0
0
Քովիտ 19-ը պատճառ է, որ Կեդրոնականցիին չբաւեն հայերէն թերթերը եւ Հայաստանի ձայնասփիւռը, հիմա կը հարստանայ ֆրանսական հեռատեսիլով:
Դարձած է իսկական համայնագիտարան:
Ընթրիքի ժամուն անակնկալ կերպով այցի եկաւ.
– Մակա՛ր, Թուրքիան բոլոր քաղաքակիրթ երկիրներէն առաջ անցած է, շնորհիւ իր նախագահին, որ ինքզինք հռչակած է Ֆրանսայի նախագահի հոգեբոյժ: Լսէ՛ ֆրանսական հեռատեսիլը:
– Լաւ է: Կը դարմանէ իր մեծամտութիւնը, իր ժողովուրդի եւ իր մոլեռանդութիւնը, տիրելու ախտը, mégalomania-ն:
– Մարդկութիւնը ականատես եւ ականջալուր եղաւ ոչ թէ անմարդկային ոճիրի մը, այլ՝ գազանային: Մոլորակներ նուաճող մեր դարուն, դեռ կարելի՞ է հաւու գլուխ կտրելու պէս մարդ գլխատել: Ֆրանսայի նախագահը դիմած է ազգային ինքնապաշտպանութեան, թոյլ չտալու համար երկրի մասնատումը, ինչ որ, ըստ երեւոյթին Էրտողանին դժգոհութիւն պատճառած է, քանի որ անոր մէջ տեսած է տարածուելու իր անսահման փառասիրութեան դէմ արգելք:
– Արմենա՛կ, այդպէս է հետեւանքը կակուղ թաթիկ ըլլալու:
– Գլխատուած ուսուցիչին ողբերգական մահուան առիթով, Էրտողան դիւանագիտական նուազագոյն ցաւակցութիւն չէր յայտնած ո՛չ Ֆրանսայի, ո՛չ անոր նախագահին եւ ո՛չ ալ դժբախտի ընտանիքին, ինքզինք չզրկելու համար իր հետեւորդներէն: Ֆրանսայի նախագահը պաստասխանատու է երկրի ամբողջութեան եւ ըսած է, որ չի կրնար ընդունիլ, որ նոյն երկրին մէջ տարբեր օրէնսդրութիւններ ըլլան, դուռ բանալով երկրի մասնատման: Այս խօսքերը հաճելի չեն թուած խալիֆայ նոր-օսման սուլթանին, որ խախտելով միջազգային կանոնները, նախատած է նախագահ Մաքրոնը:
– Ֆրանսացիները եթէ չէին գիտեր, թէ որոնց հետ գործ ունէին, թող հայերուն հարցնէին:
– Երբ կրկէսին մէջ խաղցողներէն մին կանոնները կ’անտեսէ, խաղը կը դադրի: Էրտողան բիրտ ձեւով կը յայտարարէ. «Երկրի մը ղեկավարին, որ իր երկրի միլիոնաւոր անդամներ ունեցող կրօնական տարբեր համայնքներուն այդ ձեւով կը վերաբերի, այն կարելի է ըսել, որ գացէ՛ք նախ ձեր մտային վիճակը քննել տուէք»: Անդուռ նախատինք: Եւ Ֆրանսա տուն կանչած է Անգարայի իր դեսպանը:
– Արմենա՛կ, հիմա ի՞նչ պիտի ըլլայ:
– Կը խորհիմ, որ Անգարայի կամ Պոլսոյ հոգեբուժարանները նախագահի գլխու հիւանդութիւն ախտորոշող նոր մեծ բժիշկը պաշտօնի պիտի կոչեն: Եւ քսանչորս ժամ չանցած, ոչ թէ բժիշկներուն թիւը մէկով պիտի աւելնայ, այլ՝ հիւանդներու: Եթէ ազատախոհ թերթ մնացած ըլլար Թուրքիոյ մէջ, լրագրող մը պիտի դիմէր Էրտողանին Ղուկաս Աւետարանիչին խօսքերով. «Բժիշկ, բժշկեա՛ զանձն քո»…
Մակարուհիին բերած սուրճը մարեց Կեդրոնականցիին զայրոյթը:
Մակար ի Գաղիա, 25 հոկտեմբեր 2020
