0
0
ՅԱԿՈԲ ՎԱՐԴԻՎԱՌԵԱՆ
Հոգեկան բաւարարութիւն է այլեւս ներկայ գտնուիլ Կարինէ Պօղոսեանին համերգներուն: Ան ստեղծած է կապը իր եւ հանդիսատէսին միջեւ: Արդէն դարձած է վարպետը անոր: Եւ որքան ներկայ կը գտնուին երաժշտասէրներ իր դաշնակի մենահամերգներուն, կ՛ունենան նոյն հարազատութեան փոխադարձ զգացումները իր եւ իր արուեստին նկատմամբ: Աղուորը այն է, որ իրեն համար չի նուագէր, որպէս գործ կամ սէր որպէս, Կարինէն նկատի կ՛ունենայ իր ունկնդիրը:
Ահա՛ այս գաղտնիքին ան տիրացաւ անցնող քանի մը տարիներուն եւ ասոր որպէս պատճառ` Կարինէն կը հրաւիրուի ամէնուրէք: Այլեւս հայկական բեմերէն անդին, փնտռուած դաշնակահարուհի ան գիտէ հմայել ոչ-հայ տարբեր մակարդակներու եւ տարբեր երաժշտական “դպրոց“ներու հետեւող հանդիսականները:
Տարօրինակօրէն ալ, Կարինէն արդէն ունի իր հաւատարիմ ունկնդիրներու խումբ մը, որ իր հետ են ամէն երգահանդէսի: Կը տեսնես դէմքեր, ծանօթ դէմքեր, որոնք քանի մը ամիս առաջ տեսած էիր արդէն: Եւ այս յաջողութեան համար ալ ուրախ ենք, որովհետեւ, լաւ գիտնալով այս մեծ ոստանի մշակութային կեանքի մրցակցութիւնը, միայն այն ատեն կրնանք գնահատել արուեստագիտուհիին յամառ աշխատանքը` հասնելու այդ մակարդակին մատջելի դարձնելով իր արուեստը բոլոր անոնց որով իր հրամցուցածը ան կը բարձրացնէ այդ որակին:
Վերջինը այդ համերգին եղաւ Մարտ 26-ին, Երեքշաբթի երեկոյեան ժամը 6-ին, Նիւ Եորքի Քոլոմպիա համալսարանի Սէյնթ Փոլ մատռան մէջ: 19-րդ դարու կոթական ոճով այս Փրեսփիթերիըն եկեղեցիին սրբավայրը ինքնին քեզ կը դնէ առաջին վայրկեանէն դասական հաճելի մթնոլորտի մը մէջ եւ որմէ չես ուզէր բաժնուիլ:
Յայտագիրը ամբողջութեամբ Սերկէյ Ռախմանինոֆ, նուիրուած ռուս մեծահամբաւ երաժիշտին ծննդեան 140ամեակին (1873-1943):
Յայտագիրը երեք բաժինով ներկայացաւ. Six Moments Musicaux, Op. 16, Litacs, Op. 21, No. 5 (երկու յաջորդական ծանր կտորներու միջեւ կարծէք հաճելի միջնարար մը ըլլար, քնքուշ լիլիներու դաշտի մը մէջ որպէս) եւ հեղինակին հռչակաւոր Piano Sonata No. 2 in B-flat Minor, Op. 36 (2nd Version):
Սէյնթ Փոլ մատուռը իր ձայնային սքանչելի աքուսլիքով կը մնայ արուեստի մնայուն հարստութիւն մը եւ անշուշտ ժամադրավայր մը, Նիւ Եորքի համար: Աւելի քան մէկ ու կէս դար այս մատուռը հրապուրած է որքա՛ն երաժիշտը, նոյնքան` հանդիսատեսը:
Կարինէն անգամ մը եւս յաջողեցաւ:
