ԱՏՐՊԷՅՃԱՆԻ ՔԱՐՈԶՉԱԿԱՆ ՄԵՔԵՆԱՆ ԳՈՐԾԻ ԼԾՈՒԱԾ

0 0
Read Time:1 Minute, 46 Second

p1 Azerbaijan-Independence

ՀԱՅՐԵՆԻՔ

Խմբագրական

Նոյեմբեր 10, 2014

Նորութիւն մը չէ Ատրպէյճանի լրատուական աղբիւրներէն լոյս ընծայուած այն տեղեկութիւնը, թէ Աշխարհի զանազան շրջաններէ ներս, պիտի ստեղծուին համակարգման կեդրոններ, որոնք լայն պիտի բանան դռները ո՛չ միայն տեղւոյն ազերիներուն, այլ նաեւ տեղացիներուն, որոնք յաւելեալ տեղեկութիւններ պիտի ստանան կրակի կամ հուրի երկրին՝ Ատրպէյճանին մասին:

Յատկապէս, Հայոց Ցեղասպանութեան սեմին դիտմամբ մտածուած եւ պատրաստուած գաղափար մըն է այս մէկը, որուն տեղեկութեան “թայմինկ“ն է որ աւելի ազդեցիկ է քան թէ այդ հաստատութեան կատարելիք աշխատանքները:

Թուրք-ազերի քարոզչական մեքենայի մէկ համակարգումն է այս համակարգը, մանաւանդ որ այս կառոյցը թրքախօս երկիրներու համար պիտի բանայ իր դռները:

Բնականաբար, անակնկալ մը չէ, որ այս նիւթին քննարկումն ու վերջնական որոշումներու յանգիլը կատարուած է Պոլսոյ մէջ, թրքախօս պետութիւններու խորհուրդի ընդհանուր քարտուղարութեան եւ այս մարզէն ներս Ատրպէյճանի ներկայացուցիչին միջեւ:

Նմանօրինակ հիմնարկ երբեք պէտք չէ բաղդատել, կամ նոյնիսկ համեմատել Սպանիոյ մշակութային եւ լեզուաբանական “Սերվանթէս“ կամ Գերմանիոյ “Կէօթէ“ հիմնարկներուն հետ, ուր լրջօրէն եւ ամենայն բծախնդրութեամբ, լեզուագիտութիւն եւ մշակոյթ կը դաստիարակուի, հեռու աժան, անհիմն եւ անտեղի քարոզչութենէ:

Ակնթարթ մը քննելով նմանօրինակ լեզուագիտական-մշակութային կեդրոնի մը հիմնումը, կարելի է տրամաբանական նկատել թէ, այսպիսով թրքախօս պետութիւններու համագործակցութեան խորհուրդի անդամ երկիրներուն միջեւ կրնայ կիրարկուիլ ուսանողներու փոխանակման աշխատանք։

Սակայն, դռները չբացած, արդէն իսկ այս մտայղացման ետին գտնուող հերոսները, թէեւ կը տեղեկացնեն թէ այսպիսի հիմնարկներ պիտի ամրապնդեն միջազգային բեմէն ներս, թրքախօս երկիրներու սփիւռքեան դիրքը եւ յաւելեալ ազդեցութիւն ունենան անոնց բնակած երկիրներէն ներս, սակայն նաեւ կը շեշտեն թէ այս կառոյցներով շատ աւելի դիւրին պիտի ըլլայ պայքարիլ՝  “Հայոց երեւակայածին Ցեղասպանութեան“ հարիւրամեակի հաւաքներուն:

Կարելի է շարունակել թէ այս թուրք-ազերի հակահայ քարոզչական հիմնարկը, թէ ի՞նչպիսի գործունէթութիւն օպիտի ունենայ:

Բնականաբար, այս հիմնարկի ծրագիր-կանոնագրէն ներս, անբաժան պիտի ըլլայ Արցախի հիմնահարցի աղաւաղումն ու Սումկայիթի փոկրոմի մոռացումը: Փոխարէն շինծու Խոճալուի հարցն է որ պիտի պարզուի:

Անկասկած որ այս “ենթակայական“ դաստիարակչական բնոյթ ունեցող գործունէութեան կողքին, նաեւ տեղի պիտի ունենայ “առարկայական“ը, որուն մէկ նմանօրինակը վերջերս պատահեցաւ Բրիտանիոյ մայրաքաղաք՝ Լոնտոնի մէջ, ուր հանրահռչակ մէկ զբօսաշրջային միջազգային ցուցահանդէսին, ազերի երիտասարդներ, իրենց երկրի դրօշներով շրջապատեցին Արցախի տաղաւարը եւ փորձեցին խափանել աշխատանքները:

Այսպիսի բաներ պիտի կատարեն այդ հիմնարկի այցելու երիտասարդները: Իսկ եթէ նիւթական պայմանները ներեն, նաեւ կրնայ շարունակուիլ…աշխարհի զանազան քաղաքներէ ներս, Ալիեւի հօր արձանին զետեղումը, այս անգամ նշուելով իբրեւ թրքախօս երկիրներու համակարգման ռահվիրայ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles