ԱՏՐՊԷՅՃԱՆ ԴԷՄ Է ՌՈՒՍԱԿԱՆ ԽԱՂԱՂԱՊԱՀ ԱՌԱՔԵԼՈՒԹԵԱՆ

0 0
Read Time:2 Minute, 29 Second

Ա.Ա.

Երբ ռուսական խաղաղապահ ուժերը քսանչորս նոյեմբերին հրապարակուած հաղորդագրութեան մը մէջ հաստատեցին, որ ատրպէյճանական ուժերը զինադուլը խախտած են Արցախի Մարտակերտի շրջանի Մաղաւուզ գիւղին ուղղութեամբ, ատրպէյճանցիները զայրացան ոչ թէ որովհետեւ ռուսերը կը հաստատէին, որ զինադուլը խախտած է ատրպէյճանցիներուն կողմէ, այլ որովհետեւ ռուսական պաշտօնական հաղորդագրութեան մէջ գործածուած էր հայկական Մաղաւուզի անունը։ Ատրպէյճանի պաշտպանութեան նախարարութիւնը, որ ի պաշտօնէ պէտք էր, որ խօսէր միայն զինադուլի խախտման դէպքին մասին, յայտարարեց, որ Ատրպէյճանի իշխանութիւնները դժգոհ են, որովհետեւ ռուսական կողմը չ՛առաջնորդուիր Արցախի տեղանուններու ատրպէյճանական տարբերակներու ցանկով։
Բնականաբար ռուսական կողմը հակադարձեց եւ յստակացուց, որ ռուսական խաղաղապահ ուժերը կ՛օգտագործեն Ռուսիոյ բանակին սպայակոյտին մօտ գտնուող տեղագրական քարտէզներուն մէջ նշուած անունները, աւելցնելով, որ շարասիւներու ճանապարհներուն շուրջ համաձայնութիւններուն,ինչպէս նաեւ ճանապարհներու որոշման ընթացքին կայացած փոխադարձ գործակցութեան արդիւնք ձեւակերպուած բոլոր փաստաթուղթերուն մէջ ատրպէյճանական կողմը նոյն անունները կը գործածէ։ Հետեւաբար առարկութիւնը անտեղի է։
Ատրպէյճանի պաշտպանութեան նախարարութիւնը քանի մը օր ետք դարձեալ հրապարակեց հաղորդագրութիւն մը, որուն մէջ այս անգամ պահանջեց, որ Ռուսիոյ պաշտպանութեան նախարարութիւնը չգործածէ Լեռնային Ղարաբաղ անունը, որովհետեւ անիկա կապ ունի Խորհրդային օրերու Լեռնային Ղարաբաղի Ինքնավար Մարզին հետ, որ այլեւս անցեալին կը պատկանի։Այս անգամ խնդիրը կը վերաբերէր Ռուսիոյ պաշտպանութեան նախարարութեան պաշտօնական կայքէջին վրայ տեղադրուած՝ խաղաղապահ ուժերուն պաշտօնական տեղեկութիւններուն, ուր «Ղարաբաղի տնտեսական շրջանը Լեռնային Ղարաբաղի տարածք կ՛անուանուի»։ Ըստ Ատրպէյճանի պաշտպանութեան նախարարութեան, Ատրպէյճանի իշխանութիւնները պաշտօնական ցանկ եւ քարտէսներ տրամադրած են Ռուսիոյ պաշտպանութեան նախարարութեան, Ատրպէյճանի տարածքին մէջ ժամանակաւորապէս տեղակայուած ռուսական խաղաղապահ ուժերուն հրամանատարութեան եւ ռուսեւթրքական հսկողութեան կեդրոնին՝ «Ատրպէյճանի ղարաբաղի տնտեսական շրջանի բնակավայրերուն ճիշդ անուններուն մասին»։Սակայն ռուսերը տակաւին կը շարունակեն հայկական անունները օգտագործել,ինչ որ ատրպէյճանցիներուն զայրոյթը գրգռած է, մանաւանդ երբ իրենց վերջին տեղեկագրին մէջ, որ հրապարակուած է քսանեօթը նոյեմբերին, դարձեալ յիշատակած են Արցախի բնակավայրերը՝ իրենց հայկական անուններով։
Պէտք է նշել,որ Ատրպէյճանի իշխանութիւնները ռուսական խաղաղապահ ուժերուն Արցախի մէջ տեղակայուելէն ի վեր հինգ անգամ նոյնանման բողոքներ ներկայացուցած են Ռուսիոյ պաշտպանութեան նախարարութեան։Անշուշտ այս բողոքներուն տուն տուող իսկական պատճառը պէտք է յստակացնել, որ չուշացաւ, երբ ԱզԹիՎի-ի քաղաքական մեկնաբանը, որ լրատու աղբիւրին տնօրէն Ռովշան Մամետովն է, յայտարարեց.«Ռուսիոյ պետութեան յարգելի ներկայացուցիչներ, կա՛մ կ՛ընդունիք, որ Ղարաբաղը Ատրպէյճան է, կա՛մ դուրս կը շպրտուիք Ատրպէյճանէն»։Ան մանաւանդ շեշտեց, որ ինք կը յայտարարէ Պաքուի իշխանութիւններուն պաշտօնական դիրքորոշումը, յիշեցնելով,որ Ատրպէյճան պաշտօնապէս չէ վաւերացուցած ռուսական խաղաղապահ ուժերուն առաքելութիւնը։«Երեք տարի ետք Ղարաբաղի մէջ ոչ մէկ ռուս զինուոր պիտի մնայ, իսկ Ատրպէյճանի ցանկութենէն կախեալ է անոնց ներկայ գործունէութիւնը, որուն ժամկէտը կրնայ կրճատուիլ», յայտարարեց Մամետով։
Ռուսական խաղաղապահ ուժերուն գործունէութեան կապուած միակ լուրջ խնդիրը այն է, որ ի տարբերութիւն նախկին խորհրդային տարբեր շրջաններ գործուղուած ռուսական խաղաղապահ ուժերուն, Լեռնային Ղարաբաղի մէջ օրինական դասակարգում եւ առաքելութեան վաւերացում չունին, որովհետեւ Ատրպէյճան անոնց գործունէութեան իր պաշտօնական համաձայնութիւնը չէ տուած։Ռուսական խաղաղապահ ուժերուն առաքելութեան ճակատագրին շուրջ անորոշութիւնը առաւել շեշտուեցաւ, երբ Սոչիի հանդիպման կարելի չեղաւ առաքելութեան ժամանակաշրջանի երկարաձգման շուրջ համաձայնութեան մը յանգիլ, որովհետեւ Ատրպէյճանի նախագահ Իլհամ Ալիեւ կտրականապէս մերժեց նման երկարաձգում։
Այս բոլորին լոյսին տակ պէտք է նկատի ունենալ, որ Ալիեւ ամէն միջոցի կրնայ դիմել , որպէսզի կրճատուի կամ ջնջուի ռուսական խաղաղապահ ուժերու առաքելութիւնը` Արցախի մէջ։Նման կրճատման կամ ջնջման պարագային, աղէտալի ճակատագիր մը կրնայ սպասել Արցախի։Այս իրականութիւնն է, որ ամէնէն աւելի ուշադրութեան պէտք է արժանանայ Երեւանի իշխանութիւններուն կողմէ։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
100 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles