ԹՈՒՐՔԻՈՅ ՄԵԾՊԵՏԱԿԱՆ ԵՒ ԿԱՅՍԵՐԱԿԱՆ ՆԿՐՏՈՒՄՆԵՐԸ

0 0
Read Time:2 Minute, 2 Second

mark1

Մարք Յարութիւնեան

(թարգմանեց՝ Յ.Պալեան)

 

Թուրքիա ցարդ չյաջողեցաւ Եւրոմիութեան դռները բանալ: Ի՜նչ փոյթ: Ան կը հետեւի իր կայսերական եւ մեծ-պետական նկրտումներուն, եւ կը հաստատուի հոն ուր զինք չեն ուզած: Այդ կը պատահի նաեւ զինք չուզողներու աչքին առջեւ, որոնք չեն հակազդեր:

Թուրքիոյ նախագահը մեծամոլական իր ախորժակները բաւարարելու համար Անգարայի մէջ կառուցած էր օսմանական փառքի օրերը յիշեցնող նոր պալատ մը։ Եւրոպայէն միլեառներ ստացող Թուրքիան կառուցած է Ֆրանսայի Վերսայ պալատէն տասնապատիկ մեծութեամբ նախագահական ապարանք մը:

Այս ապարանքը արժած էր 490 միլիոն եւրօ: Այսինքն՝ աւելի քան 546 միլիոն տոլար: 1000 սրահներով եւ սենեակներով, 5000 հոգիով մզկիթով մը: Տարածութիւնը 200.000 քառակուսի մեթր: Բաղդատել աշխարհի հզօրագոյն պետութիւնը համարուող Միացեալ Նահանգներու նախագահական ապարանքին, որ միայն 5.100 քառակուսի մեթր տարածութիւն ունի, շուրջ 40 անգամ աւելի փոքր: Կը գերազանցէ նաեւ Քրեմլինի պալատը, որ ունի 25.000 քառակուսի մեթր տարածութիւն, ութը անգամ նուազ: Ֆրանսայի նախագահական ապարանքը՝ Էլիզէն՝ունի 11 000 քառակուի մեթր տարածութիւն, 300 սենեակներ, սրահներ, 18 անգամ փոքր է Էրտողանի պալատէն:

Խօսուն է նաեւ իր հիւրերը ընդունելու պատկերը: Դեռ յայտնի չէ, թէ պիտի ստեղծուի՞ ենիչէրիներու պահակագունդ:mark

 

Այս մեծութեամբ ապարանքի մը բնակիչ նախագահը ինչպէ՞ս կրնայ հանդուրժել տարբեր կարծիքներու եւ քննադատութեան, հետեւաբար պէտք է լռեցնել ազատ խօսքը եւ մամուլը: Ուրեմն կրնայ փակել թերթեր եւ հեռատեսիլ, բանտարկել լրագրողներ: Նման նախագահական ապարանքով նախագահ մը, բնական է որ ճառագայթէ համայն աշխարհի մէջ, նոյնիսկ հոն՝ ուր իր ներկայութիւնը անբաղձալի է, Եւրոմիութեան կեդրոն Սթրազպուրկի մէջ, եւ գրկաբաց ընդունուիլ աշխարհի մեծերուն կողմէ:

Ինչպէ՞ս հաւատք ընծայել այդ մեծերուն:

Սթրազպուրկի մէջ Թուրքիան կը կառուցէ, երկրէն դուրս, իր դիւանագիտական ներկայացուցչութեան ամենամեծ շէնքը, նախագահական ապարանքը յիշեցնող, հիւպատոսարան՝ 13.000 քառակուսի մեթր տարածութեամբ, չորս շէնքերով, Եւրոխորհուրդի մօտ դեսպանութեան, հիւպատոսարանի, բնակարան հիւպատոսի, տարածք՝ հանրութեան համար: Այս բոլորը՝ դրացնութեամբ Եւրոպայի Մարդկային Իրաւանց Ատեանին: Հակառակ բնակչութեան դժգոհութեան, կառուցումը արտօնուած է:

Միաժամանակ մեծ մզկիթ մը պիտի կառուցուի զոյգ 36 մեթր բարձրութեամբ զոյգ մինարէներով, 5000 քառակուսի մեթր տարածութեամբ:

Ըստ հետախուզական կառոյցներու, այս բոլորի ետին կը կանգնին կազմակերպութիւններ, որոնք կը միտին վերջ տալ աշխարհիկ – լայիկ – կառավարման կարգերու, հաստատելու համար իսլամական ընկերութիւն, կարգեր, օրէնք եւ պետութիւն:

2012-էն ի վեր, Թուրքիան Սթրազպուրկի մէջ հաստատած է նաեւ իսլամական համալսարան, ոչ թէ  սոսկ կրօնական նպատակներով, այլ որպէս յեցակ իր քաղաքական նպատակներուն, քանի որ կ’ըսուի, թէ ան պիտի ծառայէ «Եւրոպայի թրքական սփիւռքի կազմակերպման»: Ոչ ոք հարց կու տայ՝ ի՞նչ ընելու համար:

Եթէ Կոստանդնուպոլիսը Իսթանպուլ եղաւ եւ Այա Սոֆիան մզկիթ, պատճառ չկայ որ Սթրազպուրկը կամ Եւրոպայի ուրիշ քաղաք մը չըլլայ Եէնի Գոնիա կամ Էրտողան Սիթի…

Պատմութիւնը ընթացքի մէջ է եւ տոլարի կամ եւրոյի կիրքը հաւկուրութեան ախտ է…

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles