ԵՐԲ ԺՈՂՈՎՈՒՐԴԸ ՊԱՏՌՈՒՄ Է ԻՐ ԼՌՈՒԹԻՒՆԸ…
Դոկտ․ Մարի Ռոզ Աբուսէֆեան
15 Յունիս 2025
Բոլորս ականատես ենք, թէ ինչպէ՛ս երկար տարիներ Արեւմուտքը եւ Եւրոպան միասնացած Իսրայէլի ամէնօրեայ ստայօդ քարոզչութեանը, աշխարհի աչքին շարունակաբար վարկաբեկեցին Իրանի Իսլամական Հանրապետութիւնը, օգտագործեցին ամէն տեսակի արգելք պատժամիջոցներ` առեւտրի, նաւթի արդիւնաբերման եւ վաճառման սահմանափակումներից մինչեւ ռազմականը, նոյնիսկ դեղորայքի եւ նորագոյն արհեստավարժութեան սահմանափակումները:
Երկար տարիներ առանց դադարի, տարբեր միջոցների անյաջող օգտագործումից յետոյ, վերջապէս իրենք իրենց դիմակազրկելով բացայայտօրէն գործեցին: Գործեցին, ինչպէս յատուկ է վախկոտներին, առանց պատերազմ յայտարարելու յարձակում, նախ ռազմական հրամանատարութեան եւ գիտութեան մարդկանց ոչնչացում եւ ապա ռազմական հրամանատարութեան մասով անգլուխ մնացած երկրի ոչնչացում:
Նաւթի ողջ եկամուտը իրենց գրպանները լեցնելու մոլուցքով 1978թ յեղափոխութիւն կազմակերպելով շահին փոխարինեցին մոլլաներով , երկիրը փորձեցին բաժանել մասերի, աշխարհից մեկուսացրին երկիրը, սակայն ի զարմանս իրենց եւ աշխարհին, Իրանը անդրդուելի մնաց, տարիներ տոկաց իրեն պարտադրուած բոլոր դժուարութիւններին եւ արհամարհանքներին, ատամները սեղմած, լուռ ամրացաւ, հզօրացաւ, բարգաւաճեց եւ այս օրերին իր լռութիւնը պատռելով ազդարարեց իր ՀԶՕՐՈՒԹԻՒՆԸ:
Միշտ չէ, որ յաղթում է զէնքը, երբ ժողովուրդի հաւաքական ուժն է լեռնանում, այդ զէնքը առաւել խոցելի է դառնում, քանզի դրա մէջ հաւաքագրուած է զրկանք, ստրկացում, կորուստներ, սեղմուած ատամների եւ բռունցքների ուժ:
Սա պարզ պատերազմ չէ, այլ տարիներ ժողովրդի մէջ կուտակուած ճիչն է, որ իւրաքանչիւր ռումբի հետ պայթում է Թել Աւիւում, Հայֆայում, Իսրայէլի ամենակալ, ողջակիզումով պատսպարուած երկնքում:
Իւրաքանչիւր ռումբ դա երկու սերունդ Իսրայէլի եւ արեւմուտքի կողմից տառապած, նուաստացուած Իրանի ժողովրդի կամքն ու հպարտութիւնն է:
Իւրաքանչիւր ռումբ իր հողին, իր երկրին եւ իր սահմանների համար արդարօրէն պայքարող ժողովրդի եւ ղեկավարութեան միասնութիւնն է:
Իւրաքանչիւր ռումբ դա Պաղեստինի ժողովրդի բնաջնջման, Պէյրութի խաղաղ ժողովրդի դէմ Իսրայէլի կիրառած ցեղասպան քաղաքականութեան հակադարձումն է:
Դա իւրաքանչիւր պաղեստինցի անտուն, անօթեւան մնացած սերունդի վրէժն է: Դա փլուզուող տների կոյտերում մնացած Կազայի եւ Պէյրութի խաղաղ բնակչութեան ճիչն է: Դա դիտաւորեալ սովամահութեան մատնուած երեխաների եւ միլիոնաւոր պաղեստինցիների, Եմէնի ժողովրդի սրտակտոր, աշխարհին հասցնել փորձող անկարող աղաղակն է:
Իւրաքանչիւր ռումբ դա մարդկութեանը յիշեցում է, որ Պարսկաստանը դարաւոր պատմութիւն ունեցող երկիր է, իւրաքանչիւր դար ստիպել է ամրանալ, ուղղել իր նախկին սխալները, դիմացել է դարերի ասպատակումերին, անյաղթ Ալեքսանդրից մինչեւ արաբական արշաւանքները, բոլշեւիկներից մինչեւ ողջ Միջին Արեւելքին բացայայտ ոտնաձգումներով տիրանալ փորձող Իսրայէլը:
Իր երկրի պաշտպանութեան համար նետուած իւրաքանչիւր ռումբ, դա նաեւ սուտ, շինծու, յօրինուած մեղադրանքների քարոզչութիւնից մարդկութեանը արթնացնելու կոչ է, որը վերաբերւում է յատկապէս նաեւ մեզ:
Իրանի ժողովրդի կրած լուռ տառապանքի հակադարձումը պատռեց Իսրայէլի յօրինած անխոցելիութեան աշխարհը սարսափեցնող առասպելը:
Յուսանք այս հակադարձումը կը ձեւաւորի նոր աշխարհաքաղական իրավիճակ, ուր երկրագունդի կարծեցեալ տէրերը հաշուի կ՛առնեն արհամարուած երկրների զսպուած լռութեան պոռթկումը:
Լինելով այսպիսի մի երկրի հարեւանը, որը մեզ թիկունք է կանգնել մեր մինչեւ իսկ սահմանազատման հարցում, մենք այսօր լուռ ենք իր այս ծանր փորձութեան պահին, քանզի մենք ստրուկ ենք մի ոչնչութեան, որը ծառայում է այս երկրը ոչնչացնողներին:
Գրում եմ այս տողերը սրտի կսկիծով, որովհետեւ իւրաքանչիւր տողի հետ ծնունդ է առնում իմ մէջ լռութեամբ թշնամուն նուիրաբերած մեր երկրի կարեւորագոյն տարածքի ողջ պատկերը: Երբ հազարաւոր երիտասարդների կեանքը զոհաբերուեց յանուն մի ոչնչութիւն պահելու, քանզի այդ ոչնչութիւնը ծառայում է մի մեծ պետութեան, մի պետութիւն, որը նշանաւոր է կեղծ մեղադրանքներով երկրներ կործանելուն միայն ու միայն իր շահի համար:
Բայց չէ՞ որ մենք աւելի հին երկիր ենք, աւելի դաժան փորձութիւններից անցած, աւելի ծանր հարուածներ կրած:
Ինչո՞ւ մեր ստացած հարուածները թշնամուն կործանող զէնք չդարձան, այլ օգնեցին մի ոչնչութեան կործանելու մեզ:
Արդեօք մեր ժողովուրդը տեղի ունեցող այս ամէնի մէջ կը վերագտնի՞ իր վերլուծելու, իր ճակատագրական սխալները տեսնելու եւ ուղղելու կարողութիւնը, թէ՞ կը շարունակի դէպի կործանում տանող անհոգ, անտարբեր կեանքը, ներկայ փողոցային իշխանութեան երկրպագութեամբ:
