը։ Ներկայ էին նաեւ ՄԱԿի մօտ ՀՀ հաւատարմատար Զօհրապ Մնացականեանն ու Անուշաւան Եպս. Դանիէլեանը։

Առանձին լոյս պիտի տեսնէ սրտբաց զրոյց մը բժշկապետին հետ, նուիրուած անոր ազգային թէ բժշկական յիսնամեայ կեանքին։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles