ԵՊԻՍԿՈՊՈՍԱՑ ԺՈՂՈՎԻ ԱՌԻԹՈՎ.- ԳԱՐԵԳԻՆ Բ. ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ 

0 0
Read Time:2 Minute, 57 Second

cath7

Սիրեցեալ եղբայր ի Քրիստոս, Արամ Ա. Մեծի Տանն Կիլիկիոյ Կաթողիկոս,
Գերաշնորհ Արամ արքեպիսկոպոս Աթեշեան, Պատրիարքական Ընդհանուր Փոխանորդ ԿոստանդնուՊոլսի Հայոց Պատրիարքութեան,
Գերաշնորհ Սրբազան հայրեր,
Անհուն ուրախութեամբ Մեր ջերմ ողջոյնն ենք բերում Ձեզ եւ փառք ու գոհութիւն վերառաքում առ Բարձրեալն Աստուած, որ վերստին շնորհը պարգեւեց մեր Սուրբ Եկեղեցու եպիսկոպոսաց դասի հետ համախմբուելու աստուածախնամ հովանու ներքոյ Քրիստոսակերտ Մայր Աթոռ Սուրբ Էջմիածնում:
Անցեալ տարի Եպիսկոպոսաց ժողովի գումարումը ոչ միայն նշանակալի իրադարձութիւն էր, այլեւ` կարեւոր ձեռքբերում եկեղեցական կեանքում, քանզի դարեր շարունակ ծանր ու դժուարին ժամանակների, անբարենպաստ իրավիճակների ու հանգամանքների, եկեղեցավարչական խնդիրների պատճառով հնարաւոր չէր եղել կազմակերպել եպիսկոպոսաց դասի համախմբումը: Նախորդ ժողովական աշխատանքով մենք ունեցանք օգտաշատ քննարկումներ, ընդունեցինք եկեղեցական եւ ծիսական հարցերին առնչուող, սոցիալական բնագաւառներին վերաբերող որոշումներ` ի նպաստ մեր Սուրբ Եկեղեցու առաքելութեան զօրացման ու արդիւնաւորման եւ մեր հոգեւոր, ազգային ու հայրենական կեանքի առաջընթացի:
Եպիսկոպոսաց ժողովի պարբերաբար գումարումն անհրաժեշտ է եկեղեցական անդաստանում բարեփոխումներ իրականացնելու, մեր Եկեղեցու ընթացքը ժամանակի զարգացումներին համաքայլ պահելու, արդիական հարցադրումներին արձագանգնելու եւ առկայ հրամայականներին ու մարտահրաւէրներին համապատասխան մեր Սուրբ Եկեղեցու տեսակէտները նորովի բանաձեւելու եւ ներկայացնելու համար: Եպիսկոպոսաց ժողովի հրաւիրումը կարեւոր է նաեւ մեր հոգեւոր-եկեղեցական գործունէութիւնը զօրացնելու եւ աւելի արդիւնաւորելու համար, որպէսզի մեր ժողովրդին անսայթաք պահենք ու պահպանենք հաւատքի ուղիներում եւ առաւել ճանաչելի դարձնենք մեր Եկեղեցու Քրիստոսաւանդ վարդապետութիւնը, եկեղեցական սրբազան աւանդոյթները, ծէսերն ու տօները: Պատմութեան փորձութիւններից հաւատքով փրկուած ժողովուրդ ենք, եւ այսօր էլ մեր հաւատքը եւ հաւատակերտ գործերը պիտի բարեզարդեն ու լուսաւօրէն ազգային-եկեղեցական մեր կեանքի անդաստանները եւ ապագայի մեր իղձերն ու տեսլականները:
Եպիսկոպոսաց այս ժողովի օրակարգում մենք անդրադառնալու ենք Ցեղասպանութեան զոհերի սրբադասման հռչակման արարողակարգին եւ ծիսական կանոնակարգին, Սուրբ Մկրտութեան խորհրդի բարեկարգեալ ծիսակարգին, որոնց շրջագծում դեռեւս կան վճռման կարօտ մի շարք հարցեր: Ուրախալի է, որ օրակարգում է նաեւ Կոմիտաս Վարդապետի սրբադասման գործընթացի ձեռնարկումը: Արդարեւ, Եկեղեցին զօրանում է իր սրբերով, նրանց լուսաւոր կեանքի մշտավառ օրինակով եւ երկինց օթեւաններում նրանց բարեխօսական աղօթքով: Ցեղասպանութեան զոհերի սրբադասումով նաեւ պիտի շարունակուի դարէր ի վեր մեր Եկեղեցում դադարած սրբադասման գործընթացը, իսկ Մկրտութեան կանոնի վաւերացմամբ` ծիսաարարողական միօրինակութիւնը եկեղեցական մեր անդաստանում: Իրականացուած հետեւողական եւ ջանադիր աշխատանքների համար գոհունակ սրտով Մեր բարձր գնահատանքն ենք բերում Կենտրոնական յանձնաժողովի, Սրբադասման եւ Ծիսական միասնական յանձնախմբերի անդամներին:
Մեր Սուրբ Եկեղեցին իրականացնելով իր զաւակների հոգու փրկութեան եւ յաւիտենական կեանք առաջնորդելու տէրունապատուէր առաքելութիւնը` միաժամանակ կարեւորում է բարօրութիւնը այս կեանքի, ինչպէս ուսուցանում է առաքեալը. “Աստուածապաշտութիւնը օգտակար է ամէն ինչի. եւ նա ունի կէանքի աւետիսը, ա՛յս կէանքի եւ հանդերձեալի“: Հայ Եկեղեցին, ինչպէս դարէր շարունակ, այսօր էլ ջանք ու նպաստ է բերում մեր Հայրենիքի զօրացման, Սփիւռքի կենսունակութեան, մեր ժողովրդի խաղաղ կեանքի ու բարօր կեցութեան համար: Աննուազ նախանձախնդրութեամբ պիտի շարունակենք միջազգային հարթակներում անլռելի պահել մեր Սուրբ Եկեղեցու կոչը` յանուն Հայոց Ցեղասպանութեան համընդհանուր դատապարտման, Արցախի մեր ժողովրդի ազատ ապրելու իրաւունքի ճանաչման, այլեւ` Սուրիայում, Իրաքում, ողջ Մերձաւոր Արեւելքում խաղաղութեան վերահաստատման, կրօնական հալածանքների դադարեցման, քրիստոնէական համայնքների իրաւունքների պաշտպանութեան: Արդի աշխարհին առաջնահերթօրէն յուզում են սոցիալ-տնտեսական, քաղաքական խնդիրները, քան հոգեւորը` մարդ-աստուած յարաբերութիւնների անխաթար պահպանումը եւ համընդհանուր բարիքի համար աստուածահաճոյ կերպով ապրելու ձգտումները: Այս ընթացքները անխուսափելիօրէն առաջնորդում են բարոյական ընկալումների խաթարման, ընտանիքի, մարդկային բարձր արժէքների վերաբերեալ հասկացութիւնների խարխլման, որոնցից, ցաւօք, զերծ չէ նաեւ ազգային մեր կեանքը: Նման իրավիճակը շեշտում է հրամայականը Եպիսկոպոսաց ժողովի` առաւել համակարգուած եւ եռանդուն գործելու, աւելի նախանձախնդրութեամբ Աստծոյ կենարար խօսքը մատռուակելու մեր հաւատաւոր զաւակներին, որպէսզի մեր ժողովուրդը հաստատուն լինի դէպի Աստուած ընթացքներում եւ զօրանայ իր քրիստոնէական կեանքով, որով մեր իրականութեան շատ խնդիրներ պիտի յաղթահարուեն:
Աղօթքով առ Ամենակալն Աստուած հայցում ենք Սուրբ Հոգու շնորհները եւ առաջնորդութիւնը սրբագումար այս ժողովին` համատեղ ու արդիւնաւոր ջանքերով լուծումներ գտնելու մեր Եկեղեցին յուզող խնդիրներին ու մարտահրաւէրներին: Թող Տէրը Իր օրհնութեան ներքոյ յաւէտ շէն ու պայծառ պահպանի մեր Սուրբ Եկեղեցին Նուիրապետական իր Աթոռներով, խաղաղ, ապահով ու բարօր` Հայաստան ու Արցախ հայրենի մեր երկիրն ու աշխարհասփիւռ ժողովրդին:
“Թագաւոր երկնաւոր, զեկեղեցի Քո անշարժ պահեայ. եւ զերկրպագուս անուանդ Քում պահեայ ի խաղաղութէան“: Ամէն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles