0
0
Ցոլեր Աղճեան
Երեսփոխան Կարօ Փայլան Ազգային Ժողովին, անգամ մը եւս օրակարգի վրայ բերաւ փոքրամասնութիւններու մատակարար մարմիններու (վաքըֆ) առկախեալ ընտրութեան խնդիրը յիշեցնելով Հանրապետութեան նախագահ Էրտողանի կողմէ վերջին շրջանին կատարուած յայտարարութիւնը, ըստ որուն ոչ-իսլամ համայնքներու վարչական խորհուրդներու ձեւաւորման եւ ընտրութեան վերաբերեալ կանոնադրութիւնը կը վերաձեւաւորուի։ Սակայն հակառակ այս յայտարարութեան, այս ուղղութեամբ տակաւին որեւէ քայլ չէ առնուած։ Տակաւին վաքըֆներու կողմէ կատարուած ընտրութեան պահանջին փոխարէն, 2019 թուականին հրապարակուած շրջաբերականին համաձայն նշանակովի անդամներով կը համալրուին փոքրամասնութիւններու վարչական խորհուրդները։ Յունուար 19, 2013 թուականին կանոնադրութեան ջնջուելուն հետեւանքով փոքրամասնական հաւաքականութիւնները աւելի քան ութ տարիէ ի վեր ընտրութիւն չեն կրնար իրականացնել։ Սահմանադրութեան 98-րդ եւ խորհրդարանի ներքին կանոնակարգի 96 եւ 99-րդ յօդուածներուն հիման վրայ, Կարօ Փայլան գրաւոր պատասխան պահանջած է փոխ-նախագահ Ֆուաթ Օքթայէն այս նիւթին կապակցութեամբ։ Ան շեշտած է թէ փոքրամասնութիւններու ընտրութեան իրաւունքը կ՚արհամարհուի եւ թէ անոնց վաքըֆները արդիւնաւէտ չեն ղեկավարուիր։
Gazete Duvar
*
Երեսփոխան Կարօ Փայլան Ազգային մեծ ժողովէն ներս օրակարգի վրայ բերաւ Անգարայի Սթանօզ գերեզմանատան կողոպուտի ենթարկուելու հարցը: Վեց հարիւր տարուան գերեզմանատունը տեւական կողոպուտի եւ թալանի կ’ենթարկուի անտէր վիճակին պատճառով: Այս գծով Փայլան մշակոյթի եւ զբօսաշրջութեան Նախարարէն հստակացում խնդրելով հարցուց հետեւեալ հարցումները՝
Ինչո՞ւ Անգարայի Սթանօզ գերեզմանատունը չի պահպանուիր:
Արդեօ՞ք գերեզմանատունը թալանող գողերուն պատժելու ձեւեր որդեգրած էք:
Ինչպէ՞ս կ’ընդունիք մշակութային արժէք ունեցող վայրերը աւերակներու վերածուին գողերու պատճառով:
Երկրին տարածքին բազմաթիւ հայկական գերեզմանատուներ կան, զանոնք պահպանելու համար ի՞նչ աշխատանք կը տանիք:
Meclis Haber
* Մանուկներու համար ամառնային Քորանի դասընթացք մը տեղի ունեցաւ Այա Սոֆիայի մէջ:
Anadolu Ajans
*
Հայերէն Աստուածաշունչեր կը ցուցադրուին Ամասիայի թանգարանէն ներս, սակայն առանց նշելու թէ անոնք հայկական են:
Ermeni Haber
*
Հայաստանի վարչապետ Նիկոլ Փաշինեանը յայտարարութիւններ ունեցաւ Թուրքիոյ վերաբերեալ: Նշելով, որ հայերը դրական ազդակներ ստացած են Թուրքիայէն եւ անոնց կը պատասխանեն դրական ազդանշաններով: Այս մէկը ըսաւ Օգոստոսի 25 -ին նախագահ Ռեճէպ Թայիպ Էրդողանին ելոյթէն ետք, որուն ընթացքին, ան Հայաստանի մասին ըսաւ հետեւեալը՝ «Մենք յայտարարեցինք, որ Լեռնային Ղարաբաղի գրաւման աւարտին մեր տարածաշրջանին մէջ երկարատև խաղաղութեան հնարաւորութեան կարելիութիւնը կայ եւ եթէ Հայաստանը այս մէկը հաշուի առնէ, մենք կը կատարենք այն ինչ որ անհրաժեշտ է»:
Euronews Turkiye
*
Այս տարի եւս Քորոնա ժահրի նախազգուշական օրէնքներու պատճառով, Ախթամար կղզիի Սուրբ Խաչ եկեղեցւոյ Սեպտեմբեր 5-ի Սուրբ Պատարագի արարողութեան ներկայ պիտի գտնուին սահմանափակ թիւով մարդիկ ուղարկուած Պատրիարքարանէն:
DHA
*
Մալաթիոյ Սուրբ Երրորդութիւն եկեղեցւոյ մէջ 106 տարիներ ետք առաջին անգամ ըլլալով կը մատուցուի Սուրբ Պատարագ Կիրակի, Օգոստոս 29, 2021-ին:
Պատրիարքութիւն Հայոց – Ermeni Patrikligi
*
«Մինչ Ատրպէյճանը համագործակցութեան նոր դաշտ կը ստեղծէ Թուրքիոյ հետ եւ տարածաշրջանային խաղաղութիւն ապահովելու համար կապեր կը փորձէ գծել, Հայաստան իր պարտութենէն ետք, վերսկսած է աշխարհաքաղաքական պայքար մը», կ’ըսէ Ատրպէյճանի միջազգային յարաբերութիւններու վերլուծական Կեդրոնի մասնաճիւղի տնօրէն՝ տոքթ. Ճաւիտ Վելիեվ:
Ըստ իրեն, Արցախի երկրորդ պատերազմէն ետք, Նոյեմբեր 9-ի դաշինքի կէտերը որոշ ժամանակ ետք ալեւս դրական ընթացքով չեն կիրարկուիր հետեւեալ պատճառներով՝
Ռուսիոյ եւ Եւրոպական Միութեան արտաքին աջակցութիւնները առիթ տուին Հայաստանի լարուածութիւնը բարձրացնելու քան դիւանագիտական ճամբան:
Հայաստանի երկուքի բաժնուիլը: Հայաստանի մէջ արտաքին աջակցութիւնը ըմբռնուած է, որպէս աջակցութիւն անոնց որոնք չեն համակրիր տարածաշրջանային համագործակցութեան անլսելի դարձնելով համագործակցութեան կողմնակից եղողներուն ձայները:
Արցախի հայերուն երկուքի բաժնուիլը:
Ատրպէյճան Իրանի նոր վարչակազմէն աւելի հետեւողական կեցուածք կ’ակնկալէ:
Sozcu
