Լուրեր Նիւ Եորքէն.- Հ.Օ.Մ.-Ի «ՍՊԻՏԱԿ» ՄԱՍՆԱՃԻՒՂԻ ԱՄԱՌՆԱՅԻՆ ԸՆԿԵՐԱՀԱՄԱԿՐԱԿԱՆ ՀԱՒԱՔԸ

0 0
Read Time:1 Minute, 32 Second

p11 hom

ՅԱԿՈԲ ՎԱՐԴԻՎԱՌԵԱՆ

Հայ Օգնութեան Միութիւնը կը շարունակէ ազգային իր ծառայութիւնը բերել, հաւատարիմ իր ուխտին, օգնութեան հասնելու մեր կրթական ու բարեսիրական կարիքներուն։ Այսօրուան ՀՕՄուհիները բարեբախտաբար ունին տեսիլքը աւելիով ծառայելու իրենց կազմակերպութեան, որովհետեւ, բացի Հայաստանին օգտակար ըլլալու իրենց նախանձախնդրութեան, կը դիմագրաւեն նոր մարտահրաւէր մը եւս` սուրիահայութեան ու մանաւանդ վերջերս Հալէպի հայութան` բազում կարիքներուն հասնելու։ Անոնցմէ շատեր հանգիստի ժամերէն կը նուիրաբերեն իրենց պատկանած կազմակերպութեան։
Ընդհանրապէս անոնք եկած Միջին Արեւելքի մեր երբեմնի աշխոյժ համայնքներէն լաւատեղեակ են հոն կատարուած զարհուրելի դէպքերու մանրամասնութեանց եւ առաջնահերթ կը նկատեն օգտակար ըլլալու հայրենամերձ մեր գաղութներուն, ապահովելու համար անոնց շարունակական հայապահպանման աշխատանքը։
Եղանակը օգնեց որ Հըտսընի ափին «քորնեթա՚զ» (տէրը հայ) ծանօթ ճաշարանին մէջ Կիրակի, Յունիս 7-ի կէսօրին անոնք կազմակերպեն ամառնային իրենց ընկերահամակրական հաւաքը, ուր բացի անդամուհիներէն եկած էին մեծ թիւով համակիրներ ու ծանօթ դէմքեր։ Հայաշունչ մթնոլորտ մըն էր ստեղծուած իրենց ջերմ հիւրասիրութեամբն ու հիւրընկալութեամբը։ Մասնաճիւղի ատենապետուհին Տիկին Արփի Մսրլեան կատարեց բացման խօսքը, որմէ կու տանք հետեւեալ քանի մը հատուածները.
«Երեւանէն Մելինէ Գարագաշեանը տեղեկացուց թէ, Հ.Օ.Մ.-ի Հայաստանի Շրջանային Վարչութիւնը նոր ծրագիր մը որդեգրած է Ամուր Սահման, Հզօր Հայրենիք անուան տակ։ Այսպիսով վարչութեան անդամներ շրջելով Տավուշի սահմանամերձ գիւղերը օգտակար կ՚ըլլան հոն ապրող հայրենակիցներուն, մանաւանդ նիւթապէս` նորածին երեխաներու ընտանիքներուն»։
«Այս վերջին տարիներուն, մեր սուրիահայ ժողովուրդի վիճակը օրէ օր աւելի վատթարանալուն պատճառաւ, Հ.Օ.Մ.-ը նոյնպէս իր բոլոր ուժերով կը ջանայ հասնիլ սուրիահայերու օգնութեան։ Այս բոլորը կարենալ ընելու համար, ահաւասիկ այսպիսի ձեռնարկներ կը կազմակերպենք։ Մենք այս աշխատանքը սիրով կը տանինք, եւ պէտք է ամէն ջանք թափենք որ մեր սուրիահայ ժողովուրդը կարենայ գոյատեւել»։
Գեղարուեստական յայտագրով ելոյթ ունեցաւ սիրուած ջութակահար Տայանա Վասիլեան, որ դարձեալ իր ելոյթով խանդավառեց ներկաները։
Հրաւիրուեցաւ խօսք առնելու Հ.Օ.Մ.-ի Արեւելեան Ամերիկայի Շրջանային Վարչութեան ատենապետուհին Տիկին Թալին Տաղլեան, որ կոչ ըրաւ, ինք եւս, զօրավիգ կանգնելու Հ.Օ.Մ.-ուհիներու կատարած ազգանուէր աշխատանքին, մանաւանդ այս օրերուն, հասնելու սուրիահայ մեր արենակիցներուն։
Վիճակահանութեան տոմսերով, նուէրներ ստացան զանազաններ, ապահովելով նիւթական յաւելեալ եկամուտ մը մասնաճիւղին համար։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles