Լրահոս
ԱՐԱՄ Ա. ԿԱԹՈՂԻԿՈՍԻՆ ՆԵՐԿԱՅԱՑՈՒՑԻՉՆԵՐԸ ՀԵՏ ՀԱՆԴԻՊԵՑԱՆ ԳԱՐԵԳԻՆ Բ. ԿԱԹՈՂԻԿՈՍԻՆ
Մեծի Տանն Կիլիկիոյ Արամ Ա. կաթողիկոսին ներկայացուցիչները՝ կաթողիկոսարանի «Կիլիկիա» մատենադարանի տեսուչ Շահան արք. Սարգիսեան եւ կաթողիկոսարանի դիւանապետ Տաճատ եպս. Աշըգեան, Էջմիածինի մէջ հանդիպում ունեցան Ամենայն Հայոց Գարեգին Բ. կաթողիկոսին հետ։
Անոնք Գարեգին Բ.-ին փոխանցեցին Արամ Ա.-ի մտահոգութիւնները եւ այս իրավիճակէն դուրս գալու՝ անոր պատկերացումները։ Արամ Ա. կաթողիկոսի ներկայացուցիչները միաժամանակ լսեցին Գարեգին Բ.-ի մտահոգութիւններ եւ տեսակէտները։ Հանդիպումը տեղի ունեցաւ Շաբաթ, 28 Յունիսին։
Երկու սրբազան հայրերը, յանուն Արամ Ա. կաթողիկոսին եւ Մեծի Տանն Կիլիկիոյ կաթողիկոսութեան՝ շեշտեցին հայ եկեղեցին ամուր եւ կազմակերպ պահելու հրամայականը՝ իր հոգեւոր առաքելութեան ու ազգային ծառայութեան մէջ։
