Արցախի Ազգային Ժողովի Յայտարարութիւնը
Ստորեւ, Արցախի Հանրապետութեան Ազգային ժողովի նախագահի պարտականութիւնները կատարող Գագիկ Բաղունցի յայտարարութիւնը Արցախի ժողովրդի դէմ ատրպէյճանական ռազմական ագրեսիայի եւ բռնի տեղահանման երրորդ տարելիցի կապակցութեամբ.-
Երեք տարի առաջ այս օրը` 2023 թուականի Սեպտեմբեր 19-ին, Ատրպէյճանը, խախտելով միջազգային իրաւունքի բոլոր նորմերն ու 2020 թուականի եռակողմ յայտարարութեամբ ստանձնած պարտաւորութիւնները, լայնածաւալ ռազմական ագրեսիայ սանձազերծեց աւելի քան իննամսեայ շրջափակման հետեւանքով հիւծուած Արցախի Հանրապետութեան դէմ:
Այդ ռազմական յանցագործութիւնը, որն ուղեկցուեց քաղաքացիական ենթակառուցուածքների թիրախաւորմամբ եւ խաղաղ բնակչութեան սպանութիւններով, դարձաւ Արցախի հազարամեայ բնիկ ժողովրդի դէմ նախապէս ծրագրուած էթնիկ զտման եւ ցեղասպան քաղաքականութեան գագաթնակէտը: Միջազգային հանրութեան լռութեան եւ գործուն մեխանիզմների բացակայութեան պայմաններում աւելի քան 120 հազար արցախցիներ ստիպուած եղան լքել իրենց պատմական հայրենիքը` փրկուելու ֆիզիկական բնաջնջումից:
Այս ողբերգական օրը մեր խոնարհումն ենք բերում յանուն հայրենիքի պաշտպանութեան իրենց կեանքը զոհաբերած բոլոր նահատակների պայծառ յիշատակի առջեւ: Նրանց սխրանքն ու անձնազոհութիւնը մեր ժողովրդի պատուի եւ արժանապատուութեան յաւէրժական վկայութիւնն են:
Անցած երեք տարիները չեն նսեմացրել եւ չեն կարող նսեմացնել մեր բնականոն իրաւունքները եւ դրանք պաշտպանելու մեր յանձնառութիւնը: Ուստի` Արցախի ժողովրդի անունից վերահաստատում եմ.
• Արցախցիների հաւաքական եւ անվտանգ վերադարձի իրաւունքը հանդիսանում է անսակարկելի: Այն պէտք է իրականացուի միջազգային յուսալի երաշխիքների եւ մեր ժողովրդի հիմնարար իրաւունքների ու ազատութիւնների լիարժէք ապահովման պայմաններում:
• Պաքուի բանտերում շինծու մեղադրանքներով պահուող Արցախի ռազմաքաղաքական ղեկավարութեան եւ մեր միւս բոլոր հայրենակիցների անյապաղ ազատ արձակումը պէտք է լինի միջազգային հանրութեան առաջնահերթութիւններից:
• Բռնազաւթուած Արցախում հայկական պատմամշակութային ժառանգութեան ոչնչացումն ու իւրացումը մշակութային ցեղասպանութեան շարունակութիւնն են, որը պահանջում է միջազգային հանրութեան անյապաղ միջամտութիւնն ու կանխումը:
• Հայաստանի Հանրապետութիւնում ապաստանած արցախահայութեան կենսական կարիքների բաւարարումն առաջնահերթ հրամայական է: Այս ուղղութեամբ էական նշանակութիւն ունի միջազգային հանրութեան շարունակական ու նպատակային աջակցութիւնը` տեղահանուած բնակչութեան սոցիալական կայունութիւնն ամրապնդելու եւ հումանիտար մարտահրաւէրները յաղթահարելու գործում:
Չնայած այսօր ստեղծուած ծանր աշխարհաքաղաքական իրավիճակին եւ բռնի տեղահանման դառնութեանը` արցախցիների համախմբուածութիւնը, ինքնութեան պահպանումն ու պայքարի շարունակականութիւնն այլընտրանք չունեն:
Մենք պարտաւոր ենք համատեղել ողջ հայութեան ներուժը` պաշտպանելու Արցախի ժողովրդի լեգիտիմ իրաւունքներն ու հասնելու պատմական արդարութեան վերականգնմանը:
ՅաւԵրժ փառք մեր նահատակներին:
Տոկունութիւն եւ կամք Արցախի ժողովրդին եւ համայն հայութեանը:
