«Գագիկ Ծառուկեան» Բարեգործական Հիմնադրամի Նուիրատութիւնները

0 0
Read Time:2 Minute, 40 Second

p6 KAKIG3

Ընդառաջելով Մեծի Տանն Կիլիկիոյ Արամ Ա. վեհափառ հայրապետի հրաւէրին` Հայաստանի Ազգային Ողիմպիական կոմիտէի նախագահ, բարերար Գագիկ Ծառուկեան դէպի Եւրոպա իր այցելութեան ճամբուն վրայ, այցելեց Լիբանան: Ան այցելեց Մեծի Տանն Կիլիկիոյ Անթիլիասի Մայրավանքը, ուր մօտէն ծանօթացաւ կառոյցին: Հայրենի հիւրը մօտէն ծանօթացաւ մատենադարանին, թանգարանին, Ցեղասպանութեան զոհերու յիշատակի մատրան: Ապա ուղղուեցաւՊիքֆայայի ամառանոց, ուր հանդիպում ունեցաւ Արամ Ա. Կաթողիկոսին հետ` ներկայութեամբ Լիբանանի եւ Բերիոյ թեմերու առաջնորդներուն, Ազգային կեդրոնական վարչութեան եւ Ազգային մարմիններու ներկայացուցիչներուն հետ: Նախքան հանդիպումը ան այցելեց Սուրբ Աստուածածին եկեղեցի, որմէ ետք ուղղուեցաւ Հայոց Ցեղասպանութեան յուշարձանին մօտ, ուր ծաղկեպսակ մը զետեղեց յուշարձանի կողքին գտնուող խաչքարին դիմաց:p6 KAKIG1
Ապա Ծառուկեան իրեն ընկերակցող պատուիրակութեան հետ ուղղուեցաւ վեհարան: Շուրջ մէկ ժամ տեւած հանդիպումին ընթացքին Արամ Ա. կաթողիկոս ողջունելէ ետք Ծառուկեանի ներկայութիւնը նկատել տուաւ, որ Մեծի Տանն Կիլիկիոյ կաթողիկոսութիւնը ոչ միայն պատմական աթոռ է, այլ նաեւ պատմական առաքելութիւն ունեցած է մեր ժողովուրդի ճակատագրական մէկ հանգրուանին եւ ցեղասպանութենէն ետք կարեւոր դեր կատարած է սփիւռքի մէջ` հայապահպանման, ինչպէս նաեւ եկեղեցաշինութեան եւ դպրոցաշինութեան աշխատանքներուն մէջ: «Մեր ազգային պահանջատիրութեան եւ մեր իրաւունքներու ձեռքբերման գծով այս աթոռը կարեւոր դերակատարութիւն ունեցաւ սփիւռքի մէջ», հաստատեց վեհափառ հայրապետը: Շարունակելով իր խօսքը` Արամ Ա. կաթողիկոս շեշտեց, որ Հայաստան-սփիւռք կապը կը դիտենք մէկ համապարփակ ամբողջութեան մէջ եւ կը փորձենք հզօրացնել Հայաստանը մեր կարելիութեան սահմաններուն մէջ, որովհետեւ կը հաւատանք, որ Հայաստանի հզօրացումը սփիւռքի հզօրացումն է եւ փոխադարձաբար: Ան ըսաւ, որ երբ հարցերը համահայկական եւ համազգային են, Մեծի Տանն Կիլիկիոյ կաթողիկոսութեան Ս. աթոռը ըսելիք եւ ընելիք ունի` աւելցնելով, որ մեր ուժերը պէտք է համախմբենք: Մեծի Տանն Կիլիկիոյ կաթողիկոսութեան Ս. աթոռը միշտ աջակից եղած է Հայաստանի պետականութեան հզօրացման եւ Հայաստանի ժողովուրդի բարօրութեան: «Անձ մը իր գործով կ՛արժեւորուի», հաստատեց վեհափառ հայրապետը` գնահատելով Ծառուկեանի կատարած բարեգործութիւնները եկեղեցաշինութեան եւ այլ ծառայութիւններու մէջ:p6 KAKIG2
Բերիոյ թեմի առաջնորդ Շահան արք. Սարգիսեան ընդհանուր գիծերու մէջ ներկայացուց վերջին հինգ տարիներուն տեղի ունեցած պատերազմին պատճառով Սուրիոյ հայութեան տագնապը եւ կարիքները:
Աւարտին խօսք առաւ բարերար Գագիկ Ծառուկեան, որ հպարտութիւն եւ գոհունակութիւն յայտնեց Լիբանանի մէջ իր ներկայութեան համար: Ան գնահատեց Մեծի Տանն Կիլիկիոյ կաթողիկոսութեան հայապահպանման եւ համախմբման ի նպաստ տարած աշխատանքը: Ան նաեւ նկատել տուաւ, որ Գագիկ Ծառուկեան հիմնադրամը 500 հազար ամերիկեան տոլար կը նուիրէ Կիլիկիոյ կաթողիկոսութեան ծրագիրներուն եւ սուրիահայութեան կարիքներուն: Ապա ան արծաթեայ մեծ խաչ մը նուիրեց վեհափառ հայրապետին, որ իր կարգին Բարձրբերդի Աւետարան եւ յիշատակի նուէրներ յանձնեց բարերարին:
Ծառուկեան նաեւ այցելեց նորակառոյց Ազգային Միացեալ Վարժարան, ընկերակցութեամբ Լիբանանի հայոց թեմի առաջնորդ Շահէ եպս. Փանոսեանի, Ազգային իշխանութեան եւ վարչութիւններու անդամներուն, քահանայ հայրերու, լիբանանահայ կառոյցներու պատկան միութիւններու ներկայացուցիչներուն: Ծառուկեան մօտէն ծանօթացաւ վարժարանի շինարարական աշխատանքներուն եւ յայտնեց, որ «Գագիկ Ծառուկեան» բարեգործական հիմնադրամը հարիւր հազար ամերիկեան տոլարով իր մասնակցութիւնը պիտի բերէ այդ աշխատանքներուն: Ծառուկեան նաեւ այցելեց Լիբանանի Օգնութեան Խաչի «Արաքսի Պուլղուրճեան» ընկերաբժշկական կեդրոն, ուր ընդունուեցաւ
Շրջանային վարչութեան եւ կեդրոնի տնօրէնութեան կողմէ եւ մօտէն ծանօթացաւ բազմաբնոյթ գործունէութեան եւ յատկապէս կեդրոնի աշխատանքներուն:
Ազգային Առաջնորդարանի սրահին մէջ տեղի ունեցաւ հանդիպում մը:
Այս առիթով, Ծառուկեան ըսաւ, որ լիբանանահայութիւնը բոլոր մարզերուն մէջ մեծ գործ կը կատարէ, ինչ որ հայրենասիրութեան եւ բարեգործութեան արտայայտութիւն է: Ծառուկեան հաստատեց, որ գաղութին մէջ նաեւ հայապահպանութեան նպաստող մեծ գործ կը կատարուի, ինչ որ ողջունելի է եւ օրինակելի ամբողջ հայութեան համար: Ան յայտարարեց, որ «Գագիկ Ծառուկեան» բարեգործական հիմնադրամը այսուհետեւ տարեկան պիտի ստանձնէ լիբանանահայ քսան ուսանողի Հայաստանի մէջ ուսանելու ծախսերը: Գագիկ Ծառուկեան աւելցուց, որ Հայաստան-Արցախ-սփիւռք միասնակամ մօտեցումներով կարելի է մեր աշխատանքներուն մէջ յաջողութիւններ արձանագրել: Ծառուկեան հաստատեց, որ հիմնադրամը պատրաստակամ է համահայկական որեւէ ծրագիրի բերելու իր մասնակցութիւնը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles